Read Mizo Lushai Joba 10 Bible Online

Joba 10 - Mizo Lushai bible

Joba 10

¹Nun hi ka ning tawh a, ka phun ka phun mai dâwn a nih hi, Rilru na tak chungin thu ka sawi dâwn a ni.

²Pathian hnênah, “Mi dem mai lo la, Engti-ah nge min puh, min hrilh teh,” ka ti ang.

³I kut chhuakte hmusita tiduhdahin, Mi suaksualte remruat i lâwmpui hi Ṭha i ti em ni?

⁴Mihring mit ang maiin, Mihring angin i hmu ve em ni?

⁵Mihring anga damchhûng ni leh kumte Nei ang ziazânga,

⁶Ka khawlohna i chhui chiama, Ka sualnate i zawn tehchiam le?

⁷Mi sual ka ni lo tih i hria a, I kut ata mi chhan thei tu mah an awm loh pawh i hria.

⁸I kutin min din a, nangma siam ngei ka ni, Nangmah bawkin min tiboral leh dâwn em ni?

⁹Nangin hlumin min siam tih hre reng la, Vaivutah mi chantîr leh mai dâwn em ni?

¹⁰Nangin hnutetui angin mi bun a, Hnute khal angin mi hlâwm a ni lâwm ni?

¹¹Vun leh tisain mi tuam a, Ruh leh thain mi phuar khâwm a.

¹²Nunna mi pe a, mi duat êm êm a, Min enkawl a, min hualhim zêl a ni.

¹³Chuti chung chuan hêng thil hi I lo tum ru rêng a ni tih ka hre chhuak ta.

¹⁴Thil sual ti ila, nangin i chhinchhiah ang a, Ka khawlohna avângin mi zuah lo vang.

¹⁵Mi suaksual ni ila ka chan a va chau dâwn êm! Mi dik pawh ni ila, ka inchhuang thei chuang lo, Mualpho takin ka awm a, ka tuar tlawk tlawk a nih hi.

¹⁶Lo chapo ila, nangin sakeibaknei an pêl angin mi pêl ang a, Min tina tûrin thil mak tak tak i ti.

¹⁷Min bei min bei a, ka chungah i thinur i tipung a, Min beih dân tûr kawng thar i dap zêl a.

¹⁸Eng vângin nge chhûl ata mi lâk chhuah? Tu ma hmuh lohvin lo thi daih ila a ṭha tûr.

¹⁹Lo piang lo law law ila, chhûl aṭangin Thlân pan nghâl ila a ṭha zâwk tûr.

²⁰Ka damchhûng nite hi a ral ṭêp lo vem ni? Min kiansan hrâm teh, rei lo tê tal ka han hahchâwl hlek teh ang.

²¹Kîr tawh lohna ram thim, Thim chhah mup rama ka kal hma hian.

²²Thim chhah mup ram, lungngaihna zân thim, Manganna hmun chu, êng pawh thima a channa hmunah chuan.