Read Mizo Lushai Joba 1 Bible Online

Joba 1 - Mizo Lushai bible

Joba 1

¹Uz ramah mi pakhat a awm a, a hming chu Joba a ni. Chu mi chu sawisêlbo, Pathian ngaihsak tak, thil ṭha lo laka insûm thei mi a ni.

²Fapa pasarih leh fanu pathum a nei a.

³A hausak dân chu hetiang hi a ni: berâm sângsarih, sanghâwngsei sângthum, bâwng tuak zanga, sabengtungpui zanga leh chhiahhlawh tam tak a nei a. Khawchhak mite zîngah chuan mi hausa ber a ni.

⁴A fapate chuan mahni in ṭheuhvah ruai an inṭheh chhâwk ṭhîn a, an farnu pathumte chu an hnêna ei leh in tûrin an sâwm ṭhîn.

⁵Chutia an ruaiṭhehte an zawh chuan Joba chuan anni chu a ko va, a thian ṭhîn. Zîng takah a tho va, an hming kimin hâlral thilhlan a hlân ṭhîn. Joba chuan, “Ka fate hian thil sual tiin Pathian an lo sawichhiat tâk dahah,” a ti a ni. Joba chuan hetiang hian a ti ziah ṭhîn.

⁶Tin, vântirhkohte LALPA hmaa an inlan ni a lo thleng a. Setana pawh chu an zîngah a lo tel ve a.

⁷LALPA chuan Setana hnênah, “Khawi aṭangin nge i lo kal?” a ti a. Setana chuan LALPA chu a chhâng a, “A chhuk a chhova lei ka fan kual vêlna aṭangin,” a ti a.

⁸LALPA chuan Setana hnênah, “Ka chhiahhlawh Joba hi i hre chiang em? Lei chungah hian amah anga sawisêlbo, mi dik, Pathian ṭih mi, thil ṭha lo laka insûm thei an awm lo asin,” a ti a.

⁹Setana chuan LALPA chu a chhâng a, “Joba chuan a chhan awm lovin a ngaihsak che em ni?

¹⁰“Amah chu a in nên, a neih zawng zawng nên kil tinah i hual vêl tlat a ni lâwm ni? A kut hnathawh mal i sâwm a; tichuan, a ran rualte chu ram pumah an khat ta a ni.

¹¹Tûnah, i kut lek la, a neih zawng zawng han lâksak teh mah, i hmaichhanah a sawichhe ngei ang che,” a ti a.

¹²Tichuan, LALPA chuan Setana hnênah, “Aw le, tûnah a neih zawng zawng chu i kutah a awm e, amah tak erawh chu khawih suh ang che,” a ti a. Setana chu LALPA hma aṭang chuan a chhuak ta a.

¹³Ni khat chu a fanu leh fapaten an u ber ina chaw an eia uain an in lai chuan,

¹⁴Joba hnênah zualko a lo tlân a, “Bâwngpaten lei an leha, sabengtungte kan kianga an tlat laiin,

¹⁵Seba miten min rawn bei thut a, chhiahhlawhte chu khandaihin an that a, rante chu min chhuhsak a, keimah chauh hi a hrilh tûr chein ka lo chhuak a ni,” a ti a.

¹⁶A la sawi lai mêkin mi dang a lo tlân leh a, “Vân aṭangin Pathian mei a lo tla a, berâmte leh chhiahhlawhte a kâng ral vek a, keimah chauh hi a hrilh tûr chein ka lo chhuak a ni,” a ti a.

¹⁷A la sawi lai mêkin mi dang a lo tlân leh a, “Kaldai-ho pâwl thuma insiamin sanghâwngseite chu an rawn bei a, an la vek a, chhiahhlawhte pawh khandaihin an that a, keimah chauh hi a hrilh tûr chein ka lo chhuak thei a ni,” a ti a.

¹⁸A la sawi lai mêkin mi dang a lo tlân leh a, “I fanu leh I fapaten an u ber ina chaw an eia uain an in laiin,

¹⁹ngai teh, thlalêr aṭangin thlipui a lo tleh a, in chu kil li-ah a rawn nam a, nula leh tlangvâlte chu a delh a, an thi ta vek mai. Kei chauh hi hrilh tûr chein ka lo chhuak thei a ni,” a ti a.

²⁰Tichuan, Joba chu a tho va, a kawrfual a pawtthlêr a, a lu a ziat kawlh a, lei si-a bawkkhupin Pathian a bia a:

²¹“Ka nu pum ata saruakin ka lo piang a, Saruak vêkin ka kîr leh dâwn a nih hi. LALPA chuan a pe a, LALPA chuan a la leh ta a nih hi, LALPA hming chu fakin awm rawh se,” a ti a.

²²Hêng zawng zawngah hian Joba chu a sual lo, Pathian a sawichhe hek lo.