Read Mizo Lushai Joba 18 Bible Online

Joba 18 - Mizo Lushai bible

Joba 18

¹Tichuan, Bildada, Sua mi chuan heti hian a sawi ve a:

²Eng chen nge sawi tûr i dap i dap dâwn? Ngaithla ve la, ka han sawi ve ang e.

³Eng vângin nge ramsa ang leka min ngaiha, Mi mâwl tê tê ang chauhva min hmuh?

⁴I thinur avângin mahni i intihrehawm a, Nangmah avângin lei hi hnuchhawn a ni ang maw?

⁵A ni, mi sual êng chu a chuai a, A meidê pawh a mit zo ta.

⁶A puan ina êng chu a thim ang a, A meichher pawh a thi bawk ang.

⁷Ngal tha chak chu a dul zo va, Ama remruat chu a chhiat phah ta.

⁸Lên chhûngah a pên lût a, Thangah chuan a âwk a,

⁹Thang chuan a kerêkah a âwk ang a, A hrui chuan a hlîng tlat ang.

¹⁰A tlâk nân hum an lai a, A awh nân thang an kam.

¹¹Kil tin aṭangin hlauhawmin a ûm a, A kalna apiangah a zui.

¹²Rilṭâmin a chau ta a, Chhiatna chuan a hual tlat a ni.

¹³Natna hlauhawm takin a bâwm a, A kutke chu a ṭawih zo ta.

¹⁴A himna puan in aṭangin an hnûk chhuak a, Hlauhawm Lal hnênah an hruai lût.

¹⁵A puan inah mi dang an chêng ang a, A then fai nân kât an theh ang.

¹⁶A zungte chu a mawih ang a, A zârte pawh a ro zo vang.

¹⁷Leiah tu man an hre reng tawh lo vang a, Kawtthlêrah a hming rêng a lang tawh lo vang.

¹⁸Ani chu êng aṭangin thimah an paih lût a, Khawvêl ata an paih chhuak ta.

¹⁹A mite zîngah tu leh fa a nei lo vang a, A chênna in rochungtu pawh a nei lo vang.

²⁰A chan chu khawthlang lam mite chuan râpthlâk an ti a, Khawchhak lam mite pawhin hlauhawm an ti.

²¹A ni, chu chu mi sualte chan tûr chu a ni, Chu ngei chu Pathian hre lote awm dân tûr chu a ni.