Read Mizo Lushai Joba 19 Bible Online

Joba 19 - Mizo Lushai bible

Joba 19

¹Joba chuan heti hian a chhâng a:

²Eng chen nge na taka min ṭawng khum anga, Min tihhrehawm dâwn le?

³Vawi sâwm ngawt min hau ta a, Zah nachâng hre lêk lovin min ânkhum.

⁴Ka lo dik lo ngei a nih chuan Ka sual man chu ka têl ang chu.

⁵Kei aia ṭha zâwka in inruata, Ka sual vânga mualpho nia min ngaih tlat chuan.

⁶Hre ta che u, Pathian chuan mi hnâwl a, A lênin min khuh ta.

⁷“Min sawisa,” tia ka au pawhin tu man min chhâng si lo va, Ka au chiam pawhin ngaihsaktu rêng ka nei lo ve.

⁸Ka kawng mi pinsak avângin ka kal tlang thei lo, Ka kawngte chu a tithim zo ta.

⁹Ka ropuina mi hlihsak a, Ka lallukhum mi lâksak ta.

¹⁰Kil tinah min tichhia a, eng mah ka ni ta lo, Thing angin ka beiseina a phawng.

¹¹Ka chungah a thinur êm êm a, A hmêlmate zîngah min chhiar ta e.

¹²A sipai rual an lo kal a, Ṭan hmun an rawn khuar a, Ka puan in vêlah bûk an sa.

¹³Ka unaute min tihhlatsak a, Ka ṭhiante pawh mi hrang an chang zo ta.

¹⁴Ka laichînten min kal bosan a, Ka ṭhian bulten min theihnghilh ta.

¹⁵Ka mikhualte leh ka chhiahhlawh nulaten Mikhualah min ngai a, An hmêlhriat loh, ram dang miah min ngai.

¹⁶Ka chhiahhlawh pawh ka au ei zo ta lo, Ṭawngkam thlum thawh a ngai ta e.

¹⁷Ka nupuiin ka kâ rimchhia a ti a, Ka unau pianpuite tân tenawm mai ka lo ni ta.

¹⁸Naupangchhia lamin min hmusit a, Ka han tho te hi min lo eu va,

¹⁹Ka ṭhian ṭha zawng zawngten min ten a, Ka hmangaih berte pawhin min hawisan ta.

²⁰Ruhkawl leh vun mai ka ni ta, Ka nung chang chang a ni.

²¹Mi khawngaih rawh u, ka ṭhiante u, mi khawngaih rawh u, Pathianin min khawih ta a nih hi.

²²Pathian ang ziazângin nangnin engati nge min tihduhdah ve le? Ka tuarna hi tâwk in la ti na nge?

²³Aw, ka thute hi ziak ni sela, Lehkhabu-ah chuang ve teh sela aw!

²⁴Ziakna thîrkhen leh suanin Kumkhua atân lungpuiah ker ni teh se.

²⁵Mi tlantu chu a nung tih ka hria, Nakinah chuan vaivutah hian a lo ding ang.

²⁶Ka vunte hi a chhiat hnuin Ka tisain Pathian ka la hmu ang.

²⁷Kei ngei hian ka la hmu ang a, Ka mit ngei hian amah tak chu a la hmu ang. Ka thinlung a chau ta,

²⁸“Engtin nge amah chu kan tihduhdah ang, Buaina bul chu amah hi a ni,” in tih avângin.

²⁹Khandaih chu hlau rawh u, Khandaiha hremna hi Pathian thinur lanna a ni, Tichuan, rorêltu a awm tih in hria ang.