Read Mizo Lushai Exodus 27 Bible Online

Exodus 27 - Mizo Lushai bible

Exodus 27

¹“Maichâm, kil li nei, tawng nga bial, sitim thingin siam ang che; tawng thuma sâng a ni tûr a ni.

²A kil tinah ki lawr chho a awm ṭheuh tûr a ni, maichâm nên chuan a inzawm vek tûr a ni; a vaiin dâr phêka tuam vek tûr a ni.

³Vut bâwm te, vutlawh te, maihûn te, thîrkut te, meilawh te dârin siam bawk ang che.

⁴Dâr tlâwn rem khâwm, a pangah chuan bel chhuak la, a kil li-ah chuan dâr beng dah zêl ang che.

⁵Chu dâr tlâwn rem khâwm chuan maichâm hnuai lam chanve thlengin a tuam tûr a ni.

⁶A zâwnfung tûr sitim tlâwn siam la, dârin tuam ang che.

⁷Zâwnfung pahnih chu maichâm panga beng chuan zâwn dâwnah vuah tûr a ni.

⁸Maichâm bangah thingphel bel la, a lai chu kawrawng rawh se; tlânga a lem ka entîr che ang khân siam ang che.

⁹“Biakbûk chu hung tûr a ni. Chhim lamah chuan la zai sîn thlûra tah puan tawng zaa sei zâr tûr a ni.

¹⁰Dâr ban sawmhnih leh a bulṭhut dâr tlang sawmhnih a awm tûr a ni. Banah chuan puanzâr bahna tûr thil kawm leh a zârna tûr thil tlâwn, tangkaruaa siam, dah bawk tûr a ni.

¹¹Biakbûk hmâr lamah pawh puan tawng zaa sei zâr tûr a ni, ban sawmhnih leh a bulṭhut sawmhnih, a bahna tûr kawm leh a zârna tûr thil tlâwn, tangkaruaa siam a awm bawk tûr a ni.

¹²Khawthlang lamah chuan tawng sawmngaa sei puan zâr tûr a ni, ban sâwm leh a bulṭhut sâwm a awm ang a.

¹³Khawchhak lamah pawh a hungna chu tawng sawmngaa sei a ni bawk tûr a ni.

¹⁴Luhna tûr kawngka a awm ang a, luhna sîr bang chu tawng sâwm leh pangaa sei a ni ang, ban pathum leh bulṭhut pathum a nei ang.

¹⁵A luhna lehlam sîrah pawh bang, tawng sâwm leh pangaa sei, ban pathum leh bulṭhut pathum nei a awm bawk tûr a ni.

¹⁶A luhna kawngkaa zâr tûr la zai sîn thlûr, a dumpâwl te, a senduk te, a senlâr tea tah, mawi taka zeh, tawng sawmhniha sei a awm tûr a ni; a zârna atân ban pali, bulṭhut nei ṭheuh a awm bawk tûr a ni.

¹⁷Hungna ban zawng zawng chu tangkaraw tlâwna ṭhui zawm tûr a ni: puan bahna tûr thil kawm chu tangkarua a ni tûr a ni, a bulṭhut erawh chu dâr tlang a ni ang.

¹⁸A tual hungna chu a dung tawng za, a vâng tawng sawmnga, a sân lam tawng nga a ni ang a, a puanzâr tûr chu la zai sîn thlûr tah a ni ang, a ban bul erawh chu dâr a ni ang.

¹⁹Biakbûk sakna hmanrua zawng zawng, a kilh behna te, a hungna pal khen nghehna te chu dâr vek a ni tûr a ni.

²⁰“Khâwnvâra chhit tûr oliv hriak thlit fîm rawn la tûrin Israel fate chu hrilh rawh; khâwnvâr chu tlaiah chhit ziah tûr a ni.

²¹Arona leh a fate chuan Biakbûka Thuthlung Bâwm awmna pâwnah khâwnvâr chu dah sela, tlai aṭanga zîng thlengin LALPA hmaah chuan chhi rawh se; Israel fate leh an thlah zêlte chuan hei hi tih dân nghetah neih rawh se.