Read Mizo Lushai Exodus 31 Bible Online

Exodus 31 - Mizo Lushai bible

Exodus 31

¹ LALPA chuan Mosia hnênah, “Uria fapa, Bezalela, Hura tupa, Juda hnam zînga mi chu ka thlang chhuak ta.

²Finna te, hriatna te, hmangchâng hriatna te, thil engkim siam tûra

³kut themthiamna te nei tûrin Pathian Thlarau ka pe ta.

⁴Thil mawi tûr ngaihtuah chhuaka, rangkachak te, tangkarua te leh dâr tea siam nghâl thiamna te,

⁵lungmantam kera phûm te, thing ker te, thil mawi chi tinrêng siam thiamna te ka pe a ni.

⁶Amah pui tûrin Dan hnama mi Ahisamaka fapa Oholiaba pawh ka thlang tawh a ni. Themthiam rual dang pawh, siam tûra ka tih zawng zawng siam thiamna ka pe a ni.

⁷Biakbûk an sa ang a, Thuthlung Bâwm leh a chhîn te, Biakbûk thuahna te,

⁸dawhkân leh a hmanrua te, rangkachak hlîr hlaka siam khâwnvâr bâwr leh a hmanrua te, rimtui hâlna maichâm te,

⁹thilhlan hâlna maichâm leh a hmanrua te, insilna tûr chawhtawlh leh a hûnna te,

¹⁰Arona leh a fate puithiam hna thawka ka rawng an bâwl huna an inthuamna tûr thuam ropui te,

¹¹puithiam nemngheha thih tûr hriak te, Hmun Thianghlima rimtui hâl tûr te an siam dâwn nia. Ka sawi ang thlap khân hêng hi an siam tûr a ni,” a ti a.

¹² LALPA chuan Mosia hnênah,

¹³“Israel fate chu hrilh rawh: Ka sabat ni hi an serh tûr a ni; in thlah zêlte thlengin kei LALPA hi, nangmahni thlang chhuaktu che u ka nih in hriat rengna tûr a ni.

¹⁴Sabat hi in tân ni thianghlim a ni ang; in serh tûr a ni a, a bawhchhia chu tihhlum tûr a ni; hna thawk lui pawh chu in zîng ata tihboral tûr a ni.

¹⁵Ni ruk chhûng hna thawhna hun in nei a, a ni sarihna chu LALPA tân ni serh a ni a, in châwl tûr a ni; sabat nia hna thawk chu tihhlum ngei tûr a ni.

¹⁶Chuvângin, Israel fate chuan, kan inkâra thuthlung an hriat reng nân kumkhuain an serh tûr a ni.

¹⁷Kei leh Israel fate, kan inkâra thuthlung chhinchhiahna a ni ang; kei LALPA hian ni ruk chhûngin lei leh vân ka siam zo va, a ni sarih ni chuan hna ka bânsan a, ka châwl a ni,” a ti a.

¹⁸Pathianin Sinai tlânga Mosia a biak zawh chuan, a thupêk, amah Pathian ngeiin lungphêka a ziak chu Mosia hnênah chuan a pe a.