Read Mizo Lushai Exodus 36 Bible Online

Exodus 36 - Mizo Lushai bible

Exodus 36

¹“Bezalela te, Oholiaba te leh mi themthiam rual, LALPA chênna Biakbûk atâna thil ṭûl zawng zawng siam dân thiamna leh finna LALPA pêkte chuan LALPA thupêk ang chuan engkim an siam tûr a ni,” a ti a.

²Mosia chuan Bezalela leh Oholiaba chu, thawk ve châk themthiam rual, LALPA thilpêk hmang hriatna dawngte nên a ko khâwm a.

³Hmun Thianghlima rawngbâwl nâna Israel fate thilpêk an rawn dah chu Mosia hnên aṭangin an la a, an siam ta zêl a. Tûk tin, Mosia hnênah, phal takin thilpêk an rawn keng zêl bawk a.

⁴Hmun Thianghlima thil hman tûr siamin tûk tin an thawk bawk a.

⁵Mosia hnênah chuan, “Hmun Thianghlima rawngbâwl nâna LALPAN siam tûr a tih siamna atâna mamawh aia tam daih miten an rawn pe tawh a ni,” an ti a.

⁶Mosian thu a pe a, riahhmunah chuan an tlângau va, “Mipa pawhin, hmeichhia pawhin, Hmun Thianghlim atân tu man thilpêk rawn pe tawh suh se,” tiin. Tichuan, LALPA hnêna thilpêk rawn pe zêl lo tûrin mipui chu an khap ta a.

⁷An pêk sa chuan an siam tûr chu a daih zân tawh a ni, hman sên rual a ni tawh lo.

⁸Themthiam rual zînga a thiam thiam chuan Biakbûk chu an siam ta a; chung zâr tûr puan sâwm, la zai sîn thlûr, a dumpâwl te, a senduk te, a senlâr te an tah a, cherub lemte mawi takin an zep a.

⁹Puan pakhat chu tawng sawmhnih leh pariata sei, tawng li-a hlai intiat vek a ni.

¹⁰Puan panga chu an ṭhui zawm a, a dang panga pawh chu a hranin an ṭhui zawm a.

¹¹Panga ṭhui khâwm sîr ber tlângah chuan a beng atân la dumpâwl kual an vuah a; panga ṭhui khâwm dang tlângah pawh beng chu an vuah bawk a.

¹²Beng sawmnga ve ve an vuah a, a bengte chu a inzâwn thliah a ni.

¹³Rangkachakin thil kawm an siam a, thil kawm chuan puan ṭhui khâwm pahnih chu an bah zawm a, a in chung chu phêk khat a ni ta a.

¹⁴Biakbûk chung thuahna tûr kêl hmul pawh sâwm leh pakhat an tah bawk a.

¹⁵Puan pakhat chu tawng sawmthuma sei, tawng li-a hlai a ni; puan chu a vaiin a intiat vek a.

¹⁶Panga chu an ṭhui khâwm a; a dang paruk pawh chu a hrangin an ṭhui zawm a.

¹⁷Puan panga ṭhui khâwm sîr ber tlângah chuan beng sawmnga an siam a; paruk ṭhui khâwm tlângah pawh beng sawmnga an siam bawk a.

¹⁸Dârin thil kawm sawmnga an siam a; chu chuan kêl hmul puan ṭhui khâwm pahnih chu phêk khatah an bah zawm a.

¹⁹Biakbûk chung thuah nawn lehna tûr berâm vun tihsen leh savun ṭha chi chu an siam bawk a.

²⁰A bang thuahna tûr sitim thing an rem khâwm bawk a.

²¹An thil rem phêk khat chu tawng sâwma sâng, tawng khat leh a chanvea hlai a ni.

²²A phêk tlâng kâwmna pahnih chu a hmâwr a zuih a, chu chu a bulṭhuta a inphunna tûr a ni; chutiang hmâwr zuih chu an neihtîr vek a ni.

²³Biakbûk chhim lam bang thuahna tûrin chutiang phêk sawmhnih chu an siam a.

²⁴A bulṭhut tûr tangkaraw tlang ker khuar sawmli an chhûng a, thing rem khâwm pakhat chu bulṭhut pahnihah a inphun a ni.

²⁵Biakbûk hmâr lam bang thuahna tûrin phêk sawmhnih an siam bawk a,

²⁶bulṭhut tangkaraw tlang ker sawmli an chhûng bawk; phêk khat chu bulṭhut pahnihah a inphun zêl a ni.

²⁷Biakbûk kawmchâr, khawthlang lamah bang thuahna tûr phêk ruk an rem bawk a.

²⁸A kila ṭang tûr phêk hnih an siam bawk.

²⁹A kila ṭang tûra siamte chu a bul aṭanga a lêr thlengin an kilh zawm a.

³⁰Tichuan, kawmchâr bang thuahna tûr chu phêk riat a ni a, a bulṭhut tûr tangkaraw tlang sâwm leh paruk kerah chuan a sîr zuihte kha a inphun thliah a ni, phêk khat chuan bulṭhut pahnih a nei zêl a ni.

³¹A bangrel tûr sitim thing tlâwn panga zêl, hmâr lamah te, kawmchâr lamah te chuan an dah a,

³³a bangrel laita ber chu biakbûk bang tluan chuan an inzawmtîr a ni.

³⁴A bang thuahna thing rem khâwmte chu rangkachak tuiin an luan a, a bangrel rawlhna tûr rangkachak beng te an siam bawk a, a bangrel pawh rangkachaka luan a ni.

³⁵La dumpâwl te, la senduk te, la senlâr te, la zai sîn thlûrte chu inchawih mawi takin an tah a, cherub lem mawi tak tak an zep bawk a; chu chu pindan zârah an hmang a.

³⁶Sitim thing ban pali, rangkachaka luan, a inphunna tûr tangkaraw tlang pali nên an siam bawk a.

³⁷Biakbûk luhnaa zâr tûr la dumpâwl te, la senduk te, la senlâr te leh la zai sîn thlûr te, inchawih mawi takin an tah a,

³⁸a zârna tûr Sitim thing ban panga, thil bahna tûr kâwm nei ṭheuh an siam a, a chhîp chu rangkachakin an tuam a, a puan zârna tûr rangkachak tlâwn an vuah bawk a, a bulṭhut tûr dâr tlang panga an siam bawk a.