Read Mizo Lushai Exodus 4 Bible Online

Exodus 4 - Mizo Lushai bible

Exodus 4

¹Mosia chuan a chhâng a, “Ngai teh, ka thu an awih lo vang a, ka aw an ngaithla hek lo vang, ‘LALPA chu i hnênah a inlâr ngût lo vang,’ min tihsan mai ang,” a ti a.

²LALPA chuan a hnênah, “I ken kha eng nge ni?” a ti a. “Tiang” tiin a chhâng a.

³“Leiah han tlûk teh,” a ti a. Leiah a han tlûk a, rûlah a chang ta mai a; hlauvin Mosia chu a tlânchhia a.

⁴LALPA chuan Mosia hnênah, “I kutin ban la, a meiah man rawh,” a ti a. A han ban a, a meiah a man a, a kutah chuan tiang a ni leh ta mai a.

⁵“Chutianga i tih chuan an pate Pathian, Abrahama Pathian, Isaka Pathian, Jakoba Pathian chu i hnênah a inlâr ngei a ni tih an hria ang,” a ti a.

⁶ LALPA chuan heti hian a ti bawk a, “I kutin i kawrâwm kha zen teh,” a ti a. A han zen a, a phawi leh chuan a kut chu vûr anga vârin a lo phâr ta a.

⁷“I kutin i kawrâwm kha zen leh teh,” a ti a. A kawrâwm chu a zen leh a, a han lâk chhuah chuan a lehlam ang chiah a lo ni leh ta a.

⁸ LALPA chuan, “I thu an awih duh lohva, thil mak i tih hmasak an awih duh loh pawhin a hnuhnûng zâwk tal hi an awih ang chu.

⁹Hêng thil mak pahnihte hi an awih duh lohva, i aw an ngaihthlâk duh loh fo chuan, Nail lui tui suak la, leichârah leihbua ang che; lei a thlenah i tui suah chu thisenah a chang ang,” a ti a.

¹⁰Mosia chuan LALPA hnênah, “Aw LALPA, min biak hma pawhin ṭawnghmang thiam mi ka ni lo va, ka ṭawng a bah a, ka dang a âwk bawk a ni,” a ti a.

¹¹LALPA chuan a chhâng a, “Tu nge mihring kâ hi siamsak? Tu nge a beng tihngawnsaka, ṭawng theih lohtîr? Tu nge tihdelsaka, tihvârsaktu? Kei LALPA hi ka ni lâwm ni?

¹²Chuvângin, kal mai rawh, i kâ chu ka thuam ang a, sawi tûr ka zirtîr dâwn che nia,” a ti a.

¹³Mosia chuan, “Aw LALPA, i mi duhzâwng dang tîr mai teh,” a ti a.

¹⁴Mosia chungah LALPA chu a thinur ta hle a, “Levia chi, i u Arona a awm a ni lâwm ni? Ṭawnghmang a thiam hle tih ka hria a ni. Tin, ngai teh, nangmah tâwk tûr chein a lo kal a, a hmuh che chuan a lâwm hle ang.

¹⁵A hnênah thu i sawi ang a, sawi tûr i hrilh zêl ang a, I kâ leh a kâ chu ka thuam ang a, in tih tûr chu ka zirtîr zêl ang che u.

¹⁶Mipui hnêna i thu sawi chhâwngtuah a ṭang ang a, i tân kâ ang a ni ang a, a tân nang pawh Pathian ang i ni dâwn nia.

¹⁷I tiang hi keng la, hei hian thil mak ti ṭhîn ang che,” a ti a.

¹⁸A puzawn Jethroa hnênah Mosia chu a kal a, a hnênah, “Ka unau, Aigupta rama awmte zu tlawh tûrin khawngaih takin min kaltîr teh,” a ti a. Jethroa chuan Mosia hnênah, “Dam takin zu kal ang che,” a ti a.

¹⁹Midian ramah LALPAN Mosia hnênah, “Kal la, Aigupta ramah lêt tawh rawh, nangmah thah tumtute kha an thi zo tawh e,” a ti a.

²⁰Mosia chuan a nupui leh a fapate chu sabengtung chungah a chuantîr a, Aigupta ram lamah chuan a kîr ta a. Mosia chuan Pathian tiang kha a keng zêl a.

²¹LALPA chuan Mosia hnênah, “Aigupta ram i thlen hunah, thil mak ka tihtîr tûr zawng zawng che chu Farawa hmaah ti ang che. Amaherawhchu, ka tiluhlul ang a, ka mite chu a kaltîr mai lo vang.

²²Farawa hnênah chuan heti hian i ti tûr a ni: ‘LALPA chuan heti hian a ti: Israel chu ka fapa, ka fa tîr a ni.

²³Ka fapa chu ka rawngbâwl tûrin kaltîr rawh ka ti che a, i kaltîr duh lo vei a; ngai teh, i fapa, i fa tîr chu ka tihhlumsak ang che, a ti e,’ ti ang che,” a ti a.

²⁴Tin, an riahna tûr bûk kawnga an kal lai chuan LALPA chuan a lo tâwk a, thah a lo tum a.

²⁵Zipori chuan meilung a la a, a fapa serh vun hmâwr chu a tansak a, Mosia malpuiah a tât a, “Thisen lâwm tak pasal i nih hi le,” a ti a.

²⁶LALPA chuan Mosia nunna chu a zuah ta a. Zipori chuan “Serh tan thu-a thisen chhuah lâwm tak pasal i nih hi,” a ti bawk a.

²⁷ LALPA chuan Arona hnênah, “Mosia hmuak tûrin thlalêrah chhuak rawh,” a ti a. A kal ta a, Pathian tlângah chuan a va hmu a, a fâwp a.

²⁸Mosia chuan Arona hnênah LALPA tirhna thute chu a hrilh a.

²⁹Mosia leh Arona chu an kal a, Israel fate zînga an upate chu an khâwm a,

³⁰Arona chuan Mosia hnêna LALPA thu sawi zawng zawng chu a hrilh a; thil makte pawh an hmaah chuan a ti a.

³¹Mite chuan an ring a, LALPA chuan Israel fate chu a hre reng a, an hrehawm tuarte chu a hmu a ni tih an hriat chuan an kûn a, chibai an bûk a.