Read Mizo Lushai Joba 14 Bible Online

Joba 14 - Mizo Lushai bible

Joba 14

¹Hmeichhe hrin mihring hi Sual rêng rênga thi thuai mai tûr a ni.

²Pangpâr angin a lo pâr chhuak a, a vuai leh ṭhîn, Hlimthla angin a ral mai a, a awm hlen lo.

³Chutiang mi chu ngaihmawha Rorêlnaah khing tûr chea hruai tham em ni?

⁴Tu nge bawlhhlawh aṭangin thil thianghlim la chhuak ngai? Tu mahin.

⁵A dam chhûng nite chu i ruatsak a, A thlahte lamin i kuta awm an ni. A pelh theih loh ramri i khamsak bawk.

⁶Hawisan la, hahchâw teh se, Hlawhfa angin a damchhûng nite a tlingtlâk theih nân.

⁷Thing chuan beisei tûr a la nei, Kit mah se a lo chawr leh a, Zîk thar chhuah a bâng chuang lo.

⁸A zung lo tar mah se, A bul lei seh chinah thi mah se,

⁹A lei hnâwn avângin a lo chawr leh ang a, Thingphun angin a lo buk ang.

¹⁰Mahse, mihring chu a thi a, A ni, a thaw a tâwp a, khawiah nge a awm tâk le?

¹¹Tuipui kang, tui awm ta lo leh Luipui kang chat, ro châr ta ang hian,

¹²Mihring chu a mu a, a tho leh lo. Vân a boral hma chuan a harh lo vang, A muhîl chu kaihthawh a ni lo vang.

¹³Aw, Seol-ah mi thukru la ka va ti êm! I thinur reh hma chu mi thukru la, Amaherawhchu, min hriat chhuah leh hun nei ngei ang che.

¹⁴Mi a thih hian a nung leh dâwn em ni? Ka chhuah hun a thlen hma hian Rawng ka bâwl fan fan ang.

¹⁵Min ko la, ka chhâng ang che, I kut chhuakte i ngaina hle si ṭhîn.

¹⁶Tichuan, ka pên i vêng ang a, Ka sual i chhui zui duh lo vang.

¹⁷Ka bawhchhiatna i phûm bo va, Ka sualte i ngaidam bawk a.

¹⁸Tlângte a min a, Lungpuite a minpui a,

¹⁹Luite chuan lungte chu a hrual a, Tui lian chuan lei a hrût hêk ṭhîn; Chutiangin mihringte beisei i tibo ṭhîn.

²⁰Ani chu kumkhua atân i titlâwm a, I hnawt bo ta a ni.

²¹A fate chawimawi an nih pawhin a hre lo va, Chhiat an tawh lahin a ngaihsak tawh hek lo.

²²Ama taksa na chauh kha a hria a, Amah a inkhawngaih ṭhîn a ni.