Read Mizo Lushai Exodus 16 Bible Online

Exodus 16 - Mizo Lushai bible

Exodus 16

¹Elim aṭang chuan an kal zêl a, Aigupta ram an chhuahsan aṭanga thla hnih leh ni sâwm an kal ni chuan Israel fate chu Elim leh Sinai inkâr Sin thlalêr an thleng a.

²Israel pungkhâwmho chu Mosia leh Arona chungah an phunnawi a.

³An hnênah Israel fate chuan, “Aigupta rama sa bêl bula kan ṭhut lai te, puar taka chaw kan ei lai te khân LALPA chuan min lo tihlum mai se a ṭha zâwk tûr, thlalêra rilṭâma thi tûrin mi hei zozai hi min hruai chhuak a nih hi,” an ti a.

⁴ LALPA chuan Mosia hnênah, “Ngai rawh, in ei tûr vân aṭangin ka rawn sûrtîr dâwn; mite chuan an ni khat tla chiah chhar rawh se; ka thu an zâwm dâwn nge dâwn lo ka fiah dâwn a ni.

⁵A ni ruk nia an chhar chu ei atân an buatsaih ang a, ni danga an chhar lêt an chhar tûr a ni,” a ti a.

⁶Mosia leh Arona chuan Israel zawng zawng hmaah chuan, “LALPA chuan Aigupta ram aṭangin a hruai chhuak ngei che u a ni tih nakin tlaiah chuan in hria ang a, LALPA ropuizia in hmu ang.

⁷LALPA chunga in phunnawi kha a lo hria a ni, keini hi eng nge kan niha kan chunga in phunnawi ang le?” an ti a.

⁸Mosia chuan, “LALPAN tlaiah sa a rawn pe dâwn che u a, zîngah puar tâwka in ei tûr chaw a pe bawk ang che u, a chunga in phunnawi thu hi a lo hria a, kan chunga in phun hi LALPA chunga phunnawi in ni zâwk asin,” a ti a.

⁹Mosia chuan Arona hnênah, “Israel fa pungkhâwmho chu, ‘In phunnawina thu LALPA chuan a lo hria a, a bulah lo kal hnai teh u,’ tiin hrilh rawh,” a ti a.

¹⁰Aronan Israel pungkhâwmho hnêna thu a sawi lai chuan, thlalêr lam an han thlîr a, chhûmah LALPA ropuina a lo lang a.

¹¹LALPA chuan Mosia hnênah,

¹²“Israel-te phunnawina chu ka lo hria e, an hnênah, ‘zanriahah sa in ei ang, zîngah chaw puar takin in ei bawk ang, Kei LALPA hi in Pathian chu ka ni tih in hria ang chu, a ti,’ ti rawh,” a ti a.

¹³Tlaiah chuan vahmîm an lo thlâwk a, an bûk vêlah chuan an fu khat tlat a; zîngah chuan an bûk vêl chu daiin a khuh vek bawk a.

¹⁴Dai chu a han hul chuan thlalêr leiah chuan thil vâr pan tê tê, vûr ang maia thianghlim hi a lo awm ṭeuh va.

¹⁵Israel fate chuan, “Eng nge ni ngai?” an ti a; eng nge a nih an hre lo va ni. Mosia chuan an hnênah, “LALPA chaw pêk che u a nih hi.

¹⁶Hei hi LALPA thupêk chu a ni; mahni kham tâwk chiah chauh chhar ṭheuh rawh u; in ina awm zawng tân no hnih hisâpin chhar ang che u,” a ti a.

¹⁷Israel-te chuan chutiang chuan an ti ta a; ṭhenkhat chuan an chhar tam deuh va, ṭhenkhat erawh chuan an chhar tlêm deuh va.

¹⁸Nova an han teh chuan a chhar tam deuhte chuan an ngah bîk chuang lo va, a chhar tlêmte lahin an nei tlêm chuang bîk hek lo; mahni kham khawp chiah an chhar vek a ni.

¹⁹Mosia chuan, “A tûka ei atân tiin tu man khêk suh se,” a ti a.

²⁰Mosia thu chu an awih duh chuang lo va, ṭhenkhat chuan an ei bâng chu a tûka eiah an khêk a; mahse, a lung a, a ṭawih chhia a; Mosia chu an chungah a thinur hle a.

²¹Tûk tin, mahni ei tâwk tûr chauh an chhar ta zêl a; ni a tlângsân chuan a tuiral vek ṭhîn.

²²A ni ruk ni chuan a lehhniha tamin, mi pakhat tân no li zêl hisâpin an chhar a ni. Pungkhâwmho chunga rorêltute chuan Mosia chu an rawn hrilh a.

²³Ani chuan an hnênah, “Hei hi LALPA sawi kha a ni, naktûk hi ni serh, LALPA tâna sabat thianghlim chu a ni. Vawiinah in ei duh zât chu hem hmin ula, chhum in duh zât chu chhûm rawh u; a bâng chu a tûk atân dah ṭha ang che u,” a ti a.

²⁴Mosia thupêk ang chuan a tûk atân an khêk chu a ṭawih lo va, a lung hek lo.

²⁵Mosia chuan an hnênah, “Chu chu vawiin chuan ei rawh u, vawiin hi LALPA sabat a ni a, khawiah mah chhar tûr in hmu lo vang.

²⁶Ni ruk chhûngin tûk tin in chhar ang a, a ni sarih ni erawh chu sabat a ni a, pakhat mah chhar tûr a awm lo vang,” a ti a.

²⁷Ni sarih ni chuan mi ṭhenkhat chu an thil chhar ṭhin chhar tûrin an thawk chhuak a; mahse, chhar tûr rêng an hmu lo.

²⁸ LALPA chuan Mosia hnênah, “Eng chen nge ka thupêk leh ka dânte hi in zawm duh loh dâwn?

²⁹Kei LALPA hian sabat ni ka siamsak che u a; chuvângin, a ni ruk niin in ei tûr ni hnih daih ka pe che u a ni; a ni sarih ni hi chuan mahni bûkah awm ṭheuh rawh u, tu mah kal chhuak suh u,” a ti a.

³⁰Tichuan, mite chu ni sarih ni chuan an châwl a.

³¹Israel chhûngte chuan chu thil chu ‘Mana’ an vuah a, chhibung vâr chi ang hi a ni a, khawizu-a hmeh chhangpêr anga tui a ni.

³²Mosia chuan, “LALPA thupêk chu hei hi a ni; in thlah zêlte hmuhah mana no khat dah ṭhat tûr a ni; Aigupta ram ata ka hruai chhuak che u a, thlalêra ka châwmna che u chaw a nih hi,” a ti a.

³³Mosian Arona hnênah, “Bêl la la, Mana no khat dah rawh. Ṭhang lo thar zêlte hmuh atân LALPA hmaah dah ang che,” a ti a.

³⁴Mosia hnêna LALPA thupêk ang chuan Arona chuan LALPA hmaa thuthlung bâwmah chuan a dah ṭha a.

³⁵Israel fate chuan mihring chênna ram, Kanan ram an thlen hma chu kum sawmli chhûng ngawt mana chu an ei a ni.

³⁶Tehna no sawmhnih hi ṭîn khat vêl a ni.