Read Mizo Lushai Exodus 38 Bible Online

Exodus 38 - Mizo Lushai bible

Exodus 38

¹Thilhlan hâlna tûr maichâm, Sitim thingin a siam bawk a; kil li nei, tawng nga bial, tawng thuma sâng a ni.

²A kilah ki lawr chho a siam ṭheuh a, maichâm nên chuan an inzawm tlat vek a ni; dârin maichâm leh a ki chu a tuam a.

³maichâma hman tûr vut bâwm te, vutlawh te, maihûn te, thîrkut kawm te, meilawh te dârin a siam a.

⁴Dâr tlâwn ram a tlângah chuan a bel kual a, a maichâm zâtve dâwn lai a awh a.

⁵Zâwnfung rawlhna tûr beng pali a chhûng a, kil tinah a dah thliah a.

⁶A zâwnfung tûr Sitim thing tlâwn a siam a, dârin a tuam a.

⁷Maichâm bang sir tuaka bengah chuan zâwnfungte chu a rawlh a. Maichâm chhûng chu a kawrawng, a bang chu thingphel a ni.

⁸Inbiakna bûk kawngka bula rawngbâwl ṭhîn nuhovin dârthlalanga an hman ṭhin dâr tle mi aṭangin dâr chawhtawlh leh a hûnna chu a siam a.

⁹La zai sîna tah puanin Biakbûk chu a hung a.

¹⁰Biakbûk chhim lam hung nân tawng zaa sei puan a hmang a, Ban sawmhnih leh a bulṭhut dâr tlang sawmhnih, thil bahna tûr kawm te, a zâr nâna tangkaraw tlâwn te a siam a.

¹¹Biakbûk hmâr lamah pawh puan tawng zaa sei, ban sawmhnih, a bulṭhut dâr tlang sawmhnih leh thil inbahna tûr kawm leh tangkaraw tlâwn a siam bawk a.

¹²Biakbûk kawmchâr khawthlang lamah chuan puan tawng sawmngaa sei a zâr a, ban sâwm leh a bulṭhut dâr tlang sâwm a siam a, a bana thil kawm leh puan bahna thil tlâwn chu tangkaruaa siam a ni.

¹³Khawchhak lam pawh tawng sawmngaa zau a ni.

¹⁴Kawngka zau lam chu tawng sawmhnih a ni a, a sîr tawna zârah puan tawng sâwm leh panga ve ve a hmang a, ban pathum leh a bulṭhut pathum ve ve awmin a siam bawk a.

¹⁶A hungna puanzâr chu la zai sîn thlûra tah vek a ni.

¹⁷A ban bulṭhut chu dâr a ni a, a kâwm te, a ngul te, a ban chhîp tuamna te chu tangkarua vek a ni.

¹⁸A hungna ban zawng zawng chu tangkaraw tlâwna vuak zawm vek a ni. A kawngka luhnaa puanzâr chu la zai sîn thlûr, a dumpâwl te, a senduk te, a senlâr te inchawih mawi taka tah a ni.

¹⁹A puanzâr chu tawng sawmhniha sei, tawng ngaa sâng, Biakbûk hungna puanzâr dang ang bawk a ni. Ban pali leh a bulṭhut dâr tlang pali te, a bahna kawm te, a ban lu bâwk te, a vuak zawmna tangkaraw tlâwn te chu tangkarua vek a ni.

²⁰Biakbûk leh a hungna kilh khâwmna chu dâr vek a ni.

²¹Thupêk Sâwm ziakna lungphêk an dahna Biakbûk chu a sak nân hetiang hi an hmang. Mosia thupêkin puithiam Arona fapa Ithamara hovin Levia chiten a zât hi an chhût chhuak a ni.

²²Juda hnama mi, Hura tupa Bezalela, Uria fapa chuan Mosia hnêna LALPA thupêk ang zawng zawng chu a siam a.

²³A thawhpui, Dan hnam, Ahisamaka fapa Oholiaba chu thil ker thiam, thil mawi hria, la zai sîn, a dumpâwl te, a senduk te, a senlâr tea tah pawlh dân hmang hre tak a ni a.

²⁴Biakbûk thianghlim sak nâna LALPA hmaa rangkachak an rawn dah chu chutih hun laia khawtlâng hman bûklung dik taka bûkin kg. sângkhat a ni.

²⁵Chhiarpui an neiha mi tin thawh zât tûr an tuk anga tangkarua an rawn thawh chu khawtlâng hman lai bûklung dik taka bûkin kg. sângthum leh zali leh sawmthum a tling.

²⁶Hei hi kum sawmhnih tling chin chhiarpuia chhiar tel mi nuairuk leh sângthum leh zanga leh sawmngaten sekel chanve an rawn pêk tluk kha a ni.

²⁷Pindan puanzâr ban leh bang thuahna bulṭhut chu pakhat pawh tangkarua kg. sawmthum leh pali-a rit zêl a ni a, a vaiin kg. sângthum leh zali an hmang a ni.

²⁸An hman bang tangkarua kg. sawmthum chuan Bezalelan puan zârna tlâwn te, a kawm te, a ban lu tuamna te a siam a.

²⁹LALPA tâna dâr an pêk chu kg. sânghnih leh zali leh sawmhnih leh panga a tling a.

³⁰Hei hian Biakbûk hungna ban bul te, maichâma bel te, dâr tlâwn ram te, a bungbêl te, a luhna ban bul te,

³¹Biakbûk leh a hungna khen nghehna zawng zawng a siam a.