Read Mizo Lushai Exodus 34 Bible Online

Exodus 34 - Mizo Lushai bible

Exodus 34

¹ LALPA chuan Mosia hnênah, ‘I tihkeh tâk lungphêk pahnih ang kha chher la, a hmaa ka thu ziak ang kha ka lo ziak leh ang e.

²Naktûk zîngah insiam la, Sinai tlângah rawn chhohpui la, ka hmaah rawn inlan rawh.

³Tu mah an lo kal ve tûr a ni lo; tlângah tu mah awm suh se, berâm rual leh bâwng rual pawh tlâng pangah tla suh se,” a ti a.

⁴Tichuan, a hmaa mi ang lungphêk pahnih Mosia chuan a chher a. Zîng takah a tho va, LALPA thupêk ang chuan Sinai tlângah lungphêk chu a keng chho ta a.

⁵Chhûmah chuan LALPA chu a lo chhuk a, a bulah a lo ding a, a hming LALPA chu a ni tih a rawn puang ta a.

⁶LALPA chu a hmaah a lo kal a, “Kei hi LALPA chu ka ni, Pathian rinawm, khawngaih thei leh ngilnei, thinnel leh lainatna ngah,

⁷chhuan sâng thleng pawha khawngaih zui zêltu; khawlohna te, bawhchhiatna te, sualnate ngaidama, thiam loh changte erawh chu zuah lova, an pate khawlohna avânga an fate leh an tute, chhuan thum chhuan li thlêng pawha hrem ṭhîntu Pathian ka ni,” a ti a.

⁸Mosia chu rang zetin lei siin a kûn a, LALPA chu chibai a bûk ta a.

⁹Heti hian a ti a, “Aw LALPA, ka chungah i lâwm takzet a nih chuan LALPA chu kan zîngah kal ve ngei teh se, hêng mite hi an luhlul hle na a, kan khawlohna leh kan sualna ngaidam la, i pual, i rochanah min nei ang che,” a ti a.

¹⁰ LALPA chuan Mosia hnênah, “Israel fate tân thu ka thlung e. Khawvêla tu hnam zîng maha la tih ngai loh an hmaah thil mak ka ti dâwn. In awmnaa mi zawng zawngin kei LALPA hian thil ka tihtheihzia an hmu ang, thil mak elkhên ka tihsak dâwn che u a ni.

¹¹“Vawiina ka thupêk che u hi zâwm tlat zêl ang che u; ngai teh u, in hmaah Amor mi te, Kanan mi te, Hit mi te, Periz mi te, Hiv mi te leh Jebus mi te ka ûm chhuak dâwn.

¹²Fîmkhur rawh u, in kalna tûr ram mite nên thu in thlung vaih ang e, in inâwk buai mai ang.

¹³An maichâm chu paih darh ula, an lung serh phunte chu vaw sawm ula, an pathiannu lim Aseri te chu kit vek ang che u.

¹⁴Pathian dang hmaah in kûn tûr a ni lo, LALPA hi thîkthuchhia, Pathian thîkthuchhe tak a ni si a.

¹⁵Chu rama awmte nên thu in thlun hlauh chuan, an pathian chibai bûka an inthawina hmunah a sa ei tûrin an sâwm ang che u a, an pathian hnêna an thil hlan chu ei ve in châk mai dah ang e.

¹⁶In fate nupuiah an fanute in neihsak ang a, anni chuan ka hnên aṭangin an hruai bo ang a, an pathiante chu in fate chuan an be ve dah ang e.

¹⁷“I tân milem chhûn chawp pathian insiam suh.

¹⁸“Dawidim telh loh kût hmang ṭhîn rawh. Abib thla, ka hun ruatah, thu ka pêk che u angin ni sarih chhûng dawidim telh loh chhang in ei ṭhîn tûr a ni; Abib thla hi Aigupta ram in chhuahsan thla kha a ni.

¹⁹“Piang hmasa ber a pa tawh phawt chu ka ta a ni. I ran vulh, bâwng leh berâm no neih hmasak ber, a pa chu, min pe tûr a ni.

²⁰Sabengtung no hrin hmasak ber, a pa chu, berâm novin i tlan tûr a ni; i tlan duh loh chuan a ring elh tliah tûr a ni. In fa tîr, mipa chu, in tlan zêl tûr a ni. Tu mah kut ruakin ka hnênah in lo kal tûr a ni lo.

²¹“Ni ruk chhûng hna in thawk ang a, a ni sarih ni chuan in thawk tûr a ni lo, leileh lai leh buh seng lai pawhin in châwl tho tûr a ni.

²²“Huit seng tirhah Pentikos kût hmang ang che u, in theirahte in lawh fai vek hnu, favângah Bâwkte kût hmang ang che u.

²³“LALPA Israel-te Pathian hmaah in zînga mipa zawng zawng chu kum khatah vawi thum an lo lang ziah tûr a ni.

²⁴“In hmaa hnam dangte ka ûm chhuaha, in ramrite ka tihzauh hunah chuan in Pathian LALPA chibai bûka ṭum thum in kal chhûng hian tu man in ram chu rawn lâk an tum lo vang.

²⁵“Thilhlan in rawn hlanin dawidim telh chhang rawn hlân tel suh u. Kalhlên kût sa, a tûk atân a ṭhing pakhat mah dah suh u.

²⁶“I lova thlai thar hmasa ber chu LALPA, i Pathian inah han dah ang che. Kêl no chu a pui hnutein chhûm suh.”

²⁷ LALPA chuan Mosia hnênah, “Hêng thu hi ziak chhuak rawh, hêng tlawhchhan hian a ni nang leh Israel-te hnêna thu ka thlun ni,” a ti a.

²⁸Mosia chu ni sawmli leh zân sawmli eng mah ei lovin LALPA bulah chuan a awm a, Lungphêkah chuan thuthlung, thupêk sâwm chu a ziak ta a.

²⁹Thupêk sâwm ziakna lungphêk keng chuan Mosia chu Sinai tlâng aṭang chuan a lo chhuk a; a hmêl chu a êng sût a, LALPA nên an inbiak avânga êng a ni, ani erawh chuan chu chu a hre lo.

³⁰Arona leh Israel mipui chuan Mosia hmêl êng an hmuh chuan a bulah an kal hnai ngam ta lo va.

³¹Mosia chuan a au va, Arona leh Israel hotute chu an lo kîr a, Mosia chuan thu a lo hrilh a.

³²Chumi hnu chuan Israel fate chu an vaiin Mosia bulah chuan an lo kal a, Sinai tlânga LALPA thupêk zawng zawng chu a lo hrilh a.

³³Mosian thu a sawi zawh chuan khuhnain a hmai chu a khuh a.

³⁴LALPA nêna inbe tûra Inbiakna bûka a kal apiangin, a lo chhuah leh hma chu, hmai khuhna chu a hlîp ṭhîn; a lo chhuahin Israel fate hnêna hrilh tûr thupêk chu a hrilh ṭhîn a.

³⁵Israel faten Mosia hmêl an hmuhin a lo êng ta ṭhîn a, Pathian nêna inbe tûra a kal leh hma chu a inkhuh ṭhîn.