Read Mizo Lushai Exodus 40 Bible Online

Exodus 40 - Mizo Lushai bible

Exodus 40

¹ LALPA chuan Mosia hnênah,

²“Thla hmasa ber, ni khatah LALPA chênna tûr Biakbûk hi din ang che u.

³Thuthlung Bâwm, thupêk sâwm ziak awmna lungphêk chu a chhûngah dah ula, a pindan chu puan zâr hnan rawh u.

⁴Dawhkân chu la lût ula, a bungruate chu a chungah dah ula; khâwnvâr bâwr pawh la lût ula, a dahna tûrah dah rawh u.

⁵Rangkachak maichâm, rimtui hâlna tûr chu, Thuthlung Bâwm hmaah dah ula, Biakbûk luhna kawngkaa puan chu zâr rawh u.

⁶Hâlral hlanna maichâm chu Biakbûk kawtah dah ula,

⁷maichâm leh Biakbûk inkârah dâr chawhtawlh chu hûng ula, tui dah bawk ang che u.

⁸A tual chu hung ula, a luhna kawngka puanzâr pawh zâr rawh u.

⁹Biakbûk leh a chhûnga bungrua zawng zawng chu hriak thianghlim chulh la; tichuan, an lo thianghlim ve tawh ang a.

¹⁰Maichâm leh a bungbêlah te hriak thianghlim chu chulh bawk la, an lo thianghlim vek tawh ang.

¹¹Insilna dâr chawhtawlh leh a hûnna pawh hriak thianghlim chu hnawihin thian thianghlim ang che.

¹²Arona leh a fate chu Biakbûk hung chhûngah ko lût la, dân angin insil rawh se.

¹³Arona chu puithiam thawmhnaw bel la, hriak thih la, puithiam hna thawk tûrin serh hrang rawh.

¹⁴A fate pawh ko lût la, kawrfual chu hâktîr ang che.

¹⁵An pa hriak i thih ang khân anni pawh puithiam hna thawk tûrin hriak thih ang che; hriak thih an nih hnu chuan puithiam an ni kumkhua tawh ang,” a ti a.

¹⁶ LALPA thupêk ang chiah chuan Mosia chuan a ti a.

¹⁷Aigupta an chhuahsan kum hnihna, thla hmasa ber ni khat ni chuan Biakbûk chu a sa fel a.

¹⁸Mosia chuan a bulṭhutte chu a hûng a, a bangte chu a tung a, a bangrelte a vuah a, a bante a phun a.

¹⁹Biakbûk chung puan pawh a zâr a, a thuahnate pawh a kaih a. LALPA thupêk ang khân a ti a.

²⁰Lungphêk pahnih chu Thuthlung Bâwmah a khung a, a zâwnfungte chu a rawlh a, a chhinna chuan a chhîn a.

²¹Biakbûk chhûngah Thuthlung Bâwm chu a dah a, pindan puan chu a zâr hnan a, LALPA thupêk ang zêl chuan a ti a.

²²Biakbûk chhûng, pindan pâwn zâwk hmâr lamah chuan dawhkân chu a hûng a,

²³LALPA thupêk angin a chungah chhang serh chu a dah a.

²⁴Chhim lamah khâwnvâr bâwr chu dawhkân epah a hûng bawk a.

²⁵LALPA hmaah chuan a thupêk angin khâwnvâr chu a chhi a.

²⁶Rangkachak maichâm chu pindan puanzâr bulah chuan a hûng a.

²⁷LALPA thupêk angin thil rimtuite chu a hâl a.

²⁸Biakbûk luhna kawngka puanzâr chu a zâr a.

²⁹Puanzâr pâwn, Biakbûk tualah chuan, hâlral hlanna maichâm chu a hûng a; chutah chuan hâlral thilhlan leh buhbâl thilhlante chu a hlân a.

³⁰Dâr chawhtawlh leh a hûnna chu Biakbûk leh maichâm inkârah chuan a dah a, tui a chhûng khat a.

³¹Chutah chuan Mosia te, Arona te leh a fate chuan an kut leh ke an sil a.

³²Biakbûk chhûngah emaw, maichâmah emaw an kal dâwn apiangin LALPA thupêk angin an insil ṭhîn a ni.

³³Mosia chuan Biakbûk leh maichâm chu a hung kual a, a hung chhûng luhna kawngka puanzâr pawh chu a zâr bawk a. Tih tûr zawng zawng chu a ti zo ta a.

³⁴Inbiakna bûk chu chhûm chuan a chîm a, Biakbûk chhûng chu LALPA ropuinain a khat ta a.

³⁵Chuvâng chuan, bûk chhûngah Mosia chu a lût thei lo, LALPA ropuinain a khat tlat a ni.

³⁶Chhûmin Biakbûk chu a kiansan veleh Israel-te chuan an bûk an sawn ṭhîn.

³⁷Chhûmin a chîm chhûng chu an insawn lo.

³⁸Thlalêra an vah chhûng zawng khân Israel-te mit hmuhah LALPA chhûm chuan chhûnah bûk chu a chîm a, zânah zânkhuain meialh a ni thung a.