Read Mizo Lushai Exodus 23 Bible Online

Exodus 23 - Mizo Lushai bible

Exodus 23

¹“Dâwt thuthang mai mai pu darh suh la; mi sual chhan tûrin thu dik lo sawi suh.

²Thil sual ti tûr chuan, a tam lam pawh ni se, zui suh la; dâwta mi dang thiam loh an chantîrnaah pawh tel hek suh la,

³rorêlna hmunah mi rethei ṭan bîk suh.

⁴“I hmêlma bâwngpa emaw, sabengtung emaw tlân bo i hmuh chuan i kaih hâwnsak ngei tûr a ni.

⁵I mi huatzâwng tak pawh ni se a sabengtung chu a phurin lo delh sela, i kaihthawhsak tûr a ni, i kal pêl mai tûr a ni lo.

⁶“Mi rethei pawh, a thu chu dik takin i ngaihtuahsak tûr a ni.

⁷Dâwtin mi hek suh la, thiam lohna nei lo chu tihlum suh; chutiang ti apiang chu thiam loh ka chantîr ang.

⁸Thamna la suh, thamna chuan thil dik lakah mit a tidel ṭhîn a, mi dikte thu pawh a tichingpen ṭhîn,

⁹Ram dang mi i tiduhdah tûr a ni lo; nang pawh Aigupta ramah khân ram dang mi i ni tawh a, a hrehawmzia i hriat kha.

¹⁰“I lo chu kum ruk Chhûng nei la, a thar apiang seng ang che.

¹¹A kum sarih kum erawh chuan i chawlhtîr tûr a ni. Chumi kum chhûnga seng tûr awm chu i hauh tûr a ni lo. Mi retheiten an chang ve tûr a ni; mi retheiho lâk bâng chu ramsain an tlân tûr a ni. Chutiang bawkin i grep leh oliv hmun chu i ti tûr a ni.

¹²“Ni ruk chhûng hna thawk la, a ni sarih ni erawh chuan i châwl tûr a ni; i bâwng te, i sabengtungte pawh an châwl tûr a ni. I bawihnute leh hnam dang hlawha i chhawrte pawh an châwl hahdam tûr a ni.

¹³“In hnêna ka sawi apiang pawisa rawh u, Pathian dang hming rêng rêng lam suh u, a sawi pawh sawi ri suh u.

¹⁴“Min chawimawi nân kum khatah vawi thum kût hmang rawh u.

¹⁵Abib thla, ka hun ruatah, chhang dawidim telh loh kût hmang ula, ni sarih chhûng dawidim telh loh chhang ei ang che u. Hemi hun hian Aigupta ram ata in lo chhuak a; chuvângin, ka hmaah tu mah kut ruakin in lo kal tûr a ni lo.

¹⁶Thlai thar hmasa thlai thar kût hmang ula, kum tâwpah in thil chîn zawng zawng in seng zawh hunah Pâwl Kût hmang bawk ang che u.

¹⁷In zînga mipa zawng zawng kum khatah vawi thum LALPA Pathian hmaah in lo lang tûr a ni.

¹⁸“Dawidim telh chhang chu ka hnênah i thilhlan ran thisen nên i hlân tûr a ni lo. Inthawina ran hlan thau chu a tûk thlenga dah tûr a ni lo.

¹⁹In rama thlai rah hmasa, a ṭha ṭha chu, LALPA i Pathian inah i rawn la tûr a ni. Kêlnote chu a pui hnutein chhûm suh.

²⁰“Ngai teh, kawnga vêng tûr che leh ka hmun ruata hruai thleng tûr chein in hmahruaitu tûr vântirhkoh ka tîr a.

²¹A thu pawisa ula, ngaithla ṭhîn rawh u; ka tirh a ni asin. Amah chu dodâl suh u; chutilo chuan in bawhchhiatnate a ngaidam lo vang.

²²“A thu in zawma ka sawi zawng zawng hi in tih chuan in hmêlmate hmêlma, a dotu che u dotu ka ni ang.

²³Ka vântirhkoh chuan in hma a hruai ang a, Amor mi te, Hit mi te, Periz mi te, Kanan mi te, Hiv mi te, Jebus mi te ramah a hruai lût ang che u: anni chu ka tiboral dâwn a ni.

²⁴An pathiante chu kûnin chibai in bûk ve tûr a ni lo va, an tih ang in ti ve tûr a ni hek lo; an pathiante chu in tichhe vek tûr a ni a; an thil phunte pawh tichhe vek ang che u.

²⁵LALPA, in Pathian chu chibai min bûk chuan ruahtuiah leh buhbâlah mal ka sâwm ang che u a, in zîng ata natna ka la bo bawk ang.

²⁶In rama nu tu mahin nau an chhiat lo vang a, ching an awm hek lo vang; in nun pawh ka tisei ang.

²⁷“In kalna tûr mite chu ka tithlabâr ang a, an chiai ang a, in hmêlmate chu in hmaah ka tlânchhiattîr ang.

²⁸An hmaah khawinghal ka tîr ang a, Hiv mi te, Kanan mi te, Hit mi te chu an ûm darh ang.

²⁹Kum khat chhûng maiin ka hnawt chhuak vek lo vang; an chhuah mai chuan engkim a ram chhe hman ang a, in tâna hnawk tham ram sakawlh pawh an pung hman ang.

³⁰Ram pum luah tham in awm hma chu zawi zawiin ka hnawt chhuak chauh vang.

³¹In ram chu Tuipui Sen aṭanga Filistia-ho tuifinriat inkâr leh, thlalêr aṭanga Eufretis lui inkâr hi a ni ang. Chu rama chêngte chu in hneh vek ang a, ka hnawh chhuahtîr ang che u.

³²Anni nên chuan thu in thlung tûr a ni lo, an pathiante pawh in ṭâwm tûr a ni hek lo.

³³In ramah chuan hêng mite hi in awmtîr tûr a ni lo; ka lakah thil sual an tihtîr dah ang che u; an pathiante chibai in bûk ve vaih chuan in chhiatpui ang.”