Read Mizo Lushai Exodus 33 Bible Online

Exodus 33 - Mizo Lushai bible

Exodus 33

¹ LALPA chuan Mosia hnênah, “Aigupta ram aṭanga i mi hruai chhuahte hi chhuahpui la, Abrahama te, Isaka te, Jakoba te hnêna pêk ka tiam ramah chuan kal rawh.

²Ka Vântirhkoh chuan in hma a hruai ang a, Kanan mi te, Amor mi te, Hit mi te, Periz mi te, Hiv mi te leh Jebus mi te chu ka ûm chhuak ang.

³Chu ram, khawizu leh hnutetuia luang ramah chuan kal ula, kei erawh chu ka lo kal ve lo vang, in luhlul êm a, kawng lakah ka tichimit hlauh dah ang che u,” a ti a.

⁴Miten chu thu ṭha lo tak chu an hriat chuan an lungngai ta êm êm a, an inchei duh ta lo va.

⁵LALPA chuan Mosia hnênah, “Mi luhlul tak in ni, in zînga ka kal ve zawngin ka tichimit mai ang che u. In chunga ka tih dân tûr ka han ngaihtuah ang e,” a ti a.

⁶Sinai tlâng an chhuahsan hnu chuan Israel fate chuan incheimawina an inbel tawh ngai lo.

⁷Israel-ten bûk an khuarna apiangah Mosia chuan Biakbûk chu bûk pâwn deuhvah a zâr ṭhîn a, Inbiakna bûk, a vuah a. Tu pawhin LALPA an râwn duh chuan bûk pâwna Inbiakna bûkah chuan an pan ṭhîn.

⁸Inbiakna bûkah Mosia a kal dâwn chuan mi tin mahni puan in kawngkaah chuan an lo chhuak a, Inbiakna bûk a luh hma chu dingin Mosia chu an enzui ṭhap ṭhîn.

⁹Inbiakna bûka Mosia a luh vêleh chhûm ding kha a lo chhuk a, Inbiakna bûk kawngkaah chuan Mosia hnênah LALPA chuan thu a sawi ṭhîn.

¹⁰Inbiakna bûk kawngkhâra chhûm ding an hmuh chuan mi zawng zawng chu an puan in kawngkaah chuan an kûn a, chibai an bûk ṭheuh ṭhîn.

¹¹Miin a ṭhian a bia ang hian LALPA chuan Mosia chu inhmachhawn meuhvin a be ṭhîn. Mosia chu bûkah a lo kîr ṭhîn a; amaherawhchu, amah puitu Nuna fapa tlangvâl Josua erawh chuan Inbiakna bûk chu a chhuahsan ngai lo.

¹²Mosia chuan LALPA hnênah, “Hêng mite hi hruai chhuak tûrin min ti a, tu nge min kalpui dâwn tih min la hrilh si lo. Min hria a, min duhsak a ni tih min hrilh a.

¹³Khai le, min duhsak takmeuh a nih chuan i thiltum chu min hrilh teh; tichuan, i mit tlungin i rawng ka bâwl thei ang a, he mite hi i mi thlante chu an lo ni ngei tih ka hre thei bawk dâwn nia,” a ti a.

¹⁴Ani chuan a chhâng a, “In zîngah ka tel ve zêl ang a, ka chhâwk zâng zêl ang che,” a ti a.

¹⁵Mosia chuan, “Min kalpui ve zêl dâwn si loh phei chuan he hmun ata hi kan kal sawn lo mai ang.

¹⁶Kan zînga i tel ve zêl si loh chuan i mite leh ka chungah hian i lungawi a ni tih tu nge hria ang? I tel ve erawh chuan khawvêla mi tinin mi danglam bîk tak kan ni tih an hria ang,” a ti a.

¹⁷ LALPA chuan Mosia hnênah, “Ka hre chiang che a, mi tihlâwm hle avângin i ngen ang chuan ka ti ang e,” a ti a.

¹⁸Mosia chuan, “Khawngaih takin i hmêl chu min hmuhtîr ta che,” a ti a.

¹⁹Ani chuan, “I hnênah ka ṭhatzia ka tilang ang a, ka hming pawh i hriatah ka sawi ang, LALPA ka nih hi. Ka duh apiang chungah ngil ka nei ang a, ka duh apiang chu ka khawngaih mai ang.

²⁰Ka hmêl erawh chu i hmu thei lo vang; min hmu chu tu mah an nung thei lo a ni,” a ti a.

²¹ LALPA chuan a sawi zêl a, “En teh, ka bulah hian din theihna lungpui a awm a, lo ding la,

²²ropui taka ka lo kal hunah lungpui kehkârah hian ka dah ang chia, ka kal pelh hma che chu ka kutin ka hliah ang chia,

²³ka liam dâwn hunah ka kut chu ka la sawn ang a, ka hnung lam chu i hmu thei ang, ka hmêl chu i hmu thei lo vang,” a ti a.