Read Mizo Lushai Exodus 18 Bible Online

Exodus 18 - Mizo Lushai bible

Exodus 18

¹Midian-ho puithiam, Jethroa, Mosia puzawn chuan, Mosia leh a mite tâna Pathianin thil a tihsak, LALPA ngeiin Israel-te Aigupta ram ata a hruai chhuah thute chu a lo hria a.

²Mosia puzawn Jethroa chuan Mosia nupui Zipori, in lama a hnutchhiah kha, a fapa pahnih nên a rawn hruai a.

³A fapa upa zâwk chu Gersoma a ni, ‘ram dangah mikhual ka ni’ a tihna a ni.

⁴Pakhat zâwk hming chu Eliezara a ni, ‘ka pate Pathian chuan min pui ta a, Farawa khandaih lakah min chhanhim’ a tihna a ni.

⁵Pathian tlângah, bûk an khuarnaah chuan, Mosia puzawn chuan a fapa pahnih leh a nupui chu a rawn hruaisak a.

⁶Mosia hnênah, “Kei i puzawn, Jethroa hian ka rawn tlawh dâwn a che, i fapa pahnih leh i nupui pawh ka rawn hruai e,” a rawn ti a.

⁷Mosia chu a puzawn hmuak tûrin a chhuak a, a kûn a, chibai a bûk a, an dam leh dam loh te an inzâwt a; puan inah chuan an lût dûn ta a.

⁸Israel-te avânga Farawa leh Aigupta mite chunga LALPA thil tih zawng zawng chu Mosian a puzawn chu a hrilh a; kalkawnga harsatna an tawh laka LALPA chuan a chhanhim ṭhin dânte pawh a hrilh a.

⁹Aigupta mite kut ata leh Farawa kut ata Israel-te a chhan chhuak a, an chunga a ṭhat êm avângin LALPA chungah chuan Jethroa chu a lâwm ta êm êm a.

¹⁰“Aigupta mite kut ata leh Farawa kut ata chhanchhuaktu che u LALPA chu fakin awm rawh se.

¹¹Israel mite chuti taka hmusita an sawisak lai a chhan tâk avângin LALPA chu pathian dang zawng zawng aiin a ropui zâwk tih ka hre ta,” a ti a.

¹²Mosia puzawn Jethroa chuan Pathian hnênah hâlral thilhlan leh inthawinate a hlân a. Arona leh Israel upa zawng zawngte chu Pathian hmaa Mosia puzawn inthawina chawhlui kîl tûr chuan an lo kal a.

¹³A tûkah chuan Mosia chu mite thu rem tûrin a ṭhu a, mite chuan Mosia chu zîng aṭangin tlai thlengin an din hual a.

¹⁴Mosia puzawn chuan mipui ro a rêlsak dân chu a hmu a, “Engtizia nge mipui tân hetianga ro i rêl? Nangmah vekin rêl tumin i ṭhu a, zîng aṭanga tlai thlengin an din hual che hi,” a ti a.

¹⁵Mosian a puzawn hnênah chuan, “Pathian râwn tûrin mite hi ka hnênah an lo kal alâwm.

¹⁶Thu pawi an neihin ka hnênah an rawn thlen miau si ṭhîn a, an ṭhenawmte nêna an inkâr thu ka lo rêl felsak ṭhîn a ni. Pathian thuruatte leh a dânte ka lo hrilh ṭhîn a ni,” a ti a.

¹⁷Mosia puzawn chuan, “I thil tih dân hi a ṭha hauh lo mai.

¹⁸Nang leh hêng mite hi in intichau ngei ang; he hna hi i tân a hautak lutuk, nangmah mai chuan i thawk sêng lo vang.

¹⁹Ka thu hi ngaithla la, thurâwn ka han pe ang che a, Pathianin a awmpui ang che. Mipui aiawha Pathian hnêna kala, an thu Pathian hnêna thlentu tûr i ni.

²⁰Pathian thuruatte leh a dânte chu i zirtîr ang a, an awm dân tûr leh an tih tûr i kawhhmuh ṭhîn tûr a ni.

²¹Mipui zîng ata mi fel deuh deuh, Pathian ṭih mi, thu dik ngaina, hlêprûk haw mi thlang chhuak la, sâng chin chunga rorêl tûr te, za chin chunga rorêl tûr te, sawmnga chin chunga rorêl tûr te, sâwm chin chunga rorêl tûr te ruat rawh.

²²Chûng chu rorêltu nghet ni rawh se, thu tênau chu rêl zêl sela, thu lian deuh erawh chu i hnên lo thleng ṭhîn rawh se; tichuan, an chhâwk zâng ang chia, i hahdam deuh thei ang.

²³Pathian thupêk anga chutianga i tih chuan i intichau lo vang a, mipui lah an zângkhai ang a, an thu an rem fel thuai thuai ang a, an haw mai thei ṭhîn ang,” a ti a.

²⁴Tichuan, a puzawn thu chu Mosia chuan a zâwm a, a sawi ang chuan a ti ta a.

²⁵Israel-te zînga a fel fel Mosian a thlang chhuak a, mipuite hotu-ah a ruat a; sâng hotu tûr te, za hotu tûr te, sawmnga hotu tûr te, sâwm hotu tûr te a ruat ta a.

²⁶Eng lai pawhin mite chu ro an rêlsak a, thu lian erawh chu Mosia hnênah an thlen a, thu tenau chu an rêl fel mai a ni.

²⁷Mosia chuan a puzawn chu a va thlah a, Jethroa chu an ram lamah a haw leh ta a.