Read Mizo Lushai Joba 12 Bible Online

Joba 12 - Mizo Lushai bible

Joba 12

¹Tichuan, Joba chuan heti hian a sawi leh a:

²Ni e, mi fing zawng in lo nih hi, Thi ta hlauh ula, mi fing an awm dâwn tawh hlei nêm!

³Mahse, nangni angin hriatna ka nei ve a, In aiin ka nêp hlei nêm, Tu nge hêng thilte hi hre lo bîk le?

⁴Pathian ka au va, min chhâng ṭhîn a, Mahse, ka ṭhianten min nuihzat a, Mi dik leh demawm lo hi nuihzatbûr ka nih tâk hi.

⁵Mi nuamsate chuan mi vânduai an hmusit a, Rahbi tleute an chhuih zui ṭhîn.

⁶Suamhmangte bûk a hnianghnâr a, Pathian tithinurtute an nuamsa. Mahni chakna pathiana neihtute chu.

⁷Ram sate zâwt teh, an zirtîr ang che, Chunglêng savate pawh zâwt la, an hrilh ang che.

⁸Leilung pawh bia la, a zirtîr ang che, Tuipui sanghate pawhin hei hi an hrilh ang che.

⁹Hêng zawng zawng zîngah hei hi LALPA tih a nih hre lo tu nge awm?

¹⁰Thil nung tinrêng nunna leh mihringte thlarau hi A kuta awm a ni.

¹¹Kâ hian thil tui a hria angin Beng hian thu chhia leh ṭha a chian ṭhîn lo vem ni?

¹²Upate an fing nge nge a, Dam reiten thil hriat an ngah.

¹³Pathian erawh chu a fingin a chak a, Remruat a thiam a, engkim a hria.

¹⁴A ṭhiat tawh chu tundin leh theih a ni lo. Mihring a khâr hnan chu tu man an chhuah thei lo.

¹⁵Ruah sûr a khap chuan khua a khêng a, A sûrtîr leh ram a chîm chhe ṭhîn.

¹⁶Ani chu a chak a, a chhan ṭhîn a, Bumtu pawh, bum tuar pawh, a kuta awm an ni.

¹⁷Remruattute remhriatna a la bo va, Rorêltute mi â angin a awmtîr.

¹⁸Lalte thuneihna a chhuhsak a, An kâwngah hruiin a hlîng.

¹⁹Puithiamte saruakin a kaltîr a, Mi hlunte a paihthla.

²⁰Mi râwnte chu a hnâwl a, Upate finna a chhuhsak ṭhîn.

²¹Mi liante a hmusit a, Mi chakte a titlâwm a.

²²Thima thil thûkte a hailang a, Thim chhah mup pawh a tiêng ṭhîn.

²³Hnamte a tilian a, a tichhe leh a, Hnamte a tipung a, a tidarh leh ṭhîn.

²⁴Ram hruaitute ngaihtuahna a tibo va, Thlalêr kawng awm lohnaah a vahvaihtîr a.

²⁵Thimthamah an dap dun dun a, Zu rui angin an pai an pai.