Read Mizo Lushai Exodus 26 Bible Online

Exodus 26 - Mizo Lushai bible

Exodus 26

¹“La zai sîn thlûr leh a dumpâwl te, a senduk te, a senlâr tea tah Cherub lem mawi taka zeh puan sâwm, Biakbûk chhûngah chuan zâr ang che.

²Puanzâr chu a intiat vek tûr a ni, tawng sawmhnih leh pariata sei, tawng li-a hlai a ni tûr a ni.

³Panga chu a hlai zâwnga ṭhui zawm tûr a ni a, a dang panga pawh chu a hrana ṭhui zawm bawk tûr a ni.

⁴Panga ṭhui zawm sîr ber tlângah chuan a beng, la dumpâwl hrual vuah thliah tûr a ni.

⁵“Beng sawmnga ve ve, inzâwn thliaha vuah tûr a ni.

⁶A beng leh beng bah zawmna tûr thil kawm sawmnga rangkachakin siam la, chu chuan puan ṭhui khâwm pahnih chu bât zawm ang che; tichuan, Biakbûk chung zâr chu tlêp khat a ni dâwn nia.

⁷Biakbûk chung tûr kêl hmul puan sâwm leh pakhat tah tûr a ni.

⁸Kêl hmul puan chu a intiat vek tûr a ni, tawng sawmthuma sei, tawng li-a hlai ni rawh se.

⁹Chûng puan panga chu ṭhui zawm tûr a ni, a dang paruk pawh chu a hranga ṭhui zawm tûr a ni. Paruk ṭhui zawm chu biakbûk hma lamah zâr tûr a ni, a sîr ber chu thleh tûr a ni.

¹⁰Ṭhui khâwm sîr ber tlângah chuan beng sawmnga, inzâwn zêlin siam tawn bawk ang che.

¹¹Dârin thil kawm siam la, chu chuan bât tawn la, biakbûk in chung zâr chu tlêp khat a ni dâwn nia.

¹²Biakbûk hnung lamah a khuhna sahmul puan lawr chu uai thla mai rawh se.

¹³A sîr tuaka a chunga lawr, tawng khat ve ve pawh chu uai thla mai rawh se.

¹⁴“A chung thuah belhna tûr berâm vun tihsen leh savun ṭha chi siam bawk ang che.

¹⁵“Biakbûk banga tun tûr sitim thing rem khâwm ang che.

¹⁶Tawng sâwma sâng, tawng khat leh a chanvea hlaiin rem ang che.

¹⁷Frêm pahnih ke chu inang chiahin tizuih la, a bulṭhuta a zu invuah hnuah a dangte nên a insi phui thei tûr a ni.

¹⁸Chhim lam bang atân chutiang remkhâwm chu sawmhnih siam la,

¹⁹a bulṭhut, a sîr zuih zu inphunna tûr tangkaraw tlang ker khuar, tlang sawmhnih siam bawk ang che.

²⁰Biakbûk hmâr lama tun tûr chutiang sitim thing rem khâwm chu sawmhnih siam bawk ang che,

²¹a frêm ke zuih inphunna tûr tangkaraw tlang sawmli ker bawk la, tah chuan zu inphun rawh se.

²²Biakbûk châr, khawthlang lamah chuan bang tun tûr thing rem khâwm paruk siam la,

²³pahnih chu a kila ṭang tûr a ni.

²⁴A kila ṭang tûrte chu a bul aṭangin a lêr thlengin kilh zawm tûr a ni, a kil bang tûr chu chutianga kilh zawm tûr chu a ni.

²⁵Tichuan, a vaiin thing rem khâwm chu pariat a ni ang a, a bulṭhut ṭheuh tûr pawh tangkaraw tlang ker khuar bawk tûr a ni.

²⁶A bang tun ṭhui khâwm tûr, bangrel, sitim thingtlâwn sâwm leh panga siam la.

²⁷A bangah chuan rel panga awm zêl rawh se, a châr lamah panga, a sîr tuakah panga ve ve.

²⁸A laia a rel dah chuan Biakbûk bang chu a hual chhuak tûr a ni.

²⁹Thing rem khâwm tun chu rangkachaka luan vek tûr a ni; a ṭhuikhâwmna tûr bangrel vuah nân rangkachak beng siam bawk ang che, a bangrelte pawh chu rangkachaka luan tûr a ni.

³⁰Biakbûk chu tlânga a lem ka entîr che ang chiah khân din ang che.

³¹“Pindana zâr tûr la zai sîn, a dumpâwl te, a senduk te, a senlâr tea tahin cherub lemte zeh tûr a ni.

³²Rangkachaka luan sitim ban siam la, a innghahna tûr tangkaraw tlang siam bawk ang che. Banah chuan thil bahna tûr kawm siam la, puan chu zâr ang che.

³³Puanzâr pindan chhûngah chuan Thuthlung Bâwm chu dah la, puanzâr chu Hmun Thianghlim Ber leh Hmun Thianghlim daidanna a ni ang.

³⁴Thuthlung Bâwm chu a chhîn chuan i chhîn ang a, Hmun Thianghlim Berah chuan dah ang che.

³⁵Puanzâr pâwn lamah dawhkân kha hmâr lam pangah dah la, khâwnvâr kha chhim lam pangah dah ang che.

³⁶“Biakbûk kawngkaa zâr tûr la zai sîn, thlûr, a dumpâwl te, a senduk te, a senlâr te mawi taka tah tûr a ni.

³⁷Chumi zârna tûr chuan sitim ban panga, rangkachaka luan, a bulṭhut dâr tlang ker khuar leh puan bahna tûr thil kawm rangkachakin siam bawk ang che.