Read Mizo Lushai Joba 13 Bible Online

Joba 13 - Mizo Lushai bible

Joba 13

¹Chûng zawng zawng chu ni tin ka hmu a, Bengin ka hria a, ka hrethiam ta.

²In hriat chu ka hre ve bawk a, In aiin ka neu bîk lo.

³Mahse, El Sadaia hnênah ngei sawi ka duh, Ka chungchâng hi Pathian nên sawi dun ka châk a ni.

⁴Nangni hi dâwta insawimawi ṭhîn, Tidam thei lo daktor ang hi in ni.

⁵Ngawi hmiah ula, In tân a finthlâk zâwk ang.

⁶Ka ṭanna hi hre chiang ula, Ka thu hi ngaihtuah chiang ve teh u.

⁷Pathian hminga dâwt sawiin Thu dik lo in sawitîr dâwn em ni?

⁸Amah ṭanin hleih in nei ang maw? Pathian tân in pâwng ṭan dâwn em ni?

⁹Hmu chiang che u sela, In tân a ṭha ang em?

¹⁰A rûka duhsak bîk in neih chuan A hrem ngei ang che u.

¹¹A ropuina chu râpthlâk in ti êm êm ang a, A ṭihbaiawmna chuan a fan lo vang che u maw?

¹²In upate thufing chu meivâp ang lek a ni a, In ṭan chhante pawh hlumbêl ang lek a ni.

¹³Lo ngawi ula, ṭawng hun mi kian teh u, A nih nih ni rawh se.

¹⁴Eng vângin maw? Ka awm awmin ka awm mai ang.

¹⁵Mi tihlum dâwn mah se, ani chu ka ring tho vang. A hmaah ka awm dân ka ṭan zêl dâwn.

¹⁶Pathian hmaah mi sual an lang ngam si lo va, Kei zawng, ka ngampatna avâng hian ka him hlauh mai thei asin!

¹⁷Ka thute hi ngun takin ngaithla ula, Ka thu sawite hi ngaihtuah ngun rawh u.

¹⁸Ngai teh, thiamthu sawi tûrin ka inpeih tawh reng a ni, Thiam ka chang dâwn tih ka hre si.

¹⁹Tu nge ka sualna rawn phawrh thei awm? Phawrh a nih chuan ngawi rengin ka thi mai ang.

²⁰Thil pahnih chauh mi tihsak la, I hmêl êngah chuan ka hmai ka thup dâwn lo nia.

²¹Ka chunga i kutthlâk hi bâng la, I ṭihbaiawmna hian mi thlah rawh se.

²²Mi ko la; tichuan, ka chhâng ang che. A nih loh leh, kei ṭawng ila, Nangin mi chhâng ang che.

²³Ka khawlohna leh ka sualna eng zâta tam nge? Ka bawhchhiatna leh ka sualnate mi hrilh ang che.

²⁴Engtizia nge mi hawisana, I hmêlma anga mi ngaih?

²⁵Hnahthel thlâwk i chhaihin, Buhsi lêng i ûm dâwn em ni?

²⁶Ka chungchâng ṭha lo tak takin i ziak a, Ka tleirâwl ât lai sual mawh mi phurhtîr hi;

²⁷Ka ke-ah kawl mi buntîr a, Ka awm dân tinrêng i enthla a, Ka hniak lam pawh i chhinchhiah hi;

²⁸Thil ṭawih ral mai tûr leh Silhfên thîm ei ang lek ka ni chung hian.