Read Mizo Lushai Exodus 19 Bible Online

Exodus 19 - Mizo Lushai bible

Exodus 19

¹Aigupta ram an chhuahsan aṭanga thla thumna, ni khat ni chuan, Israel fate chuan Sinai thlalêr an thleng a.

²Refidim aṭanga lo thleng an ni, tlâng bul thlalêr ramah chuan bûk an khuar a, Mosia chu Pathian tâwk tûrin tlângah chuan a lâwn chho va.

³Tlâng aṭangin LALPA chuan a rawn ko va, “Jakoba chhûngte bia la, Israel fate chu hrilh rawh:

⁴Aigupta mite ka sawisak dân in hmu a, thla zârin mupuiin a notê a chawi angin ka chawi che u a, keima tân ka hruai chhuak che u a.

⁵Chuvângin, ka aw in ngaihthlâk duh takmeuhva, ka thuthlung in vawn dâwn phawt chuan mi zawng zawng zînga ka ro hlu bîk in ni ang, khawvêl ram zawng zawng hi ka ta a ni si a.

⁶Ka tân hnam serh hran, puithiam in ni ang. Chûng chu Israel fate i hrilh tûr chu a ni,” a ti a.

⁷Mosia chu tlâng ata chu a lo chhuk a, Israel upaho chu a ko va, LALPA thupêk angin chûng thu chu a hrilh a.

⁸Mi zawng zawng chuan, “LALPA sawi apiang chu kan ti ang,” an ti tlâng a. Mipui thu chu Mosian LALPA a hrilh chhâwng a.

⁹LALPA chuan Mosia hnênah, “Ngai rawh, chhûm chhah takah i hnênah ka lo kal dâwn, i hnêna thu ka sawi lai miin an lo hria ang a, nang pawh kumkhuain an rin phah ang che,” a ti a. Mosian mipuite chhânna chu LALPA a hrilh a.

¹⁰LALPA chuan Mosia hnênah, “Mite hnênah kal la, vawiinah leh naktûkah anni chu thian thianghlim ang che; an silhfênte su fai sela.

¹¹A ni thum ni atân inpeih vek rawh se; a ni thum ni chuan mipui hmuh tûrin Sinai tlângah LALPA chu a lo chhuk dâwn a ni.

¹²Tlâng hualin ri i kham kualsak tûr a ni. Tlâng va rap lo tûrin fîmkhur rawh se; a bul hnaiah pawh kal suh u; tlâng va rap chu tihhlum tûr a ni.

¹³Chumi chin chu tu man an khawih tûr a ni lo; lunga den hlum emaw, thala kah hlum tûr emaw a ni; hei hian mihring pawh ran pawh a huam a ni; tihhlum tûr an ni. Nimahsela, tawtawrâwt a rîk hunah mipui chuan tlâng chu an lo thleng tûr a ni,” a ti a.

¹⁴Mosia chu tlâng aṭang chuan a chhuk a, mipui chu a thian thianghlim a, an silhfênte chu an su fai a.

¹⁵Mipui hnênah, “Ni thum ni atân inpeih rawh u, in nupuite bulah mu suh ang che u,” a ti a.

¹⁶A ni thum ni zîngah chuan khawpui a ri dur dur a, kâwlte a phe a, tlâng chu chhûm chhah takin a khuh tlat a; tawtawrâwt a ri ruai ruai bawk a, mi zawng zawng chu hlauvin an khûr a.

¹⁷Pathian tâwk tûrin mite chu bûk aṭang chuan Mosia chuan a hruai chhuak a, tlâng bulṭhutah chuan an ding a.

¹⁸Sinai tlângah LALPA chu mei nên a lo chhuk avângin a khu vung vung a, rawhtuina meipui khu ang maiin a khu a, tlâng chu a nghîng hluk hluk a.

¹⁹Tawtawrâwt chu a ri ring tial tial a, Mosia chuan thu a sawi a. Pathian chuan khawpui riin a rawn chhâng a.

²⁰LALPA chu Sinai tlângchhîpah chuan a lo chhuk a; tlângchhîpa chho tûrin Mosia chu LALPA chuan a ko va; Mosia chu a chho ta a.

²¹LALPA chuan Mosia hnênah, “Chhuk la, LALPA hmêl hmuh tumin mipuiin ri kham kha rawn kân suh se, an kân vaih chuan mi tam tak an thi ang.

²²LALPA hmaa kal ṭhîn puithiamte pawh an inthian thianghlim tûr a ni; chutilo chu, ka rawn hrem ngei ang,” a ti a.

²³Mosia chuan LALPA hnênah, “Mipuite chuan Sinai tlâng an rap thei hlei nêm, ‘tlâng hualin ri kham ula, serh thianghlim rawh u,’ min tih kha,” a ti a.

²⁴LALPA chuan a hnênah, “Chhuk ta la, Arona nên lo chho leh rawh u; puithiamte leh mipuite chuan ri kham khu LALPA panin rawn kân suh se; an kân chuan ka lo sawisa mai ang,” a ti a.

²⁵Tichuan, Mosia chu mipui awmnaah chuan a chhuk a, chûng thu chu a hrilh a.