Read Mizo Lushai Joba 16 Bible Online

Joba 16 - Mizo Lushai bible

Joba 16

¹Joba chuan heti hian a chhâng a:

²Chutiangte chu ka hre ve vek alâwm, In vai hian mi thlamuan thiam lo tak in ni.

³Thu puarpawlêng mai mai i sawi i sawi dâwn em ni? Engin nge tiphûr che, i ṭawng i ṭawng le?

⁴Ka chan ang hi chang ve ula, In sawi ang hi ka sawi ve ṭeuh thei ang. Lu ka thinkhum ang che u a, Ka ânkhum zêk ang che u.

⁵Mahse, ka tithatho zâwk ang che u a, Ka ṭawng thlamuan bawk ang che u.

⁶Sawi sawi mah ila ka na a dam chuang lo, Ka ngawih reng pawhin a nêp chuang bawk hek lo.

⁷Aw Pathian, nangin min nghaisa a, Kan chhûngin min timang ta.

⁸Ka vun zûr hian mi sawisak dân a tilang a, Ka chêrzia hian ka natzia a tilang bawk.

⁹Nangin thinurin min pawtthlêr a, min hua a, Hachang mi ṭhial khum a, Mi dotuten rum takin min melh.

¹⁰Miten min chhiatkhum a, Diriam takin biangah min bêng a, Mi bei tûrin an inhâwr khâwm a,

¹¹Amah ngaihsak lote hnênah Pathianin min hlân a, Mi sualte kutah min pe ta.

¹²Thlamuang taka ka awm der der lai Min rawn ṭhuai nawk nawk a, Ka ringah min rêk a, mi nawr nek a. A chhia zawng zawng min bûrbun ta.

¹³A thal kâptuten mi hual tlat a, Dîm lêk lovin ka kalah min kâp a, Ka mît chu leiah an leihbaw ta.

¹⁴Mi nghaisa mi nghaisa a, Râwng takin min chîl nek a.

¹⁵Saiip puan ka sîn a, Mualpho takin vaivutah ka ṭhu a.

¹⁶Ka ṭahna lamah ka meng sen rûm a. Ka mitte pawh a vûng bûr mai.

¹⁷Mahse, ka kutte hian thil sual a khawih lo va, Tihtakzetin ka ṭawngṭai ṭhîn.

¹⁸Aw leilung, ka thisen an chhuah hi ngawihpui mai suh la, Ka mangang au thâwm hi tâwp mai suh se.

¹⁹Tûnah ka thuhretu vânah a awm a, Min sawisaktu chu chung lama mi a ni.

²⁰Ka ṭhianten min nuihsan mah se, Mittui nên Pathian lam ka hawi zâwk ang.

²¹Miin a ṭhian tân a ngaihsak ang hian, Pathian hnêna min sawisaktu awm teh sela aw!

²²Ka kumte chu a ral ṭêp a, Kîr tawh lohna kawng chu ka zawh mai dâwn si a.