Read Mizo Lushai Exodus 6 Bible Online

Exodus 6 - Mizo Lushai bible

Exodus 6

¹ LALPA chuan Mosia hnênah, “Farawa chunga ka thiltih tum i hmu dâwn ta e; anmahni chhuah tûrin chak takin ka nawr ang a, a ram ata a ûm chhuak ang che u,” a ti a.

²Pathianin Mosia hnênah, “LALPA ka nih hi,

³Abrahama hnênah te, Isaka hnênah te, Jakoba hnênah te El-Sadaia-in ka inlâr a; mahse, ka hming LALPA hi ka hrilh lo.

⁴An mikhualna ram, Kanan ram chu pe tûrin an hnênah thu ka tiam a.

⁵Aigupta mite bawiha tâng Israel fate mangang au thâwm chu ka hre bawk a ni; ka thuthlung pawh ka hre reng a ni.

⁶Chuvângin, Israel fate chu hrilh rawh. LALPA chu ka nih hi; Aigupta mite nghâwngkawl lak ata ka la chhuak ang che u a, an bawih ata ka chhuah ang che u. Ka bân tha chakin ka chhan chhuak ang che u a, anni chu na takin ka hrem ang.

⁷Ka mite in ni ang a, in Pathian ka ni bawk ang. Aigupta mite bawih ata ka lâk chhuah hun che u chuan kei hi in Pathian, LALPA chu ka ni tih in hria ang.

⁸Abrahama te, Isaka te, Jakoba te hnêna bân phar meuhva pêk ka tiam ramah ka hruai ang che u a, in rochan atân ka pe ang che u, LALPA ka nih hi,” a ti a.

⁹Mosia chuan Israel fate chu chutiang chuan a hrilh a; mahse, an bawih nghâwngkawl chu an tân a rih êm avâng chuan an bei a dawng a, Mosia thu chu an ngaithla duh lo va.

¹⁰ LALPA chuan Mosia chu a bia a,

¹¹“Kal la, Aigupta lal Farawa chu a ram aṭanga Israel fate chhuah tûrin va hrilh rawh,” a ti a.

¹²Mosia chuan LALPA hnênah “Israel fate pawhin ka thu an ngaithla duh lo va, Farawa phei chuan engtin nge ka thu a ngaihthlâk ang, ṭawnghmang lah ka thiam si lo,” tiin a ṭang a.

¹³LALPA chuan Mosia leh Arona hnênah, “Aigupta ram ata Israel-te hruai chhuak tûrin ka ti che u tih Israel fate leh Farawa chu hrilh rawh u,” a ti a.

¹⁴Hêng hi a chi chia an hotute chu an ni: Reubena thlahte: Hanoka, Palua, Hezrona, Karmia;

¹⁵Simeona thlahte: Jemuela, Jamina, Ohada, Jakina, Zohara, Kanan hmeichhe laka a fa Saula; chûngho chu Simeon chite chu an ni.

¹⁶Hêng hi Levia thlah chhâwng zêlte chu an ni: Gersona, Kohata, Meraria. Levia chu kum za leh sawmthum leh pasarih a dam a.

¹⁷Gersona fate: Libnia, Simeia; anni hian fa an ngah hle a.

¹⁸Kohata fate: Amrama, Izara, Hebrona, Uziela. Kohata chu kum za leh sawmthum leh pathum a dam a.

¹⁹Meraria fate: Mahlia, Musia. Hêng hi Levia thlah chhâwng zêlte an ni.

²⁰Amrama chuan a pa farnu Jokebedi nupuiah a nei a; Arona leh Mosia a hrinsak a. Amrama chu kum za leh sawmthum leh pasarih a dam a.

²¹Izara fate: Kora, Nefega, Zikria.

²²Uziela fate: Misaela, Elzafana, Sithria,

²³Nasona farnu, Aminadaba fanu Elisebi chu Aronan nupuiah a nei a. Nadaba te, Abihua te, Eleazara te, Ithamara te a hrinsak a.

²⁴Kora fate: Asira, Elkana, Abiasafa. Hêng hi Kora thlahte chu an ni.

²⁵Arona fapa Eleazara chuan Putiela fanute zînga pakhat nupuiah a nei a, Finehasa a hrinsak a. Chûngte chu Levia chi, a thlah chhûngkaw hotute chu an ni.

²⁶LALPA khân Arona leh Mosia hnênah, “Israel thlahte hi Aigupta ram ata an vaiin hruai chhuak vek rawh u” a ti a nih kha.

²⁷Mosia leh Arona hi an ni Aigupta lal Farawa hnêna, “Israel-te hi chhuah vek rawh,” titute chu.

²⁸Aigupta ramah LALPA chuan Mosia a bia a.

²⁹‘LALPA ka ni a, ka hrilh apiang che Aigupta lal Farawa hrilh ang che,” a ti a.

³⁰Mosia chuan LALPA hnênah, “Ṭawnghmang ka thiam loh tehlul nên engtin nge Farawa chuan ka thu a ngaihthlâk duh ang?” tiin a ṭang a.