Read Mizo Lushai Joba 17 Bible Online

Joba 17 - Mizo Lushai bible

Joba 17

¹Ka thaw hleithei ta lo, ka dam rei tawh lo vang, Thlân lo chu hmabâk ka nei ta lo.

²A ni, hmusittuten mi hual vêl a, Min diriamna chu ka hmu reng mai.

³Nangmah ngei ka lamah ṭang teh, Nang lo chu belh tûr ka neih loh hi.

⁴Nangin an thinlung i tidel a, An inchhuan phal suh ang che.

⁵Hlâwkna ûma ṭhiante fakdertu chu A fapa mit tideltu a ni.

⁶Miten kamchhe tleuh nân min hmang a, Ka hmaiah chil min chhâk.

⁷Lungngaih avângin ka mit a thim zo va, Ka kutke pawh ruhkawl mai a ni ta.

⁸Mi nun ngîlte chuan hei hi mak an ti a, Pawi khawih lote pawhin mi sualte chu an dem.

⁹Mi ṭha chuan a awm dân chu a thlah lo vang, Kut faite chu an nghet tial tial bawk ang.

¹⁰In vaiin lo hawiin lo kal mah ula, In zîngah mi fing rêng ka hmu lo vang.

¹¹Ka hun a ral dâwn ta, ka thil tumte a hlawhchham a, Ka duhsâm a thlâwn ta.

¹²Zân chu chhûn an vuah a, Thim chu êng hmahruaitu an ti.

¹³Seol chu ka hmabâk a ni ta, Thima ka mutna hmun tûr chu.

¹⁴Thlân chu, ‘Ka pa’ ka ti ang a, Ka taksa lungte chu, ‘Ka nu, ka farnu’ ka ti ang.

¹⁵Chu mai lo chu beisei tûr dang eng nge ka neih? Beisei tûr dang a awm em ni?

¹⁶Mitthi khuaa ka chhuk hun chuan, Beiseina nên vaivutah chuan kan chêng dûn ang.