Read Mizo Lushai Exodus 37 Bible Online

Exodus 37 - Mizo Lushai bible

Exodus 37

¹Bezalela chuan Thuthlung Bâwm chu a dung tawng hnih leh a chanve, a vâng tawng khat leh a chanve, a sân lam tawng khat leh a chanve Sitim thingin a siam a.

²A chhûng lam leh pâwn lam chu rangkachak hlîr hlakin a luan chhuak ve ve a, a kotlângte chu rangkachak phêkin a kâwm a.

³A zâwnfung rawlhna tûr rangkachak beng pali a chhûng bawk, bâwm sîr lehlam lehlamah chuan pahnih ve vein a vuah a.

⁴A zâwnfung tûr Sitim thing tlâwnte chu rangkachaka luan bawk a ni.

⁵A zâwnfungte chu a sîr lehlam lehlama bengah te chuan a vuah a,

⁶bâwm chhîn tûr, rangkachak hlîr hlakin tawng hnih leh a chanvea sei, tawng khat leh a chanvea hlai a siam a.

⁷A chhîn dung lam hmâwr ve ve-ah chuan rangkachaka siam cherub lem a chhera chher a dintîr a, a chhîn nên chuan a inzawm a, sakhat a ni.

⁹Cherub-te chuan thla an zâr a, Thuthlung Bâwm chhîn chu an thla chuan a khuh a; inhmatawnin an ding a, a chhîn chu an bih a.

¹⁰Sitim thing dawhkân, a dung tawng hnih, a vâng tawng khat, tawng khat leh a chanvea sâng a siam bawk a.

¹¹Rangkachak hlîr hlakin a luan a, a kotlâng chu a vêlin rangkachakin a kâwm a.

¹²A tlâng khuahna, rangkachak phêk kutphah bawk, a tlângah lallukhum ang a tlarin a bel chhuak a.

¹³A zâwnfung rawlhna tûr rangkachak beng pali a chhûng a,

¹⁴dawhkân tlâng tuamna bulah chuan a vuah a.

¹⁵A zâwnfung tûr, Sitim thing tlâwn a siam a, rangkachakin a luan a.

¹⁶Thlêng te, bêl te, uain thâwl te, uain bunna tûr no te, rangkachak hlangin a siam bawk a.

¹⁷Rangkachak hlîr hlakin khâwnvâr dahna zâr sarih nei a chher a, a bulṭhut leh a kûngpui chu rangkachak tlanga chher a ni; a lu bâwk te, a pangpâr kuhmûm lem te, a pâr parh lem te nên chuan an inzawm vek a ni.

¹⁸Zâr paruk, a kûngpui aṭanga pêng, a sîr lehlam lehlamah pathum ve ve a awm a,

¹⁹a zâr hmâwr chhîp, a lu chu, theite pâr ang a ni; a sîra kuangah chuan a kuhmûm leh pâr parh lem pathum a awm ṭheuh va.

²⁰A kûng zidingah chuan a lu bâwk a awm a, kuhmûm leh pâr parh pali lem a awm bawk.

²¹A zâr chungnung leh hnuai zâwk inkâr, a kûngpuiah chuan kuhmûm lem a awm zêl a.

²²Hêng kuhmûm te, a lu bâwk te, a zârte hi a inzawm vek a, sakhat a ni. Rangkachak hlîr hlak tlang khat aṭanga chher a ni.

²³A khâwnvâr bûr, a lu bâwk pasarih te, chaicheh te, meivâp dahna te, rangkachak hlîr hlakin a siam a.

²⁴A khâwnvâr bâwr leh a hmanrua zawng zawng siam nân rangkachak kg. sawmnga vêl an hmang a ni.

²⁵Sitim thing dawhkân kil li nei, tawng khat bial, tawng hniha sâng a siam bawk a, a kila kite nên chuan a inzawm vek a ni.

²⁶Rangkachak hlangin dawhkân leh a ki chu a luan a, a tlâng chu rangkachakin a tuam a.

²⁷A zâwnfung rawlhna tûr rangkachak beng a chher a, a tlâng kâwmna bul, a sîr tuakah pahnih ve ve a vuah a,

²⁸A zâwnfung tûr sitim thing tlâwn a siam a, rangkachakin a luan a.

²⁹Hriak thianghlim thih tûr te, rimtui hâl tûr, tel rimtui anga chawhpawlh te a siam bawk a.