Read Mizo Lushai Exodus 3 Bible Online

Exodus 3 - Mizo Lushai bible

Exodus 3

¹Mosia chuan a puzawn, Midian puithiam Jethroa berâmte chu a vêng a; thlalêr thlang lamah a thlah a; Pathian tlâng, Horeb chu a va thleng ta a.

²LALPA vântirhkoh chu a hnênah, thingbukah meialhin a rawn inlâr a, a han en chuan thingbuk chu a alh a; mahse, a kâng si lo.

³Mosia chuan, “He thil mak tak hi ka va en teh rêng ang, engtizia nge thingbuk hi a kan hauh si loh le?” a ti a.

⁴En tûra a va pan chu LALPA chuan a hmu a, thingbuk aṭang chuan Pathian chuan, “Mosi, Mosi,” a rawn ti a. Ani chuan, “Eng nge ni?” a ti a.

⁵Pathian chuan, “Lo kal hnai suh, i pheikhawk kha hlîp rawh, i dinna kha hmun thianghlim a ni,” a rawn ti a.

⁶Heti hian a ti bawk, “I pate Pathian ka nih hi: Abrahama Pathian, Isaka Pathian, Jakoba Pathian chu,” tiin. Mosia chuan Pathian a hmu ngam lo va, a hmai a khuh a.

⁷LALPA chuan, “Aigupta rama awm, ka mite tuar nasatzia ka hmu reng a ni; chhawrtute avânga an rûm thâwm pawh ka hria.

⁸Aigupta mite kut ata chhan chhuak tûrin tûnah ka lo chhuk a ni; chu ram ata chu ka hruai chhuak ang a, ram ṭha tak, thâwl tak, khawizu leh hnutetuia luang ramah ka hruai dâwn a ni; Kanan mite, Hit mi te, Amor mi te, Periz mi te, Hiv mi te leh Jebus mi te awmna ramah chuan.

⁹Ngai teh, Israel fate ṭap thâwm ka hnên a lo thleng a, Aigupta miten an tihnawmnahzia pawh ka hmu a ni.

¹⁰Chuvângin, ti rawh, Farawa hnênah ka tîr teh ang che. Ka mi, Israel fate chu Aigupta ram aṭangin i hruai chhuak dâwn nia,” a ti a.

¹¹Mosia chuan Pathian hnênah, “Farawa hnêna kal âwm ka ni lo ve, Israel fate Aigupta ram aṭanga hruai chhuak thei tûr pawh ka ni lo ve,” a ti a.

¹²Ani chuan, “Ka awmpui zêl dâwn che alâwm; ka mite Aigupta ram aṭanga i hruai chhuah hunah, he tlângah hian Pathian chibai in rawn bûk ang; chu chu ka tîr che a ni tih i hriat chianna tûr chu a ni,” a ti a.

¹³Mosian Pathian hnênah, “Israel fate hnênah zu kal ila, ‘in pate Pathian chuan in hnênah min rawn tîr a ni,’ ti ila, ‘A hming eng nge?’ lo ti sela, engtin nge ka chhan ang?” a ti a.

¹⁴Pathianin Mosia hnênah chuan, “AWMA ka ni” a ti a. “Israel fate hnênah chuan, ‘AWMA chuan min tîr a ni,’ ti ang che,” a ti a.

¹⁵Mosia hnênah Pathian chuan, “Israel fate hnênah chuan heti hian i sawi tûr a ni: ‘LALPA in pate Pathian, Abrahama Pathian, Isaka Pathian, Jakoba Pathian chuan in hnênah min tîr a ni’ ti ang che. Chu hming chu ka hming a ni kumkhua a, ṭhang lo thar tûr zawng zawng pawhin chutiang chuan min hre tûr a ni.

¹⁶Kal ta la, Israel upate chu ko khâwm la, an hnênah, ‘LALPA, in pate Pathian, Abrahama Pathian, Isaka Pathian, Jakoba Pathian chu ka hnênah a inlâr a, ‘Ka hre reng che u alâwm, Aigupta rama an sawisak dân che u hi ka hmu reng a ni.

¹⁷Aigupta mite tihduhdahna lak ata Kanan mi te, Hit mi te, Amor mi te, Periz mi te, Hiv mi te leh Jebus mite awmna ram, khawizu leh hnutetuia luang ramah ka hruai ang che u, a ti,’ ti ang che.

¹⁸Ka mite chuan i thu an ngaithla ang; nang leh Israel upate chu Aigupta lal hnênah in kal ang a, a hnênah, ‘LALPA, Hebrai mite Pathian chu kan hnênah a rawn inlâr a; thlalêrah, ni thum kalah kan Pathian, LALPA hnêna inthawina hlân tûrin min kaltîr ta che,’ in ti dâwn nia.

¹⁹Aigupta lal chuan a kaltîr phal dâwn lo che u tih ka hre sa a ni, na deuhva kar a ngai dâwn a ni.

²⁰Ka kut ka lek ang a, Aigupta mite chu an zînga thil mak tak tak ka tih tûr chuan ka sawisa dâwn a ni. Chumi hnuah chuan in kal a phal ang.

²¹Aigupta mite chu ka mite hi ka duhsaktîr ang a, in chhuah hunah chuan kut ruakin in chhuak lo vang a,

²²hmeichhia zawng zawngin an ṭhenawmte leh an ina awm vete tangkarua leh rangkachaka siam incheina leh thawmhnaw an dîl ang a, an fanu an fapate chu an chei ang a, chutiang chuan Aigupta mite chu in rawk a ni ngawt dâwn nia,” a ti a.