Read Mizo Lushai Exodus 15 Bible Online

Exodus 15 - Mizo Lushai bible

Exodus 15

¹“LALPA fakin hla ka sa ang, Ropui takin a hneh ta si a. Sakawr leh a chungchuang tuipuiah a paih thla.

² LALPA chu mi tichaktu, Zaia ka fak chu a ni; Min chhandamtu a ni, Ani chu ka Pathian a ni a, ka chawimawi ang. Kan pate Pathian a ni a, a ropuizia ka hril ang.

³ LALPA chu râl do mi a ni a, A hming chu LALPA a ni.

⁴Farawa leh a tawlailîr chu a sipai rualte nên tuipuiah a paih thla a, Sipai hotu ṭhate pawh Tuipui Senah an pil.

⁵Tui thûkah chuan an tla a, Lungtum angin tuipui mawngah an pil.

⁶Aw LALPA, i kut ding lam chu a va chak êm! Aw LALPA, i hmêlmate chu i râwt sawm tâk hi.

⁷Nangmah dotute chu ropui takin i hneh a, I thinur alh chuan buhpâwl angin a kâng ral ta.

⁸I thâwk khum a, tui chu a lo intiang a, Bang ang maiin a lo ding ta luah a, A thûk laite chu a lo châr zo ta.

⁹‘Kan ûm ang a, kan nangchîng ang a, Duhtâwkin an chungah kan che ang a, An neih zawng zawng kan insem ang,’ hmêlmate chuan an ti vei a.

¹⁰I thli i han chhêmtîr a, Tuipui chuan a chîm pil ta a, Tui thûkah chuan suan tlang angin an pil zo ta.

¹¹‘Aw LALPA, nang ang rênga thianghlim leh ropui, Fak tlâk leh thiltithei Pathian dang an awm em ni le?’

¹²I kut ding lam i han phar a, Hmêlmate chu leiin a dawlh zo ta.

¹³I mi, i tlante chu lainatin i hruai a, I ram thianghlimah i chaknain i hruai thleng a.

¹⁴Miten an lo hriatin an khûr a, Filistia rama awmte an thauvah a man.

¹⁵Edom ram hotute an thlabâr a, Moab hruaitute an thlaphâng a, Kanan rama mite an zâm zo ta.

¹⁶I mi, i mi thlanten an kal pelh hma loh chuan I chakzia an hmuhin hlauvin an khûr a, Lungtum ang maiin an chechâng lo. Hlau leh khûrin an khawng.

¹⁷I tlâng thianghlimah chuan i hruai thleng a, I phun ta a; Aw LALPA, nangma chênna tûr hmun i siam ngeiah chuan.

¹⁸ LALPA chu chatuan chatuanin a lal ang.”

¹⁹Farawa sakawrte chu, a tawlailîrte leh sakawr chungchuangte nên tuipuiah an tlân lût a; LALPA chuan tuipui tui chu a tikîr a, a chîmtîr a, Israel fate erawh chu tuipui mawng leichârah an kal kai a ni.

²⁰Arona u, zâwlnei Miriami chuan perhkhuang a keng a, hmeichhe dangte pawh chuan perhkhuang kengin an zui a, an lâm a.

²¹Miriami-te chuan hetiangin hla an sa a: “LALPA chu fakin awm rawh se, a ropui êm e, Sakawr leh a chungchuangte chu tuipuiah a paih thla,” an ti a.

²²Mosia chuan Israel fate chu Tuipui Sen aṭang chuan a hruai zêl a, Sur thlalêr an thleng a, ni thum an kal a, tui a awm lo va.

²³Tui awmna, Mara, an va thlen chuan a tui chu a khâk avângin an in thei si lo va, a hmingah pawh Mara an vuah rêng a ni.

²⁴Mosia hnênah, “Eng nge kan in tâk ang?” tiin an phunnawi ta a.

²⁵Mosia chuan LALPA chu a au va, ani chuan thing pakhat a kawhhmuh a, chu chu tuiah chuan a chiah a, tui chu a lo tui ta a. Chutah chuan thupêk leh awm dân tûr a kawhhmuh a, anni chu hetiang hian a fiah ta a:

²⁶“In Pathian LALPA thu hi in ngaihthlâka, a mit hmuha thil dik in tih chuan, a thupêkte in zawma, a dânte in pawisak bawk chuan Aigupta mite tuar ang hri kha ka tuartîr ve lo vang che u; tidamtu che u LALPA ka nih hi,” tiin.

²⁷Tuikhur sâwm leh pahnih leh tûm kûng sawmsarih awmna hmun Elim chu an thleng a.