Read Mizo Lushai Exodus 29 Bible Online

Exodus 29 - Mizo Lushai bible

Exodus 29

¹“Ka rawng bâwla puithiam hna thawk tûr chu hetiang hian serh hran tûr a ni; bâwngtuai pakhat leh berâmchal pahnih, hmêlhem lo kai la,

²dawidim telh loh chhang te, hriaka hmeh chhangpêr te, hriaka tâl chhang pan te, chhangphut ṭha chiin siam ang che.

³Chûng chu fawngah dah la, bâwng leh berâm hlan hunah i hlân tel dâwn nia.

⁴Arona leh a fate chu Biakbûk kawngka bulah awm sela, dân angin tuiah insiltîr ang che.

⁵“Puithiam silhfên chu la la, kawrfual te, efod kawr te, efod hnuai kawrfual te, âwmbel te, kâwnghrên te chuan Arona chu inthuam rawh se.

⁶‘LALPA pual’ tih belna diar chu khimtîr bawk ang che.

⁷Thih atân bîka siam oliv hriak chu la la, a lu-ah leihin thih ang che.

⁸“Arona fapate pawh lo kal sela, kawr hâktîr la,

⁹kâwnghrên hrêngin lukhumte chu khum sela, puithiamah chutiang chuan nemnghet la, puithiam an ni kumkhua tawh ang.

¹⁰“Bâwngtuai chu Biakbûk hmaah rawn kai ula, Arona leh a fate chuan bâwng lu-ah chuan an kut nghat sela.

¹¹Biakbûk kawngka bul LALPA hmaah talh ang che.

¹²Bâwng thisen chu la la, kutzungṭangin maichâm kil ki-ah chuan tât ang che; tah bâng chu maichâm bulah leihbua ang che.

¹³A rîlbawh thau te, a kal te leh a bawhtu thau te, a thin hlâwm ṭha laite la la, sual thawina atân maichâmah hâl ral rawh.

¹⁴A sa te, a vun te, a kawchhûng te erawh chu daipâwnah hâl ral ang che, sual thawina thilhlan a ni a, hâl ral vek tûr a ni.

¹⁵“Berâmchal pakhat chu kai la, Arona leh a fate chuan a lu-ah an kut nghat rawh se.

¹⁶Talh la, a thisen chuan maichâm chu theh kual ang che.

¹⁷A sa chu chan sawm la; a kawchhûng leh a kete chu sil fai la, a lu nên dah khâwm ang che.

¹⁸A zavai chuan maichâmah hâl la, LALPA tâna hâlral thilhlan a ni, a rim chu LALPA rimtui tih zâwng tak a ni.

¹⁹“Berâm pakhat pawh chu kai la, Arona leh a fate chuan a lu-ah an kut nghat rawh se.

²⁰Talh la, a thisen chu Arona leh a fate beng ding lam tengengah te, kut ding lam zungpui hmâwrah te, kezungpui ding lam hmâwrah te tât la, maichâmah pawh theh kual ang che.

²¹Maichâma thisen te, oliv hriak thih chi te chu a ṭhen la la, Arona chu a kawrah nên theh ang che; a fate pawh an kawrah nên theh ang che; tichuan, Arona leh a fate chu an thawmhnaw nên ka tâna serh hran an ni tawh ang.

²²“Berâm mei thau tak chu hlep la, a rîlbawh thau te, a thin hlâwm ṭha lai leh a kal pahnih leh a thau bawhtu leh a bawp ding lam chu la la,

²³chhang hlan, fawnga dah, chi khat zêl, dawidim telh loh chhang te, hriak nêna hmeh chhangpêr te, hriaka tâl chhang pan te pakhat ṭheuh la la,

²⁴chûng chu Arona leh a fate chu pe la, LALPA hmaah thêntîr rawh.

²⁵I lâksak leh ang a, maichâma hâlral thilhlan chungah dah la, LALPA tân hâl ral ang che; LALPA rimtui tih zâwng tak a ni.

²⁶“Berâm irno chu la la, LALPA hmaah thênin hlân ang che; chu chu i chanpual ve tûr a ni.

²⁷Puithiam ruat nghehna berâm irno leh a bawp hi thênin ka hnênah hlân ula, puithiamte chanpual ve tûr a ni.

²⁸Israel faten remna thilhlan an hlanin a irno leh a bawp chu puithiamho chan kumkhua atân ka ruat tlat a ni; hei hi mipui thilpêk ka dawn ve chu a ni.

²⁹Arona puithiam thuam serh hi a faten an chhawm zêl tûr a ni, puithiam hna thawk tûra serh hrannaah an ha ve zêl tûr a ni.

³⁰Arona fa, a aiawha puithiama ruat chuan rawngbâwl tûra Hmun Thianghlima a lo kal hunah ni sarih chhûng a ha tûr a ni.

³¹“Puithiam ruat nghehnaa berâmpa in hman sa chu Hmun Thianghlimah chhûm ang che,

³²Arona leh a fate chuan Biakbûk kawngka bulah, fawnga chhang hlan nên a sa chu ei rawh se.

³³Anmahni ruat nghehnaa sual thawina sa chu anmahni chauhvin an ei tûr a ni; thil thianghlim a ni a, puithiam chauh ei tûr a ni.

³⁴A sa leh chhang chu ei sên loh a awm chuan zîngah hâl tûr a ni, sa serh a ni a, a ṭhing chu ei tûr a ni lo.

³⁵Thu ka pêk che ang chuan Arona leh a fate chu ni sarih chhûng i tihrang tûr a ni.

³⁶Ni tin, sual thawi nân bâwngchal hlân ang che; sual thawina chu hlânin maichâm chu i thian ang a, oliv hriak i hnawih ang a, i tithianghlim tûr a ni.

³⁷Chutiang chuan ni sarih chhûng, ni tin ti ang che; tichuan, maichâm chu a lo thianghlim kim vek ang a, mi narânin an khawih chuan an tuar ang.

³⁸“Maichâmah chuan ni tin berâm kum khat vêla upa i hlân ziah tûr a ni.

³⁹Zîngah pakhat i hlân ang a, tlaiah pawh a dang pakhat i hlân dâwn nia.

⁴⁰Berâm pakhat rual chuan chhangphut ṭha chi kg. khat leh oliv hriak thlit fîm litar khat i hlân tûr a ni; thilhlan ruala uain leihbuak tûr litar khat hlân tel bawk ang che.

⁴¹Tlai lama berâm pakhat hlan rual pawh chuan chhangphut ṭha chi te, oliv te, uain te hlân tel ang che. Hei hi ei tûr thilhlan, kei LALPA hnêna hlan chu a ni, a hâl rim chu a tui a ni.

⁴²LALPA Biakbûk kawngkaa hâlral thilhlan chu in hlân kumkhua tûr a ni; chutah chuan ka mite ka rawn hmu ang a, thu ka hrilh ṭhîn ang.

⁴³Chutah chuan Israel fate chu ka be ṭhîn ang a, ka ropuina chu a châm reng ang.

⁴⁴Biakbûk leh maichâm chu ka tithianghlim ang a, ka rawngbâwltu atân Arona leh a fate chu ka tihrang ang.

⁴⁵Israel mite zîngah chuan ka chêng ve ang a, an Pathian ka ni ang.

⁴⁶An zînga ka tel ve ṭhin nân Aigupta ram ata ka hruai chhuak a, kha Pathian, LALPA kha ka ni tih an hria ang; LALPA, an Pathian ka nih hi.