Read Mizo Lushai Exodus 25 Bible Online

Exodus 25 - Mizo Lushai bible

Exodus 25

¹ LALPA chuan Mosia hnênah,

²“Israel fate chu thilpêk ka hnêna rawn hlân tûrin hrilh rawh. An phal ang ang rawn la rawh se.

³Rangkachak te, tangkarua te, dâr te,

⁴la dumpâwl te leh a sen te, la senlâr leh zai sîn te, kêl hmul te,

⁵berâm vun tihsen te, savun ṭha chi te; sitim thing te,

⁶chhit atân hriak te, hriak thiha telh tûr leh hâla telh tûr thil rimtui te;

⁷Efod leh âwmbela bel tûr Soham lung leh lungmantam te rawn keng rawh se.

⁸An zînga ka chên ve theih nân biakbûk min siamsak rawh se.

⁹Biakbûk chu a chhûng chei dân tûr nên lam a lem ka entîr che kha, khami ang chiah khân in sa tûr a ni.

¹⁰“Sitim thingin bâwm, a dung tawng hnih leh a chanve, a vâng tawng khat leh a chanve, a sân lam tawng khat leh a chanve in siam tûr a ni.

¹¹A pâwn lam leh chhûng lam chu rangkachak ṭha chiin in luan ang a, a tlâng chu rangkachak hlang ngatin in tuam chhuak bawk tûr a ni.

¹²Rangkachak beng pali siam ula, a ke pali-ah chuan vuah ang che u, lehlam lehlamah beng pahnih ve ve vuah ang che u.

¹³Sitim thingtlâwn pahnih siam ula, rangkachakin luan bawk rawh u.

¹⁴Sitim thingtlâwn chu bâwm zâwn nân a sîr bengah chuan rawlh ve ve ang che u.

¹⁵Thingtlâwn chu bâwmah chuan vuah reng tûr a ni a, lak sawn tûr a ni lo.

¹⁶Lungphêka thupêk ziak ka pêk tûr che chu a chhûngah dah ang che.

¹⁷Bâwm khuhna atân a dung tawng hnih leh a chanve, a vâng tawng khat leh a chanve, rangkachak hlîr phêk siam la.

¹⁸Cherub lem pahnih, rangkachaka siam, a chhera chher ngei, a chhîn hmâwr tawna dah tûr siam bawk ang che;

¹⁹a chhîn rangkachak nên a hmâwra rangkachak cherub lem awm chu sakhat a ni tûr a ni.

²⁰Cherub-te chu an inhawitawn ang a, an thla an zâr ang a, bâwm chhîn chu a khuh vek tûr a ni.

²¹Bâwm chhûngah lungphêk pahnih ka pêk tûr che chu dah la, a chhîn chuan i khuh dâwn nia.

²²Bâwm bulah chuan kan intâwk ṭhîn ang a, cherub pahnih, Thuthlung Bâwm chunga awm inkâr aṭang chuan ka rawn bia ang che a, Israel-te hnêna thu ka pêk tûr zawng zawng chu ka rawn hrilh ṭhîn ang che.

²³“Sitim thingphêkin dawhkân i siam bawk tûr a ni; a dung tawng hnih, a vâng tawng khat, a sân lam tawng khat leh a chanve.

²⁴Rangkachak hlangin luan chhuak la, a tlâng chu rangkachakin kâwm rawh.

²⁵Zung li bawka hlai a sîr kâwmna siam la, a tlâng chu rangkachakin kâwm rawh.

²⁶“Rangkachak beng pali siam bawk la, a ke awmna kilah vuah thliah ang che.

²⁷A zâwnfung rawlhna tûr beng chu a tlâng kâwmna bulah dah ang che.

²⁸Thing tlâwn, zâwnfung tûr, siam la, rangkachak luan ang che.

²⁹Thlêng te, bêl te, uain thâwl te, uain bunna tûr note rangkachak hlangin siam tûr a ni.

³⁰Dawhkân chu Thuthlung Bâwm bulah hûn tûr a ni. Ka hmaa dawhkânah chuan chhang serh a awm reng tûr a ni.

³¹“Khâwnvâr dahna rangkachak hlîr hlakin i siam tûr a ni. A ngul leh a bul vâwng chu a chhera chher tûr a ni; a lu bâwk te, a chei mawina pangpâr kuhmûm leh pâr parh lemte nên chuan a inzawm vek tûr a ni.

³²A kûngpui pêng aṭangin zâr paruk a pêng ang a, lehlam lehlamah zâr pathum ve ve.

³³Zâr tinah a cheimawi nân theite pâr kuhmûm leh a pâr parh lem pathum zêl a awm tûr a ni.

³⁴khâwnvâr ngul zidingah chuan a cheimawina theite pâr kuhmûm leh pâr parh lem pali a awm tûr a ni.

³⁵A zâr chung zâwk leh hnuai zâwk inkârah pangpâr kuhmûm pakhat zêl a awm bawk tûr a ni.

³⁶Pangpâr kuhmûm lem te, a zârte leh a zidingte chu rangkachak tlang sakhat aṭanga chher tûr a ni.

³⁷Khâwnvâr zâr sarih lu bâwkte chu chhit tûrin siam la, han chhit chuan a hma lam ên rawh se.

³⁸Khâwnvâr chhit vêl nâna hman tûr bakcheh leh meivâp dahna thlêng, rangkachak hlang hlakin siam bawk tûr a ni.

³⁹Khâwnvâr bâwr leh a hmanruate siam nân rangkachak hlîr hlak kg. sawmthum leh panga hmang ang che.

⁴⁰Tlânga a lem ka entîr che ang chiah khân uluk takin siam ang che.