Read Mizo Lushai Exodus 35 Bible Online

Exodus 35 - Mizo Lushai bible

Exodus 35

¹Mosia chuan Israel fa pungkhâwmho chu a ko khâwm a, an hnênah, “Hêng hi in tih tûra LALPA thupêk chu a ni.

²Ni ruk chhûng hna in thawk ang a, a ni sarih ni erawh chu in tân ni serh a ni ang a, LALPA chawimawi nân urhsûn taka hman tûr a ni; hna thawk lui chu tihhlum tûr a ni.

³In awmna apiangah sabat ni chuan mei pawh in chhêm tûr a ni lo,” a ti a.

⁴Mosia chuan Israel fa pungkhâwmho hnênah, “LALPA chuan heti hian a ti:

⁵LALPA tân thilpêk han pe rawh u, mahni phal ang ang han pe rawh u; rangkachak te, tangkarua te, dâr te,

⁶la dumpâwl te, la senduk te, la senlâr te, la zai sîn te, kêl hmul te,

⁷berâm vun tihsen te, savun ṭha chi te, sitim thing te,

⁸khâwnvâra chhit tûr oliv hriak te, thih tûr hriak te, hâl tûr thil rimtui te,

⁹soham lung te leh âwmbela dah tûr lungmantam te rawn dah khâwm rawh u.

¹⁰“In zînga mi themthiam rual lo thawk sela, LALPA sawi angin hêng zawng zawng hi rawn siam rawh se.

¹¹Biakbûk, a chung khuhna leh a thuahna te, a inbahna te, a bang tun te, a kaihna te, a ban te, a bulṭhut te,

¹²Thuthlung Bâwm leh a zâwnfung te, bâwm chhîn leh a zâr hliahna tûr puan te,

¹³dawhkân leh a zâwnfung te, a hmanrua zawng zawng leh chhang serh te,

¹⁴khâwnvâr bâwr chhit ên tûr leh a bungrua te, a chhitna tûr lu bâwk leh a tui tûr hriak te,

¹⁵rimtui hâlna dawhkân leh a zâwnfung te; hriak thih tûr te, hâl tûr thil rimtui te, Biakbûk luhna kawngka puanzâr tûr te;

¹⁶thilhlan hâlna tûr maichâm, a sîra dâr tlâwn nên, zâwnfung leh a bungrua zawng zawng te, dâr chawhtawlh leh a hûnna te,

¹⁷a hungna puanzâr tûr, a ban leh a bulṭhut te, a tual kawngka luhnaa zâr tûr puan te,

¹⁸Biakbûk khen nghehna leh hungna pal khen nghehna leh a pawhna hrui te;

¹⁹Hmun Thianghlima rawngbâwltute hâk tûr thawmhnaw zeh mawi te, puithiam Arona kawr serh te, puithiam hna an thawha Arona fate hâk tûr kawr te siam rawh se,” a ti a.

²⁰Israel fa pungkhâwmho chu an ṭîn darh a,

²¹Biakbûk sakna tûr, a chung khuhna tûr te leh thawmhnaw thianghlim tûr te chu mahni phal ang ang LALPA hnênah chuan an rawn hlân a.

²²Pêk châkna nei chu a hmei a pain an lo kal a, hnâr vuah te, bengbeh te, pinmawi te, ṭhi te, rangkachaka siamte chu rangkachak tlangte nên LALPA tân an rawn pe a.

²³La dumpâwl te, la senduk te, la senlâr te, la zai sîn te; kêl hmul te, berâm vun tihsen te, savun ṭha chi neite chuan an rawn pe bawk a.

²⁴Tangkaruate pawh a pe thei chuan LALPA chu an rawn pe a; Biakbûka hman tûr sitim thing nei chuan an rawn dah bawk a.

²⁵Nu themthiam tak takte chuan la zai sîn te, la dumpâwl te, la senduk te, la senlâr te an kai a, an rawn pe a.

²⁶Nu themthiam bîkten kêl hmul an thlûr chu an rawn pe bawk a.

²⁷An hotute chuan soham lung leh lungmantam dang, efod-a dah tûr leh âwmbela târ tûr an rawn keng a.

²⁸Thil rimtui leh hriak, chhit atân te, thih atân te, hâl atân te an rawn thawh bawk a.

²⁹Mosia hnêna LALPAN siam tûra a tih siam nân Israel zînga mi, a hmei a pa, a duh apiangin thilpêk an rawn hlân bawk a.

³⁰Mosian Israel fate hnênah, “Juda hnam zînga mi, Hura tupa Bezalela, Uria fapa chu LALPA chuan a thlang ta.

³¹Finna te, hriatna te, hmangchâng hriatna te, engkim siam tûra kut themthiamna nei tûrin Pathian Thlarauvin a pe a ni.

³²Rangkachak te, tangkarua te, dâr tea thil mawi tinrêng ruahmana siam thiamna te,

³³phûm atân lungmantam zai mawi te, thing ker mawite leh thil chi tinrêng siam thiamna te a pe a ni.

³⁴Dana thlaha mi, Ahisamaka fapa Oholiaba nên, an pahnihin, mi dang hnêna thil siam zirtîr thiamna pawh LALPA chuan a pe bawk a ni.

³⁵Thil ker thiam te, thil mawi hria ten puan zai sîn, a dumpâwl te, a senduk te, a senlâr tea puan tah thiamte anga engkim tih thiamna a pe a ni. Engkim an siam thiam a, a rel vêl pawh thiam tak an ni.