Read Mizo Lushai Exodus 7 Bible Online

Exodus 7 - Mizo Lushai bible

Exodus 7

¹ LALPA chuan Mosia hnênah, “Farawa tân Pathian angah ka siam dâwn che. I u Arona hi i zâwlneiah a ṭang ang.

²Thu ka pêk apiang che i hrilh ang a, i u Arona hian Farawa a hrilh chhâwng ang; ram ata Israel-te a chhuah tûr a ni.

³Farawa chu ka tiluhlul ang a, chhinchhiahna leh thil makte Aigupta ramah ka ti ṭeuh vang.

⁴Ani chuan in thu a ngaithla duh lo vang a, Aigupta chungah kut ka thlâk ang a, ka hrem vak ang a; ka mi Israel-te chu, Aigupta ram aṭangin ka hruai chhuak ang. Aigupta ram chunga ka kut ka leka,

⁵an zînga mi Israel fate chu ka lâk chhuah hunah chuan, Aigupta mite chuan LALPA ka nih an hre mai ang,” a ti a.

⁶Mosia leh Arona chuan LALPA thupêk ang chuan an ti a;

⁷Farawa hnêna thu an sawi khân Mosia chu kum sawmriata upa a ni a, Arona chu kum sawmriat leh pathum a ni.

⁸ LALPA chuan Mosia leh Arona hnênah:

⁹“Faraw-an, ‘thil mak eng emaw tal han ti teh u,’ a lo tih chuan Arona hnênah, I tiang kha la la, Farawa hmaah tlûk rawh, rûlah a chang mai ang’ i ti dâwn nia,” a ti a.

¹⁰Mosia leh Arona chu Farawa hnênah chuan an kal a, LALPA thupêk ang chuan an ti a. Arona chuan Farawa leh a hote hmaah chuan a tiang chu a tlûk a, rûlah a chang ta a.

¹¹Farawa chuan an rama mi fing te, dawithiam te a ko va, anniho chuan mitdawivaihin an tih ang chu an ti ve ta mai a,

¹²an tiang chu an tlûk a, rûlah a chang ve ta a; mahse, Arona tiang chuan anniho tiang chu a dawlh ta vek a.

¹³LALPAN a sawi ang khân Farawa chu a tiluhlul a, an thu chu a ngaithla duh lo va.

¹⁴ LALPA chuan Mosia hnênah, “Farawa chu a luhlul hle mai a, mite chu a chhuah duh lo va ni.

¹⁵Zîngah Farawa hnênah kal ang che; lui kamah a lêng ang a, lui kamah chuan a hmuh ngei tûrah lo ding la: i tiang rûla chang kha hawl ang che.

¹⁶“LALPA, Israel-te Pathian chuan i hnênah, ‘Ka mite hi thlalêra chibai min bûk tûrin chhuah rawh,’ ti tûrin min tîr a ni. Tûn thlengin a thu i awih lo va,

¹⁷LALPA chuan heti hian a ti: A thiltih aṭangin LALPA hi tu nge a nih i hre mai ang, en ta che, ka tiang hawl hian luia tui hi ka vua ang a, thisenah a chang mai ang.

¹⁸Sanghate chu an thi ang a, lui chu a rim a chhia ang a, Aigupta mite chuan tui chu an ten ang,” a ti a.

¹⁹ LALPA chuan Mosia hnênah, “Arona chu heti hian hrilh rawh, ‘I tiang la la, Aigupta rama lui chungahte lek rawh, an luipui chungah te, luite chungah te, dîl chungahte lek rawh, thisenah a chang dâwn nia,’ ti ang che,” a ti a.

²⁰Mosia leh Arona chuan LALPA thupêk ang chuan an ti a, a tiang chu a lek a, Farawa leh a hote hmuhah chuan luia tuite chu a vua a, luia tui zawng zawng chu thisenah a chang ta a.

²¹Luia sanghate chu an thi a, lui tui chu a uih ta hluah hluah a. Aigupta mite chuan lui tui chu an in thei ta lo va; Aigupta ram pum tui chu thisenah a chang vek a ni.

²²Aigupta dawithiamte chuan mitdawivaih hmangin an ti ve ta mai a; Farawa chu a luhlul sauh va, LALPA sawi ang khân an thu chu a ngaithla duh ta lo va.

²³Farawa chu a inah a haw a, eng mah a pawisa chuang lo.

²⁴Aigupta mite chuan lui tui chu an in theih loh avângin a kamah in tûr tui an hai chhuak a.

²⁵LALPAN lui tui a vuak kha ni sarih a ni tawh a.