Read Mizo Lushai Joba 15 Bible Online

Joba 15 - Mizo Lushai bible

Joba 15

¹Tin, Elifaza, Teman mi chuan heti hian a chhâng a:

²Mi fing an ṭawng ve mai mai ngai em ni? Thu lawilo mai maiin an khat hlei nêm!

³Mumal nei lovin an ṭawng ang em ni? Thil sâwt lo tûr an sawi peih dâwn em ni?

⁴A ni, Pathian ṭihna rêng i nei lo va, A hnênah i inhlân duh hlei nêm!

⁵I sualzia i thu sawiah a lang a, Thuveivîr i thlang a nih hi.

⁶Kei ni lovin, i ṭawngka ngeiin a thiam lo che a, I hmui ngeiin a hêk che a nih hi.

⁷Piang hmasa ber em i nih? Tlâng awm hmain i awm tawh a maw?

⁸Pathian remruat i hre pha em ni? Finna hi i ta bîk em ni?

⁹Kan hriat loh eng nge i hriat? Kan hmuh loh eng nge i hmuh bîk?

¹⁰Kan zîngah luṭuak vâr tawh leh tar te, I pa aia upate pawh an awm asin!

¹¹Pathianin a thlamuan che leh Dimdawi taka a enkawlna che hi i ngainêp em ni?

¹²Engah nge i thin a thawh thuta, I men rum tâk hle le?

¹³I nunin Pathian i dodâl a, I kâin i sawichhia a ni lâwm ni?

¹⁴Mihring hi a thianghlim tâwk thei em ni? Hmeichhe hrin hi Pathian hmaah a ṭha tâwk thei em ni?

¹⁵Pathian chuan a mi thianghlimte pawh a ring zo lo va, A mit hmuhah vânte pawh a thianghlim tâwk lo.

¹⁶Mihring, sual leh bawlhhlawha khat, Tui in anga sual intu chu a va ring dâwn lo êm!

¹⁷Mi ngaithla la, ka hrilh ang che, Ka hmuh chu ka sawi dâwn e.

¹⁸Mi fingten an pi pute hnêna an dawn, Zêp nei lova min hrilh chhâwn chu.

¹⁹Ram dang mite awm ve lovin Chu ramah chuan, mahni chauhvin an awm tûr a ni, tih thu chu.

²⁰Mi sual chuan a damchhûng zawng hrehawm a tuar ang, Mi nunrâwng chuan a tuar kumkhua ang.

²¹Hlauhawm thâwm chu a hria a, Mahse, hima a inhriat laiin Suamhmangin a rawn bei ang.

²²Thim ata chhuah a inring lo, Khandaihin a hmuak reng si a.

²³Ei tûr zawngin a vâk vêl a, ‘Khawiah nge?” tiin; A tân khua a vâr lo tih a hria.

²⁴Hrehawm leh lungngaihna chuan a rawn bawh a, Lalin a râl do a bei ang hian.

²⁵Pathian dova kut a lek avângin, El Sadaia a pawisak loh avângin.

²⁶Luhlul takin Pathian chu a dodâl a, A phaw chhah tak leh khauh tak chu a chhuang a ni.

²⁷A hmai a mawm a, a dulah thau a tla.

²⁸Mahse, khawpui ṭiau hnuahte a chêng ang a, Tu ma luah loh inahte chuan. Chûngte pawh chu tlusawp leh tho tûr a ni.

²⁹A hausa lo vang a, a sum leh pai a awm hlen lo vang, Zâr zo tum a nei tawh hek lo vang.

³⁰Thim ata a chhuak lo vang a, A zârte chu a kâng ro vang a, A pârte chu thliin a lên bo vang.

³¹Mahni inbumin, engmahlovah innghat suh se, Eng mah a hmu dâwn chuang si lo.

³²A hun lovah a ro vang a, A ṭangte pawh a chawr leh tawh lo vang.

³³Grep rah hlamtla ang a ni ang a, Oliv pâr ṭil ang a ni ang.

³⁴Pathian ngaihsak lo mite chu an zuihral ang a, Thamna hmanga in an sakte pawh a kâng ral ang.

³⁵Pawi khawih tûr an dap a, thil an tisual nge nge a, An thinlung chu bumnaa khat a ni.