Read Mizo Lushai Joba 2 Bible Online

Joba 2 - Mizo Lushai bible

Joba 2

¹Vântirhkohte LALPA hmaa inlan hun a lo awm leh a, Setana pawh LALPA hmaa inlan tûrin an zîngah a lo tel ve a.

²LALPA chuan Setana hnênah, “Khawi aṭanga lo kal nge i nih?” a ti a. Setana chuan LALPA chu a chhâng a, “A chhuk a chhova lei ka fan kual vêlna aṭangin,” a ti a.

³LALPA chuan Setana hnênah chuan, “Ka chhiahhlawh Joba hi i hmu chiang em? Leiah hian amah anga sawisêlbo, mi dik, Pathian ṭih, thil ṭha lo laka insûm thei an awm lo asin. Chhan awm lova amah i tihchhiat ka phal hnu pawhin a la rinawm tlat a ni,” a ti a.

⁴Setana chuan LALPA chu a chhâng a, “Sa him nân meuh chuan min eng pawh an huam ang chu.

⁵Tûnah, i kut thawhin a ruh leh a tisa ngei han khawih teh, i hmaichhanah a sawichhe ngei ang che,” a ti a.

⁶Tichuan, Setana hnênah, “Aw le, amah chu i kutah a awm a, a nunna erawh chu zuah ang che,” a ti a.

⁷Tichuan, Setana chu LALPA hma aṭang chuan a chhuak a, Joba chu a kephah aṭanga a chhîp thlengin pânchhia a veitîr a,

⁸Joba chu a chhuak a, inhiah nân bêl keh them a la a, vut zîngah a ṭhu a.

⁹A nupui chuan a hnênah “I rilru ngai i pu reng dâwn em ni? Pathian sawichhia la, thi la a ni mai,” a ti a.

¹⁰Joba chuan a hnênah, “Nang hian hmeichhe â tak angin thu i sawi a nih hi. Pathian hnên aṭangin thil ṭha kan dawng a, thil ṭha lo pawh kan dawng lo vang em ni?” a ti a. Hêng zawng zawngah hian Joba chuan thu sual a sawi lo.

¹¹Joba ṭhian pathumte chuan a chunga thil ṭha lo thleng chu an lo hria a, amah en tûrin mahni hmun ṭheuh aṭangin an lo kal a. Chûng mite chu Elifaza, Teman mi te, Bildada, Sua mi te, Zofara, Naama mi te an ni. Amah tuarpui leh thlamuan tûrin a hnêna kal hun an ruat angin an lo kal a.

¹²Hla tak aṭangin an rawn thlîr a, an hre lo va, an râwl chhuahin an ṭap a; an puan an pawtthler a, an lu chungah vaivut an vânvawrh a.

¹³Chutichuan, leiah ni sarih leh zân sarih an ṭhutpui a; tu mahin a hnênah thu kamkhat pawh an sawi lo. A tuar chu na êmin an hria a ni.