Read Mizo Lushai Exodus 28 Bible Online

Exodus 28 - Mizo Lushai bible

Exodus 28

¹“I u Arona chu a fa Nadaba te, Abihua te, Eleazara te, Ithamara te nên ko la, Israel mite zîng ata ka puithiam atân tihrang rawh.

²I u, Arona hâk tûr, kawr serh, amah tiropuia timawitu tûr siamsak ang che.

³Mi themthiam, pianpuia themthiamna ka pêkte chu ruai la, Arona inbel tûr thawmhnaw siam teh se, puithiam hna thawk tûra serh hran a ni dâwn si a.

⁴Hêng thawmhnawte hi an siam tûr a ni: âwmbel te, efod te, kawrfual te, kawrhnuai te, diar ṭial te, kâwnghrên te, i u Arona leh a fapate hâk atân puithiam kawr te hi siam sela, ka puithiamah an ṭang dâwn nia.

⁵Rangkachak te, la dumpâwl te, senduk te, senlâr leh la zai sîn te an hmang tûr a ni.

⁶Efod chu themthiam rual chuan rangkachak zai te, la zai sîn te, a dumpâwl te, a senlâr te, a senduk tein tah rawh se.

⁷Darbak pahnih, a hnung lam leh hma lama invuah, bah luh tlatna tûr siam sela.

⁸Kâwnghrên rangkachak zai sîn te, la zai sîn thlûr, a dumpâwl te, a senduk te, a senlârtea inchawih mawi taka tah tûr a ni. Kâwnga hrên behna tûr Efod kawr hmâwrah chuan efod puan ang chiaha zeh mawi tah zawm tûr a ni.

⁹Soham lungmantam pahnih la la, Israela thlah hnam sâwm leh pahnih hming ker ang che;

¹⁰an upat dân indawtin an hming chu ker ang che, pakhatah paruk ve vein.

¹¹Mi themthiam kertîr la, rangkachakah phûm rawh se.

¹²Lungmantam pahnih chu dârbakah chuan Israel hnam sâwm leh pahnih hriat reng nân bel ang che; Arona chuan LALPA hmaah an hming chu dârbakah chuan a bât tel ang a, Israel hnamte chu ka hre chhuak ṭhîn dâwn nia.

¹³Lungmantam phûmna tûr rangkachak pahnih chher la;

¹⁴rangkachak hlîr hlak khaidiat inherh siam bawk la, chûng phûmnaah chuan vuah ang che.

¹⁵“La zai sîn thlûr, a dumpâwl te, a senduk te, a senlâr te leh rangkachak zai tea efod anga tah, Pathian râwn huna puithiam âwma bel tûr mi themthiamte chu inchawih mawi takin tahtîr ang che.

¹⁶Thlep la, thleh hnuah chuan kil li nei, khâp bial ni rawh se.

¹⁷Lungmantam tlar li-a phûmna tûr siam la, tlar khatah chuan Odam lung te, Pitda lung te, Bareket lung te awm sela;

¹⁸tlar hnihnaah Nopek te, Safir te, Jahalom te awm sela,

¹⁹tlar thumnaah Lesem te, Sebo te, Ak-elama te awm sela;

²⁰tlar linaah Tarsis te, Soham te, Jaspi te awm sela; chûng lungmantamte chu rangkachak phêka phûm ṭhêt tûr a ni.

²¹Lungmantam pakhatah hian Israel hnam sâwm leh pahnih hming pakhat zêl ker tûr a ni, nemna zungbun anga ker tûr a ni; chung lungmantam sâwm leh pahnih chuan Israel hnam sâwm leh pahnih a entîr ang.

²²Âwmbel khai nân rangkachak hlîr hlak khaidiat herh siam la,

²³rangkachak beng pahnih, âwmbel tlânga vuah tûr siam bawk ang che.

²⁴Khaidiat herh hmâwr hnih chu âwmbel tlânga bengah chuan vuah tûr a ni.

²⁵A hmâwr lehlam pahnih chu, lungmantam pahnih phûmnaah khân tibet la, efod dârbak nên inzawm rawh se.

²⁶Efod dep, âwmbel chhûng tlângah chuan rangkachak beng pahnih bel bawk ang che.

²⁷Efod dârbak vuahna zâwn, efod hrên behna mawi taka tah tlângah rangkachak beng dang pahnih bel bawk ang che.

²⁸Âwmbel leh efod-a rangkachak beng chu la dumpâwl hrualin suih zawm ang che; âwmbel chu kâwng zâwnah bei tlat rawh se, a che sawn thei tûr a ni lo.

²⁹“Arona chu Hmun Thianghlima a lo luhin âwmbel, Israel hnamte hming chuanna chu, a rawn bel tûr a ni; chu chu, kei LALPA hian, ka mite ka hriat chhuah theihna tûr a ni ang.

³⁰“Efod kawrah chuan Urim leh Thumim chu dah la, kei LALPA hi, mi râwn tûra a lo kal apiangin, Arona thinlung zâwnah chuan a awm ṭhîn dâwn nia.

³¹Chutianga Arona a lo kal apiangin Efod chu a ha ṭhîn ang a, mipuite thu zawh chu a chhâng ṭhîn ang. “Efod hnuaia hâk tûr kawrfual chu la dumpâwl veka tah tûr a ni.

³²A laiah lu rawlhna tûr rek pawp la, a reh pawh tlâng chu a thlêr loh nân a chehna tûr puan tah chuan chep ang che.

³³A kawrfual hmâwrah chuan la dumpâwl te, la senduk te leh la senlâr tea siam theibuhfai lem leh rangkachak tengeng inkârthlâk chiata vuah chhuah tûr a ni.

³⁵Chu chu puithiam hna a thawh hunah Arona chuan a ha ṭhîn tûr a ni. Hmun Thianghlima LALPA hmaa a luhin emaw, a chhuahin emaw tengeng chu a ri ṭhîn ang a, a thi lo tih a hriat dâwn a ni.

³⁶“Rangkachak hlîr hlak phêkah nemna zungbun ker angin, ‘LALPA pual’ tih ker ang che.

³⁷Puithiam diar hma lamah bel la, la dumpâwl hrualin thlung bet ang che.

³⁸Arona chuan diar chawpin a chalah a khim ṭhîn tûr a ni; tichuan, kei LALPA hian Israel-te inthawina thil ka hnêna an rawn hlan chu ka lo pawm ang a, thil hlana tihsual an neih pawhin Arona chuan a mawh a phur ang.

³⁹“Arona hâk tûr, kawr hnuai te, a khim tûr diar te, la zai sîna tah tûr a ni a; a hrên tûr kâwnghrên pawh la zai sîn tah tûr a ni, mawi taka chei tûr a ni.

⁴⁰“Kawrfual te, kâwnghrên te, lukhum te, Arona fate tân siamsak bawk rawh, tiropuia timawitu ni rawh se.

⁴¹I u Arona leh a fapate chu hâktîr la, ka rawngbâwl tûra puithiam atân oliv hriak thih la, hlân la, serh hrang ang che.

⁴²La zai sîna tah, kekawr hnuai siamsak bawk ang che, malpui thlenga fual ni rawh se, chutilo chu an lang palh ang e.

⁴³Arona leh a fate chuan, Biakbûka an lo luhin emaw, Hmun Thianghlima awm maichâma puithiam hna thawk tûra an lo kalin emaw chûng chu an ha ziah tûr a ni; an lan palh chuan an thi mai ang. Hei hi Arona leh a thlahte tân kumkhaw tih dâna hman tûr a ni.