Read Mizo Lushai Exodus 32 Bible Online

Exodus 32 - Mizo Lushai bible

Exodus 32

¹Mosia chu tlâng aṭanga a lo chhuk tâk lawk loh avângin Arona hnênah mite chu an kal khâwm a, “Khai, min hruaitu tûr Pathian min siamsak teh; Aigupta ram aṭanga min hruai chhuaktupa Mosia lah hi a chanchin eng mah kan hre tawh si lo,” an ti a.

²Arona chuan, “In nupui te, in fapa te, leh in fanute rangkachak bengbeh thlawnsak ula, han la ta che u,” a ti a.

³Mi zawng zawng chuan an rangkachak bengbehte chu an thlawn a, Arona an pe a.

⁴Ani chuan a lo dawng a, rangkachak chu a rawh tui a, a chhûnna tûr a siamah chuan bâwngno, a pa lim a chhûng ta a. Mite chuan, “Aw Israel-te u, hei hi Aigupta ram aṭanga hruai chhuaktu che u pathian chu a ni,” an ti a.

⁵Chu chu Aronan a hriat chuan bâwngno lim hmaah chuan maichâm a siam a; “Naktûkah LALPA chawimawina ruai kan ṭheh ang,” tiin a tlângautîr a.

⁶A tûk zîngah chuan hâlral thilhlan an hlân a, remna thilhlan an rawn la bawk a, an hlân a, mipuite chu ruai kîl tûr chuan an ṭhu a, inphalrai ruai a ni ta ngawt a.

⁷ LALPA chuan Mosia hnênah, “Chhuk thuai teh, Aigupta ram aṭanga i hruai chhuah, i mite khu an khawlo zo ta.

⁸An awm dân tûr ka hrilh ang khân an awm rei peih ta hauh lo mai; rangkachak bâwngno lim an chhûng a, chibai an bûk a, inthawina an hlân e, ‘Aw Israel-te u, hei hi Aigupta ram aṭanga hruai chhuaktu che u in pathian chu a ni, an ti,” a ti a.

⁹LALPA chuan Mosia hnênah, “Hêng mite hi an luhlul hle mai ka ti!

¹⁰Ka thinur êm mai, khawi nge, ka zu tihlum vek teh ang, nang chauh hi hnam ropui takah ka han din teh ang che,” a ti a.

¹¹Mosia chuan a Pathian, LALPA chu a ngên a, “Aw LALPA, ropui tak leh kut chak tak hmanga Aigupta ram ata i hruai chhuah i mite chungah engtizia nge chuti taka i thinur le!

¹²‘Tlângrama tihhluma, tihchimih tumin a mite chu Aigupta ram ata a hruai chhuak a lo nih hi,’ Aigupta mite chuan an ti dâwn asin. Thinur tawh teh suh.

¹³I chhiahhlawh Abrahama te, Isaka te, Israela te kha hre reng teh; mahni inchhâlin an hnênah, ‘Arsi zâtin in thlahte ka tipung ang a, ka sawi ram zawng zawng hi in thlahte hnênah ka pe ang a, an nei kumkhua ang,’ tiin i tiam kha,” a ti a.

¹⁴Tichuan, LALPA chuan a mite chunga thil ṭha lo tih a tum chu a ṭhulh ta a.

¹⁵Mosia chu tlâng aṭang chuan a chhuk thla a, a kut lehlam lehlam chuan thupêk ziakna lungphêk chu a keng a.

¹⁶Lungphêkte chu Pathian siam a ni; a ziak pawh chu Pathian ngeiin kerin a ziak a ni.

¹⁷Mipui au thâwm chu Josua chuan a han hria a, “Chu! riahhmuna thâwm chu indo thâwm a va ni âwm ve?” a ti a.

¹⁸Mosia chuan, “Hnehtu au thâwm a ni lo va, chan chau thâwm lah a ni hek lo, hlimhlawp zai thâwm a nih chu,” a ti a.

¹⁹Tin, riahhmun chu a zu thleng hnai a, Mosia chuan bâwngno lim leh mipui lâm huai huai chu a han hmu a, a thin a ur ta êm êm a. Tlâng bulṭhutah chuan a lungphêk ken chu a vawm keh a.

²⁰Bâwngno lim an chhûn chu a la lawk a, a rawh a, a râwt dip a, tuiah a phul a, Israel fate chu a intîr ta a.

²¹Arona hnênah, “Engtin nge mipuiin an tih che a heti taka thil sual i tihtîr tâk le?” a ti a.

²²Arona chuan a chhâng a, “Ka Lalpa thinur chu ka chungah alh teh suh se, hêng mite hian thil sual tih an châk zek zekzia i hria alâwm.

²³‘Min hruaitu tûr pathian min siamsak rawh, Aigupta ram aṭanga min hruai chhuaktu Mosia lah hi a chanchin pawh kan hre tawh si lo,’ an rawn ti a.

²⁴Keiin an hnênah, ‘Rangkachak nei chuan thlawn sela, rawn dah rawh se,’ ka lo ti a. An rawn dah a, keiin ka rawh a, bâwngno limah a chang ta mai alâwm maw le!” a ti a.

²⁵Mipui chu an duh duhin an tâl a, an hmêlmate hmuhsit hial khawpin Arona chuan a lo tâltîr mai mai a ni tih Mosian a hmuh chuan,

²⁶riahhmun lamah a va ding a, “LALPA lama ṭang duh chu ka hnênah hian lo kal rawh se,” a ti a. Levia thlah zawng zawng chu a lamah chuan an kal ta a.

²⁷An hnênah, “Israel-te Pathian, LALPA chuan heti hian a ti: ‘mipa chuan khandaih pai ula, riahhmun luhnaah lûtin bûkte chu fang chhuak ula, mahni unau pawh, ṭhian pawh, ṭhenawmpa pawh that rawh se,’ a ti,” a ti a.

²⁸Levia thlahte chuan Mosia sawi ang chuan an ti a; chumi ni chuan mi sângthum lai an that a.

²⁹Mosia chuan, “Mahni fate leh unaute bei hial khawpin LALPA tân in inpe a, mal a sâwm ngei ang che u,” a ti a.

³⁰A tûkah chuan Mosian mipui hnênah, “Thil sual râpthlâk tak in ti a; mahse, tûnah hian LALPA hnênah ka han chho leh tâng e, in sual a lo ngaidam thei mial mahna,” a ti a.

³¹Mosia chu LALPA hnênah a kal chho leh a, “Hêng mite hian thil sual râpthlâk tak an ti a, rangkachak pathian an siam tâk hi.

³²Mahse, an sual hi i ngaidam thei hrâm ang emaw chu? I theih lul loh chuan i mite hming ziakna bu ata ka hming kha thai bo mai ang che,” a ti a.

³³ LALPA chuan Mosia chu a chhâng a, “Ka lehkhabu aṭangin ka chunga thil tisualtu hming chauh a ni ka thai bo dâwn ni.

³⁴Kal ta la, ka hrilh tawh che hmunah he mite hi hruai rawh. Ngai teh, ka Vântirhkoh chuan i hma a hruai zêl ang a; ka rawn tlawh hunah chuan an sualna ngei chauhvah a ni ka rawn hrem dâwn ni,” a ti a.

³⁵Tichuan, rangkachak bâwngno lim Arona an siamtîr avâng chuan LALPA chuan mipui zîngah hri a lêntîr ta a.