Read Mizo Lushai Exodus 8 Bible Online

Exodus 8 - Mizo Lushai bible

Exodus 8

¹ LALPA chuan Mosia a bia a, “Farawa hnênah kal la, a hnênah, ‘LALPA chuan heti hian a ti, ti rawh: ‘ka mite hi chhuah rawh; tichuan, ka rawng an bâwl dâwn nia.

²An kal i phal loh chuan i ram pum pui hi chungu-in ka rawn hrem ang che u.

³Luiahte chungu a khat ang a, an lo chhuak ang a, i inahte pawh an lût ang a, i mut pindan leh i khumah te, i chhiahhlawhte leh i mite inah te, i thukah te leh i chhang hmehna thlêngah te hial pawh an lo awm ang.

⁴Chungu chuan an rawn bâwm ang che, i mite leh i chhiahhlawhte pawh an rawn bâwm ang,” a ti a.

⁵LALPA chuan Mosia hnênah, “Arona chu heti hian hrilh rawh: ‘I tiang kha lui chungah te, tui kawngah te, dîl chungahte lek rawh; tichuan, Aigupta ramah chungu a lo puang chiam dâwn nia, tiin,” a ti a.

⁶Arona chuan Aigupta ram tui chungahte chuan a tiang chu a lek a, chungu a lo chhuak ta chiam a, Aigupta ramah chuan an khat ta a.

⁷Dawithiamte pawh chuan mitdawivaih hmangin khawmualah chuan an tichhuak ve a.

⁸Farawa chuan Mosia leh Arona chu a ko va, “Chungu hi la bo tûrin LALPA min ngensak rawh u; tichuan, LALPA hnêna in inthawi theih nân in mite chu ka chhuah ang e,” a ti a.

⁹Mosia chuan, “Ngensak e a, nang leh i upate leh i mite in aṭanga chungu-in an ṭînsan che ua, luiah chauh an awm hun tûr ruat la, ka dîlsak ang che,” a ti a.

¹⁰“Naktûk aṭangin le,” a ti a. “LALPA kan Pathian ang rêng hi an awm lo tih i hriat theih nân i tih ang chu ni ang hmiang,

¹¹Chungu chuan an chhuahsan ang che, i in aṭangin an chhuak ang a, luiah chauh an awm tawh ang,” a ti a.

¹²Mosia leh Arona chu Farawa hma ata chu an chhuak a, Mosia chuan LALPA hnênah Farawa bâwmtu chungu chu lâk bosak tûrin a ngên a.

¹³Mosia thu ang chuan a ti a, chungute chu inah te, tualah te, lovah te an thi ta phung a.

¹⁴An vawm khâwm a, a ram pumin a uih ta vung vung a.

¹⁵Farawa chuan chungute chu an thi zo ta tih a hriat chuan luhlul a chhuah a, LALPA sawi ang khân an thu chu a ngaithla duh chuang lo.

¹⁶ LALPA chuan Mosia hnênah, “Arona chu hrilh rawh, a tiang chu la sela, vaivut vaw rawh se, Aigupta ram pumah hrikah a chang dâwn a ni,” a ti a.

¹⁷Chutiang chuan an ti a; Arona chuan a tiang chu a lek a, lei vaivut chu a vua a, mihring leh rante chuan hrik chu an kai a; Aigupta rama vaivut zawng zawng chu hrikah a chang ta vek a.

¹⁸Dawithiamte chuan mitdawivaih hmangin tih ve an tum a; mahse, an ti thei lo. Ram pumah mihring leh sate chuan hrik an ngah ta êm êm a.

¹⁹Dawithiamho chuan, “Hei chu Pathian tih a ni,” an ti a; mahse, Farawa chuan a luhlul a chhuah a. LALPA sawi ang khân an thu chu a ngaithla duh lo va.

²⁰ LALPA chuan Mosia hnênah, “Zîngah tho la, Farawa lui kamah a lêng leh ang a, a hmaah va ding la, a hnênah, LALPA chuan heti hian a ti; ‘Ka rawng an bâwl theih nân ka mite hi chhuah rawh.

²¹Ka mite hi i chhuah duh loh chuan thophurh rual, nang leh i hote leh i mite seh tûr ka rawn tipung dâwn, i in chhûngah te leh Aigupta mite inah te a awm nuai nuai ang a, ramah pawh a awm sup sup ang.

²²Ka mite awmna Gosen ram erawh chu ka zuah ang a, kei LALPA hian hêng hi ka tih a ni tih i hriat theih nân thophurh chu a awm ve lo vang.

²³Ka mite leh i mite chu ka thliar hrang dâwn a ni - he thil mak hi naktûkah tih a ni ang,’ a ti, ti ang che,” a ti a.

²⁴LALPA chuan a rawn ti ta ngei a, Farawa inah te, a hote inah te, Aigupta ramah te thophurh a lo awm ta nuai nuai a; thophurh a tam êm avang chuan ram pum chu a chhe nasa hle a ni.

²⁵Farawa chuan Mosia leh Arona chu a ko va, “Kal ula, ram chhûngah in Pathian hnênah chuan inthawi rawh u,” a ti a.

²⁶Mosia chuan, “A dik lo vang, LALPA kan Pathian hnêna kan inthawina tûr hian Aigupta mite thin a tiur ngei ang; an ngaih theih loh zâwng kan tih chuan lungin min dêng mai ang le,

²⁷thlalêrah, ni thum kala hlaah, kan Pathianin thu min pêk angin kan va inthawi ang e,” a ti a.

²⁸“LALPA in Pathian hnêna inthawi tûr chuan ka kaltîr ang che u, hla takah erawh chuan in kal tûr a ni lo, min ṭawngṭaisak rawh u,” a ti a.

²⁹Mosia chuan a chhâng a, “Ngai rawh, ka chhuak ang a, thophurh rual hi naktûkah i hnên ata te, i hote leh i mite hnên ata te bo vek tûrin ka dîlsak ang che. LALPA hnêna inthawi tûra kan kal phal lovin Farawa chuan min tihder tawh teh suh se,” a ti a.

³⁰Mosia chu a chhuak a, LALPA hnênah a ṭawngṭai a.

³¹Farawa hnên aṭang te, a hote leh a mite hnên aṭang te chuan thophurh chu a tihkiansak ta a, pakhat mah a awm ta lo va.

³²Hemi ṭum pawh hian Farawa chuan luhlul a la chhuah ta tho va, mite chu a chhuah duh chuang lo va.