Read Mizo Lushai Joba 20 Bible Online

Joba 20 - Mizo Lushai bible

Joba 20

¹Tichuan, Zofara, Naama mi chuan a chhâng a:

²Ngun taka ka ngaihtuahin chhân ka châk a, Chhân hlân pawh ka nghâkhlel a nih hi.

³Min zilh dân chuan min va tai ve, Chhân dân tûr che ka hre reng asin.

⁴Hmasâng leia mihring awm chin ata tûn thlengin He thu hi i hre ngai lo vem ni?

⁵Mi sual chu rei a hlim lo va, Pathian hre lo mi lâwmna chu mitkhapkâr chauh a nih hi.

⁶A inngaih ropuina chuan vân tawng mah se, A lu pawh chuan chhûm thleng mah se,

⁷Ama êk angin a ral vang vang ang, Amah hmu ṭhînte chuan “Khawiah nge a awm tâk?” an ti ang.

⁸Mumang angin a ral ang a, an hmu leh tawh lo vang, Zân inlârna angin a bo thuai ang.

⁹Mit ngeia hmu ṭhînte khân an hmu leh tawh lo vang a, A awmna ṭhîn hmunah an hmu leh tawh lo vang.

¹⁰Retheite a rûksak a, A faten chûng mite chu tihlâwm an tum ang a, A sum lâk chu an pe kîr ang.

¹¹A tleirâwl thazatna nên Vaivutah an la chang ang.

¹²Sual hi a kâin tui ti hlein A lei hnuaiah thukru tlat mah se,

¹³Lem phal lovin hmuam tlat mah se,

¹⁴A thil ei chuan a pum a tilumlet ang a, A kawchhûngah rûl tûr a chang ta e.

¹⁵Hausakna a dawlhte chu a luak chhuak a, Pathianin a pum aṭangin a luak chhuahtîr a ni.

¹⁶Rûl tûr a fâwp a, Tûr chuan ani chu a tihlum ta.

¹⁷Lui tui luang chu a hmu ve tawh lo vang. khawizu leh hnutetuia luang chu.

¹⁸A thawhrim rah chu ei lovin a chân ang a, A khâwl khâwm pawh a chên chuang lo vang.

¹⁹Retheite a tiduhdah a, a hnuchhawn a, Mahni in sa lovin mi sak sa a chhuhsak a.

²⁰A duhâmna chuan chin lêm a nei lo ve, Mahse, a ro chuan a chhan thei dâwn si lo.

²¹Ei lohva hleih a nei lo va, A sum leh pai chuan a daih lo vang.

²²A hausak vânglai takin a tlachhe thut ang a, Vânduaina chuan a hual vêl ang.

²³In ei thau hle mah se, Pathian thinurna nasa tak chu a chungah a tla ang, A kawchhûnga khat khawpin a sûr ang.

²⁴Thîr-fei hlauvin tlânchhe mah se, Dâr thal chuan a chhun tlang a,

²⁵A phawi a, a hnung lamah a chhuak a, A hmâwr tlê-ah thisen a kai, Hliampui a tuar ta a ni.

²⁶Thim nasa takin a hmuak ang a, A rote chu mihring chhêm ni lo meiin a kâng ang a, A puan ina la awmte pawh a kâng ral vek bawk ang.

²⁷Vânte chuan a khawlohna a puang ang a, Lei pawhin thiam loh a chantîr ang.

²⁸Tui lianin a in a lên bo vang a, Pathian thinur ni-ah a neih zawng zawng a ral vek ang.

²⁹Chûng chu mi sual chan tûr Pathian ruatsak chu a ni, An ro chan tûra Pathian ruat chu a ni.