Read Mizo Lushai Exodus 39 Bible Online

Exodus 39 - Mizo Lushai bible

Exodus 39

¹Hmun Thianghlima rawng an bâwl huna puithiamho hâk tûr mawi tak leh Arona puithiam kawr serh chu LALPA thupêk ang chuan la dumpâwl te, a senduk te leh a senlâr tein an siam a.

²Efod chu la zai sîn, a dumpâwl te, a senduk te, a senlâr te leh rangkachak zai tein an tah a.

³Rangkachak chu pan takin an chhu pêr a, la zai sîn te, a dumpâwl te, a senduk te, a senlâr te nêna zeh tûrin an zai thlêr seng a.

⁴Dârbak pahnih an siam a, efod kilah chuan a hmâwr an ṭhui belhbâwm a, chu chuan a man bet a ni.

⁵Kâwnga efod hrên behna tûr, efod ang chiah an tah a, Mosia hnênah LALPA thupêk ang khân efod nên an tah zawm a.

⁶Soham lungmantam chu rangkachakah an phûm a, Jakoba fa sâwm leh pahnih hming chu mawi takin an ker a.

⁷LALPA thupêk ang ngei khân efod dârbakah chuan an vuah a, chu chu Israel hnam sâwm leh pahnih entîrna a ni.

⁸Efod siam nâna an thil hman, la zai sîn thlûr te, a dumpâwl te, a senduk te, a senlâr te leh rangkachak zaite hmangin âwmbel pawh chu inchawih mawi takin an tah bawk a.

⁹An thlep a, thleh hnu chuan kil li nei, khâp khat bial a ni.

¹⁰Lungmantam tlar li an vuah a, tlar khatnaah chuan Odam te, Pitda te, Bareket lung te an dah a;

¹¹tlar hnihnaah chuan Nopek te, Safir te, Jahalom lung te an dah a.

¹²Tlar thumnaah chuan Lesem te, Sebo te, Aklama lung te an dah a;

¹³tlar linaah chuan Tarsis te, Soham te, Jaspi lung te an dah a, lungmantam hi rangkachaka phûm tlar ṭhet a ni.

¹⁴Lung pakhatah Israel hnam pakhat hming a chuang zêl a, Israel hnam sâwm leh pahnih aiawh atân tih a ni.

¹⁵Âwmbel phuar behna tûr rangkachak hlîr hlak khaidiat herh a siam bawk a.

¹⁶Lungmantam phûmna rangkachak pahnih leh rangkachak beng pahnih an siam chu âwmbel kil chung lamah an vuah ve ve a.

¹⁷Rangkachak khaidiat herh chu a bengah chuan an thlung a;

¹⁸a hmâwr lehlam chu lungmantam phûmna rangkachak pahnih nên an zawm a; tichuan, âwmbel thlunna chu efod dârbak hma lamah a inthlung a ni.

¹⁹Rangkachak beng dang pahnih an siam a, âwmbel kil hnuai lam, a chhûng lamah, Efod depah an vuah a.

²⁰Rangkachak beng dang pahnih a siam a, efod dârbak bul lam inbelna laia kâwnghrên chungah a vuah a.

²¹Mosia hnêna LALPA thupêk angin âwmbela rangkachak beng leh efod rangkachak beng chu la dumpâwlin an suih belhbâwm a; tichuan, a kâwnghrên chungah âwmbel chu a bei tlat a ni.

²²Efod hnuaia kawrfual chu la dumpâwl hlîra tah a ni.

²³Lu rawlhna tûr a laiah an rek a, a reh tlang chu a ṭeh loh nân puan themin an chep a.

²⁴A kawrfual tlângah chuan la zai sîn te, a dumpâwl te, a senduk te, a senlâr tea siam theibuhfai lem an khai a,

²⁵rangkachak tengeng nên inthlâk chiatin an khai a ni.

²⁶Mosia hnêna LALPA thupêk angin rawngbâwlnaa hâk atân an siam a.

²⁷Arona leh a fate tân kawrhnuai te,

²⁸diar te, lukhum te, kekawr tûrte la zai sînin an tah a.

²⁹La zai sîn thlûr te, a dumpâwl te, a senduk te, a senlâr te inchawih mawi takin kâwnghrên tûr an tah bawk, Mosia hnêna LALPA thupêk ang khân.

³⁰Rangkachak hlang hlakin lu hrên an siam bawk a; chutah chuan, “LALPA Pual” tih an ziak a.

³¹Diar hma lamah chuan la dumpâwl hrualin Mosia hnêna LALPA thupêk ang chuan an thlung bet a.

³²Biakbûk leh thil dangte chu an siam zo ta a. Israel fate chuan Mosia hnêna LALPA thupêk ang zawng zawng kha an ti vek a.

³³Mosia hnênah Biakbûk siamna tûr siam sa chu an rawn la a; thil kawm te, thingphel rem te, a ban te, a chehna te, a bulṭhut te,

³⁴a chung khuhna berâm vun tihsen te, savun ṭha chi te, puan zâr tûr te,

³⁵Thuthlung Bâwm leh a chhûnga lungphêk te, a zâwnfungte leh a chhîn te,

³⁶dawhkân leh a bungrua zawng zawng leh Pathian tâna chhang serh te,

³⁷khâwnvâr bâwr, rangkachak hlîr hlaka siam, a chhitna leh a bungraw dang te, a chhit tûr hriak te;

³⁸rangkachak maichâm te, thih tûr hriak te, rimtui hâl tûr te, Biakbûk luhna kawngkaa puanzâr tûr te;

³⁹dâra tuam maichâm leh a hûnna te;

⁴⁰a hungnaa zâr tûr puan te, bante leh a bulṭhut tûr te, a hung chhûng luhna kawngkaa puanzâr leh a thlunna hrui te; Biakbûk khennghehna leh Biakbûk thuam nâna thil ṭûl zawng zawng te;

⁴¹Hmun Thianghlima puithiamho hâk tûr thawmhnaw mawi tak tak te, puithiam Arona leh a fate kawr serh te chu an rawn la a.

⁴²Israel fate chuan Mosia hnêna LALPA thupêk ang chiah khân engkim an ti a.

⁴³Mosia chuan ngun takin a lo en vek a, LALPA thupêk ang chiahin an siam tih a hmuh chuan malsâwm tûrin Pathian hnênah a hlân a.