Read Mizo Lushai Exodus 17 Bible Online

Exodus 17 - Mizo Lushai bible

Exodus 17

¹Israel fa pungkhâwmho chu Sin thlalêr aṭang chuan LALPA thupêk angin an insawn zêl a; Refidim-ah bûk an khuar a, mipui tân tui in tûr a awm lo va.

²Mite chuan Mosia chu an nawr a, “Tui in tûr min pe rawh,” an ti a. Mite chuan Mosia chu an mawhchhiat a.

³Mite tui chu a hâl êm êm a, Mosia chungah an phunnawi a; “Engah nge tuihâla thi mai tûrin Aigupta ram aṭang khân kan fate leh kan rante nên min lo hruai chhuah le?” an ti a.

⁴Mosian LALPA chu a au va, “Hêng mite tân hian eng nge ka tih tâk ang? Lungin min dêng hlum mai dâwn e,” a ti a.

⁵LALPA chuan Mosia hnênah, “Israel upaho hruai la, Nail luipui i vuakna tiang kha kengin mipui hmaah kal ang che.

⁶I hmaah Horeb tlânga lungpui bulah ka lo ding ang; lung chu i vua ang a, mipuite in tûr tui a lo chik chhuak ang,” a ti a. Israel upate hnênah Mosian chutiang chuan a ti a.

⁷Chu hmun hmingah chuan Maasa tih leh Meriba tih a sa a; Israel faten an nawr avâng leh, ‘Kan zîngah LALPA a tel meuh nge tel meuh lo,’ tia LALPA an fiah avângin.

⁸Refidim-ah chuan Amalek-ho an lo kal a, Israel-te chu an rawn bei a.

⁹Mosia chuan Josua hnênah, “Mi ṭhenkhat thlang la, Amalek-ho bei tûrin kal rawh. Naktûkah chuan tlângchhîpah Pathian tiang kengin ka lo ding ang,” a ti a.

¹⁰Mosia sawi ang chuan Josua chuan Amalek-ho chu a bei a; Mosia chu Arona leh Hura nên tlângchhîpah an chho va.

¹¹Mosian a bân a han phar chuan Israel-ho chu an chak a, a bân a lâk thlâk chuan Amalek-ho chu an chak a.

¹²Mosia bân chu a kham ta hle a, lungtum an rawn la a, Mosia chu a chungah an ṭhuttîr a, Arona leh Hura chuan Mosia bân chu lehlam lehlamah an chelh kânsak a, ni tlâk hma chu a bân a phar thei ta a.

¹³Amaleka leh a mite chu Josua chuan khandaihin a sawisa nek a.

¹⁴LALPA chuan Mosia hnênah, “He thu hi hriat reng atân lehkhabu-ah ziak rawh. Vân hnuaia tu ma hriat zui loh tûrin Amalek-ho chu ka sawisa dâwn tih Josua hrilh rawh,” a ti a.

¹⁵Mosia chuan maichâm a siam a, a hmingah LALPA Nisi a vuah a.

¹⁶“LALPA puanzâr chu lek sâng rawh u; LALPA chuan Amalek-ho chu eng lai pawhin a bei reng dâwn a ni,” a ti a.