Read Mizo Lushai Exodus 9 Bible Online

Exodus 9 - Mizo Lushai bible

Exodus 9

¹ LALPA chuan Mosia hnênah, “Farawa hnênah kal la, heti hian hrilh rawh: ‘Hebrai mite Pathian LALPA chuan heti hian a ti; ka rawng an bâwl theih nân ka mite hi chhuah rawh.

²I chhuah duh lohva, i chelh luih chuan

³LALPA chuan rama ran tla, sakawr te, sabengtung te, sanghâwngsei te, bâwng te, berâm rualte chungah kut ka thlâk ang a, pûl hri na tak ka lêntîr ang,’ a ti:

⁴LALPA chuan Israel mite ran leh Aigupta mite ran a thliar hrang ang a, Israel fate ran pakhat mah a thi ve lo vang.

⁵LALPA chuan hun a ruat a, naktûkah LALPA chuan he thil hi a ti ang,” a ti a.

⁶ LALPA chuan a tûkah chu thil chu a ti ta ngei a, Aigupta mite ran zawng zawng chu a thi ta a; Israel fate ran erawh chu pakhat mah a thi ve lo.

⁷Farawa chuan enthlithlai tûr mi a tîr a, Israel-te ran chu pakhat mah thi an hmu lo. Mahse, Farawa chuan luhlul a chhuah ta cheu va, mite chu a chhuah duh chuang lo.

⁸ LALPA chuan Mosia leh Arona hnênah: “Meipui chunga inṭing ṭhûm khat va la ula, Farawa hmuhah Mosian vânvawrh rawh se,

⁹vaivut khu angin Aigupta ram pumah a darh ang a, Aigupta ram chhûnga mi leh sa zawng zawng tân khawihli huaisualah a chang ang,” a ti a.

¹⁰Meipui inṭing chu an la a, Farawa hmaah chuan an ding a, Mosia chuan a vânvawrh ta a. Mi leh sa te tân khawihli huaisualah a chang ta a.

¹¹Khawihli avângin dawithiamho chuan Mosia chu an chelh ta lo va; khawihli chu Aigupta mi zawng zawng leh dawithiamte chuan an vei vek a ni.

¹²LALPA chuan Farawa chu a tiluhlul a, Mosia hnêna LALPA sawi ang ngei khân an thu chu a ngaithla duh chuang lo va.

¹³ LALPA chuan Mosia hnênah, “Zîng takah tho la, Farawa hmaah va ding la, hetiang hian va sawi rawh: ‘Hebrai mite Pathian LALPA chuan heti hian a ti: ka rawng an bâwl theih nân ka mite hi chhuah rawh.

¹⁴Tûn ṭum chu i hote leh i mite mai ni lovin nang ngei pawh ka khawih dâwn che a ni; khawvêlah hian keimah ang rêng tu mah an awm lo tih i hriat theih nân.

¹⁵Nang leh i mite chu hri chhia vei tûrin ka kut lek khum che ila chuan in boral vek tawh ang.

¹⁶Ka thiltihtheihzia entîr tûr chein i nun ka la zuah a ni; tichuan, khawvêl pumah ka hming a thang dâwn a ni.

¹⁷I lo chapo ta hle a, ka mite pawh i la chhuah duh lo cheu va.

¹⁸Ngai rawh, naktûk hetih hunah hian rial ka tlâktîr chiam dâwn; chutianga nasa chu Aigupta ramah engtik lai mahin a la awm ngai lo.

¹⁹I ran te leh i thil neih, ram palailênga awm apiang chu, khungtîr vek rawh, in khung ṭhat loh chuan mihring pawh ran pawh rialin a dêng ang a, an thi ang,’ a ti,” a ti a.

²⁰Farawa upa ṭhenkhat chuan LALPA thu chu an pawisa a, an chhiahhlawhte leh an rante chu inah an awmtîr a.

²¹Ṭhenkhat erawh chuan LALPA thu chu an pawisa lo va, an chhiahhlawhte leh rante chu ram palailêngah an awmtîr a.

²²LALPA chuan Mosia hnênah, “Vân lamah i kut phar rawh; tichuan, Aigupta ram pumah rial a lo tla ang a; mihring te, ran leh thlai tinrêng a dêng ang,” a ti a.

²³Mosia chuan a tiang chu vân lamah a lek a, LALPA chuan khawpui a tiri a, rial a tlâktîr a, leiah ṭêkte a tla bawk a.

²⁴Rial chu a tla ta chur chur a, kâwl te a phe zawr zawr a, tûn hma hriat phâk chinah chutianga nasa chu Aigupta ramah a la awm ngai lo.

²⁵Ram palailênga awm zawng zawng, mihring pawh ran pawh rial chuan a dêng a, hnimte pawh a dêng a, thingte pawh a dêng bung rum a.

²⁶Israel fate awmna ram, Gosen ramah chuan rial chu a tla ve hauh lo.

²⁷Farawa chuan Mosia leh Arona chu a kohtîr a, an hnênah, “Tûn ṭum zawng ka tisual a ni e, LALPA chuan a tidik a, kei leh ka mite hian kan tidik lo a ni.

²⁸“Hêng khawpui ri dur dur leh rial tla chur chur hi titâwp tûrin LALPA chu ngên teh u, mite chu ka chhuah ang a, kan chelh tawh lo vang che u,” a ti a.

²⁹Mosia chuan a hnênah, “Khua ata ka chhuah veleh LALPA hnênah ka bân ka phar ang a, khawpui a ri tawh lo vang. LALPA a ni tih i hriat nân rial pawh a tla tawh lo vang.

³⁰Nang leh i hote zawngin LALPA chu in ṭih dâwn chuang lo tih ka hria a ni,” a ti a.

³¹La leh barli chu a chhe vek a, barli chu a vui a, la pawh a pâr lai a ni.

³²Huit leh buhtun erawh chu a la vui lo va, a chhe ve lo.

³³Farawa in aṭangin Mosia chuan khawpui a chhuahsan a, LALPA lamah a bân a phar a, khawpui leh rial chu a bâng ta a; leia ruah lo sûr pawh a hân ta a.

³⁴Ruah te, rial te, khawpui te a reh tâk hnu chuan Farawa chuan a suahsual a thawh a, a hote nên luhlul an chhuah leh ta zêl a.

³⁵Mosia hnêna LALPA sawi tawh ang khân Farawa chuan luhlul a chhuah a, Israel fate chu a chhuah duh chuang lo.