Read Mizo Lushai Joba 11 Bible Online

Joba 11 - Mizo Lushai bible

Joba 11

¹Zofara, Naama mi chuan heti hian a han sawi ve a:

²Hetiang thu zozai chhân loh theih em ni? Ṭawng tam avângin miin thiam a chang ang maw?

³I ṭawng tam avângin miin an ngawihsan chein Mi dang thamlo taka i ṭawng hian Timualpho tûr che an awm lo vang maw?

⁴I ṭanna hi dik berah i ngai a, Pathian hmuhah, ‘Ka thianghlim e’ i ti a.

⁵Mahse, Pathian chu han ṭawng sela, I chungthu han sawi ve se ka va ti êm!

⁶Tichuan, finna thurûk a hriattîr ang che a, Finna dik, mihring hriat phâk rual loh chu. Hre ta che, i khawlohnain a phu aia nêpin a hrem che hi.

⁷Pathian ropuizia i hre chhuak zo vem ni? Engkimtitheia chu i hre theia maw?

⁸Vân aia sâng a ni, i hriat phâk rual em ni? Leilâwt aia thûk a ni, i hmuh phâk rual em ni?

⁹A zauzia chu khawmual leh tuifinriat aiin A zau zâwk a.

¹⁰Pathian chu lo kalin man che sela, I chungthu rêl ta mai se, tu nge dâl thei ang?

¹¹Tute hi nge mi sualte chu a hria, An sualna a hmu vek a, a ngaihtuah dâwn lâwm ni?

¹²Ram sabengtungno sâwi hmin mai theih a ni lo ang hian, Mi mâwl pawh a fing mai thei lo.

¹³I rilru put dân a dika, A lama i kut i phar chuan,

¹⁴I kuta khawlohna awm a nih chuan paih bo la, I ina sualna a awm i phal loh chuan.

¹⁵Ngaihngam takin i lêng vêl thei ang a, I dinhmun a nghet ang a, hlauh tûr i nei lo vang.

¹⁶I hrehawmna i theihnghilh ang a, Tui luang angin i hre zui tawh lo vang.

¹⁷I nun chu chhûn êng aiin a êng ang a, A thim lai pawh zîng êng aiin.

¹⁸Beiseiawm a awm avângin i thla a muang ang a, I hawi vêl ang a, ngaihngam takin i châwl ang.

¹⁹I muzâl ang a, tu man an tibuai ngam lo vang che, Mi tam tak biaktlawn i hlawh bawk ang.

²⁰Mi sualte erawh chu an hawihai ang a, Tlân chhuahna kawng rêng an hmu lo vang. An nghah ber chu thih a ni mai.