Read Mizo Lushai Exodus 2 Bible Online

Exodus 2 - Mizo Lushai bible

Exodus 2

¹Levia chia mi tlangvâl pakhatin Levia chi bawk nula nupuiah a nei a.

²Hmeichhia chuan nau a pai a, fapa a hring a. Nau duhawm tak a nih avângin thla thum chhûng chu a thukru a.

³A thuhrûk reng theih tâk loh hnuah chuan rairuang bâwm a la a, hlum a bel a, alkatra-in a zût phui a, a chhûngah chuan nau chu a dah a, luipui kama rairuang buk zîngah chuan a dah a.

⁴Engtin nge a awm zêl tih thlîrin hla fêah a farnu chu a ding reng a.

⁵Farawa fanu chu a ṭhuihruaite nên inbual tûrin luiah chuan an chhuk a, lui kamah chuan an kal a, rairuang zînga bâwm dah chu a hmu a; a chhiahhlawh nula chu a lâktîr a.

⁶A han hawng a, nautê a lo ni a; nausên chu a ṭap ta a. A khawngaih ta êm êm a, “Hebrai mi fa a ni phawt mai,” a ti a.

⁷A farnu chuan Farawa fanu hnênah chuan, “Hebrai hmeichhia, nau awm thiam ka va kohsak ang che chu, a awmsak dâwn che nia,” a ti a.

⁸Farawa fanu chuan, “Va ko ta che,” a ti a. Hmeichhe naupang chuan naute nu chu a ko va.

⁹Farawa fanu chuan hetiang hian a lo ti a, “He naute hi hâwn la, min pawmtlei sak rawh; hlawh ka pe ang che,” a ti a. Chu nu chuan nausên chu a la a, a pawm ta a.

¹⁰Nau chu a lo ṭhang lian a, Farawa fanu hnênah chuan a hruai a; ani chuan fapaah a lo nei ta a, “Tui aṭanga ka lâk chhuah a nih hi,” tiin a hmingah Mosia a sa a.

¹¹Mosia chu a lo tlangvâl ta a. Ni khat chu a unaute hnênah a va lêng a, an thawh rimzia chu a va hmu a; a unau zînga Hebrai mi pakhat Aigupta miin a lo vua chu a hmu a.

¹²Lehlam lehlam a han hawi a, tu mahin an hmu lo nia a hriat chuan Aigupta mi chu a that a, ṭiau vaivutah a phûm ta a.

¹³A tûkah chuan a va kal leh a, Hebrai mi pahnih hi an lo insual a. A tisual hmasa zâwktu hnênah chuan, “Engtizia nge i unaupa i sual mai le?” a ti a.

¹⁴Ani chuan, “Tu nge kan chunga rorêla thuneitu atân ruat che? Aigupta mi i thah ang khân min thah i tum elo?” a ti a. Mosia chuan a hlauthâwng ta hle a. “Mi an lo hria a ni phawt mai,” a ti a.

¹⁵Faraw-an a lo hriat chuan Mosia chu thah a tum ta a. Farawa hmuh loh tûrin Mosia chu a tlân bo ta a; Midian mite ram a va thleng a, tuichhunchhuah bulah a ṭhu chawt a.

¹⁶Midian puithiam chuan fanu pasarih a nei a; tui an rawn chawi a, an pa berâm rual in tûr ran tuikuangah an chhûng khat ṭhîn a.

¹⁷Berâmpu dang an lo kal a, an rawn hnawt a. Mosia chuan a lo chhan a; an berâmte chu tui a intîr ta a.

¹⁸An pa Reuela hnên an thlen chuan, “Vawiin chu engtizia nge in va lo thleng hma ve,” a lo ti a.

¹⁹Anni chuan, “Aigupta mi, mi pakhatin Berâmpuho lakah min chhan a, amah ngeiin tui a chawi a, rante chu tui a pe atin a ni,” an ti a.

²⁰A fanute hnênah chuan, “Khawiah nge a awm tâk? Engtizia nge in kalsan mai le? Va ko teh u, chaw te ei ve teh se,” a ti a.

²¹Chu mi hnêna awm chu Mosia chuan a remti ta a. Mosia chu a fanu Zipori nupuiah a neihtîr a.

²²Ani chuan fapa a hrinsak a, “Mikhual, ram dang mi ka nih hi,” tiin a hmingah Gersoma a sa a.

²³Rei fe hnuah chuan Aigupta lal chu a thi a; Israel fate chu bawih nihna phurrit avâng chuan an rûm a, ṭanpui dila an au thâwm chu Pathian hnênah a han thleng a.

²⁴Pathian chuan an rûm chu a lo hria a; Abrahama te, Isaka te, Jakoba te hnêna a thuthlung kha a la hre reng a,

²⁵Pathian chuan Israel fate dinhmun chu a hmu a, a ngaihsak hle a.