Read Mizo Lushai Exodus 21 Bible Online

Exodus 21 - Mizo Lushai bible

Exodus 21

¹“Hêng dânte hi Israel-te zawm atân pe rawh.

²Hebrai mi bawihah an lei chuan kum ruk chhûng bawihah a ṭang ang a, a kum sarih kum chuan man lova chhuah tûr a ni.

³Amah maia lei a nih chuan amah chu a chhuak ang a, a nupui nêna lei a nih chuan a nupui nên chuan an chhuak tûr a ni.

⁴A puin nupui a neihsaka, fanu fapa an hrin chuan, a nupui fanaute chu a pu ta an ni; ani erawh chu amah chauhvin a chhuak thei ang.

⁵‘Ka pu hi ka ngaina a, ka nupui fanaute ka hmangaih bawk si a, ka chhuahsan lo mai ang,’ a tih tlat chuan,

⁶a pu chuan Pathian inah a rawn hruai ang a, kawngkaah, kawngka biang bulah chuan a dintîr ang a, thîr zumin a beng a verhsak ang a, kumkhuain bawih a ni tawh ang.

⁷“Miin a fanu bawihan hralh sela, mipa anga chhuah ve tûr a ni lo.

⁸A nupui atâna lei a niha, a duh leh si lo a nih chuan, a pa chu a tlantîr leh tûr a ni; a bum avângin mi dang hnêna a hralh a thiang lo.

⁹A fapa nupui atân lei a nih chuan a fanu angin a en tûr a ni.

¹⁰A fapa chu nupui dang a neihsak chuan a nupui lei hmasak chu a châwm man te, a silhfên man te leh a chan ai thil dangte pawh a tihtlêmsak tûr a ni lo.

¹¹Hêng thil pathum hi a tihsak loh chuan man lovin a chhuah tûr a ni.

¹²“Miin mi dang vua sela, a vuaka chu a thih chuan ani pawh chu tihhlum ngei tûr a ni.

¹³Tum rêng ni lova vaw hlum palh a nih chuan a tân himna tûr hmun ka ruatah chuan a sa him nân tlân rawh se.

¹⁴Him nân ka maichâmah tlân suh se, thinura, tum râna mi dang that chu hnuh chhuaha, tihhlum tûr a ni.

¹⁵“Mahni nu chungah emaw, pa chungah emaw kutthlâk chu tihhlum tûr a ni.

¹⁶“Hralh atân emaw, ama bawih atân emaw mihring rutu chu tihhlum tûr a ni.

¹⁷“A nu emaw, a pa emaw ânchhia lawhtu chu tihhlum tûr a ni.

¹⁸“Mi insual sela, pakhat zâwk chuan lungtumin chhu sela emaw, kuttumin emaw hnek sela, a thih loh chuan hrem tûr a ni lo.

¹⁹Sila khum beta a nata, tiang hawla khawlai a lên leh theih chuan a sil chhûnga a tha ai chu a tisiltu chuan a dam vâr thlengin a rûl tûr a ni.

²⁰Miin a bawihpa emaw, a bawihnu emaw tiangin vua se, a vuak hlum chuan hrem ngei tûr a ni,

²¹ni hnih khat a dam erawh chuan an pu chu hrem tûr a ni lo, sum a chân ta tihna a ni.

²²“Mi an insuala, hmeichhe nau pai an khawih chuan, amah chu hliam lo mah se a nau pai chu a tlâk chuan hmeichhe pasal phût zât, rorêltu remtihpuiin chawitîr tûr a ni.

²³Hmeichhia chuan hliam a tuar chuan nun aiah nun,

²⁴mit aiah mit, hâ aiah hâ, kut aiah kut, ke aiah ke,

²⁵mei kan aiah mei kan, hliam aiah hliam, vuak aiah vuak tuartîr tûr a ni.

²⁶“Miin a bawihpa mit emaw, a bawihnu mit emaw vuak delsak sela, a mit chhiat manah a chhuah tûr a ni.

²⁷An hâ a tihbalsak pawhin an ha manah a chhuah tûr a ni.

²⁸“Bâwngpain mipa pawh, hmeichhia pawh si hlum sela, bâwng chu lunga den hlum tûr a ni, a sa chu ei tûr a ni lo; bâwng neitupa chu khawih zui tûr a ni lo.

²⁹Bâwng chuan mi sîk a lo chîna, a neitupa chu an lo hrilh tawh ṭhina, thlung ṭha duh lova, mipa emaw, hmeichhia emaw a sîk hlum chuan bâwng chu lunga den hlum tûr a ni; a neitupa pawh tihhlum tûr a ni.

³⁰“Amaherawhchu, a neitupa chu a nun tlan an phalsak chuan a nun tlanna tûr an tuk zât zât chu a pe tûr a ni.

³¹Bâwng chuan naupang, mipa emaw, hmeichhia emaw si hlum sela, puitling si hlum ang bawka rêl tûr a ni,

³²bawihpa emaw bawihnu emaw si hlum sela, a neitu chuan tangka bûk sawmthum a chawi tûr a ni, a situ bâwng pawh den hlum tûr a ni.

³³“Miin khur chhîn a hawn emaw, khur thar a laihin emaw, a chhin leh lohva, bâwngpa emaw, sabengtung emaw a tlâk hlum chuan,

³⁴khur laitu chuan a chawi tûr a ni; a man a pêk hnuah erawh chuan a sa chu a nei thei ang.

³⁵“Mi pakhat bâwngpa mi dang bâwngpain a tihhlum chuan a tihlumtu bâwngpa chu hralh tûr a ni, a man chu an insem ang a, a thi sa pawh an insem tûr a ni.

³⁶“Bâwngpa chuan tûn hmaa mi sîk a chîn ṭhina, a neitu chuan thlung ṭha lo ni sela, a sîk hlum bâwngpa chu bâwngpa vêkin a rûl tûr a ni, a sa erawh chu a nei thei ang.