Read Mizo Lushai Exodus 22 Bible Online

Exodus 22 - Mizo Lushai bible

Exodus 22

¹“Miin bâwngpa emaw, berâm emaw a rûka, a talh emaw, a hralh emaw a nih chuan bâwngpa chu a lêt ngain a rûl ang a, berâm chu a lêt liin a rûl tûr a ni.

²A thil rûk chu a rûl ngei tûr a ni, rulhna a neih loh chuan a thil rûk rulh nân amah chu bawiha hralh tûr a ni. Bâwngpa emaw, sabengtung emaw, berâm emaw a rûk chu an la dam chuan a leh hnihin a rûl tûr a ni. “Rûkru, zâna lût chu lo manin lo vaw hlum pawh ni se tual that a tling lo. Ni chhuah hnua tih a nih erawh chuan tual that a tling a ni.

⁵Miin a ran a chhuaha, mi lovah emaw, grep hmunah emaw tla-in mi lova thlai chu ei chhia sela, a ei chhiat zât chu a ran neitupa chuan ama thlaiin emaw, grepin emaw a rûl tûr a ni.

⁶“Miin ramah mei chhêm sela, ram kâng chuan mi lo kâng kaiin buh ding lai emaw, zai tawh dah khâwm emaw kâng sela, mei chhuahtu chuan a kâng chhia chu a rûl tûr a ni.

⁷“Miin mi dang pawisa emaw, thil man tam tham emaw kawlsak sela, a kawl chhûng chuan bo ta sela, rûkru tih a niha, rûkru chu man a nih chuan a rutu chuan a lêt hnihin a rûl tûr a ni.

⁸A rutu man a nih loh erawh chuan a kawltu chu rorêltu hmaah hruai tûr a ni a, a ru lo tih hriat nân chhia a chhamtîr tûr a ni.

⁹“Thil inchuh rêng rêng, bâwngpa emaw, silhfên emaw, thil hloh chhar emaw a inchuhate chu rorêltu hmaa hruai tûr a ni. Rorêltuin thiam zâwka a ruat chu a thiam lo zâwk chuan a lêt hnih a pe tûr a ni.

¹⁰“Miin sabengtung emaw, bâwngpa emaw, berâm emaw, ran dang emaw, a ṭhianpa enkawltîr sela, lo thi palhin emaw, hliam emaw lo tuarin emaw, suamhmang rualin an chhuhsak emaw ni sela, hretu dang an awm si loh chuan

¹¹a kawltu chu biak inah hruai tûr a ni, a ṭhianpa ran chu a rûk a ni lo tih hriat nân chhia a chham tûr a ni. Ran chu a rûk a nih loh chuan a neitu khân a chân mai ang a, a kawltu khân a rulh a ngai lo.

¹²A rûk a nih erawh chuan a rûl tûr a ni.

¹³Sa seh a nih chuan a ei bâng ṭhenkhat, sa seh a nih hriatna a rawn la tûr a ni, sa seh chu a rulh a ngai lo.

¹⁴Miin mi dang ran a chhawr hawha, a neitu hmuh lohva inhliam emaw, thi palh emaw a nih chuan a hawhtu chuan a rûl tûr a ni.

¹⁵A neitu chuan a hmuh ve reng erawh chuan a rulh a ngai lo. Man neia hawh a nih pawhin, a hawh man chuan a huam a ni.

¹⁶“Nula hnahkhat, tu ma la hual loh miin a ngaih chuan, nupui man pangngai a pe ang a, nupuiah a nei tûr a ni.

¹⁷Nula pain neih a phal tlat loh pawhin nula hnahkhat man pangngai a pe tho tûr a ni.

¹⁸“Mitthi thlûk chîng hmeichhia chu tihhlum tûr a ni.

¹⁹“Ran rîmtu chu tihhlum tûr a ni.

²⁰“LALPA hnênah ni lo, pathian dang hnêna inthawi chu tihboral daih tûr a ni.

²¹“In zînga hnam dang awm vete in tinawmnahin in tiduhdah tûr a ni lo; nangni pawh Aigupta ramah mikhuala in awm kha.

²²Hmeithai emaw, fahrah emaw in tinawmnah tûr a ni lo.

²³In tihduhdah vaih chuan kei LALPA hian an mangang au chu ka lo ngaithla ang a,

²⁴ka thin a ur ang a, khandaiha sah hlum in ni ngei ang; in nupuite chu an hmeithai ang a, in fate pawh an fahrah ang.

²⁵“Ka mite chu an retheih avânga tangka i pûktîr chuan tangka pûktîrtu dangte angin ti suh; a pung i ṭhîng tûr a ni lo.

²⁶I vêngte puan dahkhama i hrên chuan ni a tlâkah i pe kîr leh tûr a ni.

²⁷A mut huna intuamlumna a neih chhun a ni a; i pêk kîr loh chuan a mangang ka hnênah a lo au vang a, ka lo chhâng ngei ang, ka khawngaih ngei dâwn a ni.

²⁸Pathian ânkhum suh; in chunga rorêltu pawh ânchhia lawh suh.

²⁹“I thlai rah i seng zawhah, oliv hriak i sâwr zawh chuan min pêk tûr ang chu min pe thuai ang che.

³⁰“I fapa hrin hmasak ber chu min pe tûr a ni. Chutiang bawkin i bâwng leh berâm no neih hmasak ber chu min pe tûr a ni; a pui hnute ni sarih a hne ang a, a ni riat ni chuan mi rawn pe tûr a ni.

³¹“Ka mite in ni a, in thianghlim tûr a ni; chuvângin, rama sa seh sa rêng rêng in ei tûr a ni lo, ui pe ang che u.