Read Mizo Lushai Exodus 30 Bible Online

Exodus 30 - Mizo Lushai bible

Exodus 30

¹“Sitim thingin rimtui hâlna tûr maichâm siam ang che.

²Kil li nei, tawng khat bial, a sân lam tawng hnih ni sela, kil tinah a ki lawr awm sela, inzawm vek rawh se.

³A chung zâwl te, a sîr te, a kîte chu rangkachak hlîr hlakin luan tûr a ni, a tlâng chu rangkachaka luan tûr a ni.

⁴A zâwnfung vuahna tûr rangkachak beng pali siam la, a sîr lehlam lehlamah, a tlâng bulah vuah ang che.

⁵A zâwnfung chu sitim thing ni sela, rangkachaka luan tûr a ni.

⁶Rimtui hâlna maichâm chu Thuthlung Bâwm dahna puanzâr pindan pâwnah hûng ang che. Thuthlung Bâwm chhîn chu ka rawn biak ṭhinna tûr che a ni.

⁷Tûk tin, Aronan khâwnvâr a rawn tihfai pahin thil rimtui a hâl ṭhîn tûr a ni.

⁸Tlaiah pawh, khâwnvâr a rawn chhit dâwnin rimtui chu a hâl ziah tûr a ni. LALPA hnêna rimtui hâl hi kumkhuaa chhunzawm zêl tûr a ni.

⁹Maichâmah hian hâl khap thil rimtui te, hâlral thilhlan te, chhang hlante i hâl tûr a ni lo, in tûr uain hlan pawh i leihbaw tûr a ni lo.

¹⁰Kum tin, vawi khat, sual thawina thilhlan thisen chu, Arona chuan, maichâm then thianghlim nân a ki-ah a hnawih tûr a ni; kumkhuain hei hi kum tin vawi khat tih ziah tûr a ni; maichâm chu LALPA tân a thianghlim reng tûr a ni.”

¹¹ LALPA chuan Mosia hnênah,

¹²“Chhiarpui laia hri-a mi an thih loh nân Israel mite i chhiar huna tel zawng chuan nun tlanna an pe tûr a ni.

¹³Chhiarpuia tel zawng zawngin pêk tûr tuk zât chu an pe tûr a ni, Inbiakna bûka hman lai bûkna dik taka bûk sekel chanve, Gera sâwm an pe tûr a ni; chu chu LALPA hnêna thilhlan a ni ang.

¹⁴Chhiarpuia chhiar tel, kum sawmhnih leh a chung lam zawng zawng chuan LALPA hnênah hei hi an hlân tûr a ni.

¹⁵An nun tlanna LALPA hnêna an hlan hun chuan sekel chanve mi tinin an hlân ṭheuh tûr a ni; mi hausain a aia tam an hlân tûr a ni lo, mi rethei pawhin chu aia tlêm chu an hlân tûr a ni lo.

¹⁶Israel mite hnên aṭangin he nun tlanna hi i khawn ang a, Biakbûk enkawl nân i hmang dâwn nia. He nun tlanna hi LALPA tân Israel fate a hriat reng vena tûr a ni,” a ti a.

¹⁷ LALPA chuan Mosia hnênah,

¹⁸“Insilna tui dah nân dâr chawhtawlh, a hûnna dâr nên siam ang che; hâlral hâlna maichâm leh Biakbûk inkârah hûng la, tui dah reng ang che.

¹⁹Arona leh a fate chuan an kut leh an ke hetah hian an sil ṭhîn tûr a ni.

²⁰Biakbûk chhûnga an kal dâwnin emaw, thilhlan hâl tûra an kal hunah emaw an insil tûr a ni; tichuan, an thi lo vang.

²¹An thih loh nân an kut leh ke an sil ngei tûr a ni. Hei hi an thlahte pawhin kumkhaw dânah an neih ve zêl tûr a ni,” a ti a.

²² LALPAN Mosia hnênah,

²³“Thil rimtui tak tak, Mura tui kg. ruk, thakthîng rimtui kg. thum, Saitronela rimtui kg. thum,

²⁴Tez-pata kg. ruk, Inbiakna bûka hman lai bûklunga bûk vek la khâwm la, oliv hriak litar li nên chawhpawlh ang che.

²⁵Têl rimtui anga siam rimtui chawhpawlh chu hriak thianghlim hnawih atân hmang ang che.

²⁶Biakbûk te, Thuthlung Bâwm te,

²⁷dawhkân leh a hmanrua te, rimtui hâlna maichâm te,

²⁸thilhlan hâlna maichâm leh a hmanrua te, insilna dâr chawhtawlh te leh a hûnna te hnawihah chu chu hmang ang che.

²⁹Chu hriak chu chutianga hnawihin hêngte hi tithianghlim la, an lo thianghlim vek ang a, a khawih apiangin an tuar ang.

³⁰Ka rawngbâwl tûrin Arona leh a fate chu he hriak hi thih la, tihrang ang che.

³¹Israel fate chu hrilh rawh; he hriak thianghlim hi ka rawngbâwltu tûr serh hran huna thih atân hman kumkhua tûr a ni.

³²Mi narân thih tûr a ni lo; thil chi hrang hrang chawhpawlh tûr zât hi tihdanglam tûr a ni hek lo; thil thianghlim a ni a, in serh hle tûr a ni.

³³Hetianga thih tûr hriak leh thil dang chawhpawlh lo siam vete emaw, puithiam tûr ni lo thihtu emaw chu Israel mite zîng ata tuithlâr tûr a ni,” a ti a.

³⁴ LALPA chuan Mosia hnênah, “Hêng thil rimtui Netep te, Sekelet te, Kalbana te, Beraw fîmte inzât chiah zêlin la la,

³⁵rimtuia hâl atân tel rimtui chawhpawlh angin chawhpawlh ang che, vêng hima tithianghlim tûrin chi tlêm telh ang che.

³⁶A ṭhen chu râwt dip derh la, Biakbûkah, ka biak ṭhinna tûr che Thuthlung Bâwm bulah theh darh ang che; chu chu thil thianghlim berah neih tûr a ni.

³⁷Nangma hman tûrin chutiang taka rimtui chawhpawlh chu i siam tûr a ni lo; thil thianghlim, LALPA tâna serh hran a ni.

³⁸Mahni hâl tûr chutianga rimtui chawhpawlh siam vetu rêng rêng chu a miten an tuithlâr tûr a ni,” a ti a.