Read Mizo Lushai Joba 21 Bible Online

Joba 21 - Mizo Lushai bible

Joba 21

¹Tichuan, Joba chuan, a chhâng a:

²Ka thu sawi ngun takin ngaithla ula, Chu chu min thlamuanna ni rawh se.

³Min ngaithla ula, ka han sawi ang e, Ka sawi zawhah in duh leh min nuih dâwn nia.

⁴Mihring chungah em phunnawi ka nih? Han dawhthei rual ka ni lo asin.

⁵Min en ula, mak in ti hle ang, In kâ in hup ang.

⁶Ka chunga thil thleng hi ka ngaihtuahin ka mangang a, Hlauhnain ka thauvah a man ṭhîn.

⁷Engtizia nge mi sualte an nun renga, Tarkûna damin an hmuingîl hle le?

⁸An tu leh fate hlawhtling takin an dampui a.

⁹An in leh lo hlauhawm lakah a him a, Pathian lahin a hrem hek lo.

¹⁰An bâwngpate chî a ṭha a, An bâwngpuiten no an chhiat ngai lo.

¹¹Ran rual angin an fate an chhuahtîr dem dem a, Hlim takin an tualchai a,

¹²Dârbenchhek leh ṭingṭang remin an zai a, An phênglâwng nên hlim takin an ri bûng bûng.

¹³An damchhûngin nuam takin an khawsa a, Thlamuang takin mual an liam ṭhîn.

¹⁴Pathian hnênah, “Mi kalsan rawh, I kawngte hriat kan duh lo ve,

¹⁵Engkimtitheia chu tu nge maw a niha, A rawng kan bâwlna tûr chu? A hnêna kan ṭawngṭaiin hlâwkna eng nge kan hmuh ang,” an ti a.

¹⁶An sum leh pai chu an thawh chhuah a ni lo va, Mi sualte remruatnaah chuan ka tel ve lo a ni.

¹⁷Mi sual khâwnvâr chu a mit fo va, Vânduaina an chungah a thleng fo bawk a, Pathian thinurna chuan chhiatna a thlentîr a ni lâwm ni?

¹⁸Thli chhêm lên buhpâwl ang an ni a, Thlipuiin buhsi a len bo ang hi an ni.

¹⁹A sualna avângin a fate a hrem in ti a, Amah ngei chuan tuar ang hmiang, a inhriat chhuah theih nân.

²⁰A mit ngeiin a chunga chhiatna lo thleng chu hmu sela, Engkimtitheia thinurna chu tuar rawh se.

²¹A damchhûng nite a liam tawh hnuah chuan, A kalsan tâk a chhûngte a ngaihtuah ngai em ni?

²²Chung lam vâna thil awmte chunga rorêltu Pathian chu Tu nge hriatna zirtîr thei?

²³Mi ṭhenkhat chu hlim tak leh nuam takin an khawsa a, an thau mûm tûl a, an mawm hmuk mai a, An thi an vânglaiin.

²⁵Ṭhenkhat erawh chu thil ṭha chên lovin Hrehawm takin an awm a, An thi a.

²⁶Vaivutah an mu tlâng a, A lungin a bâwm ṭhîn.

²⁷I ngaihtuahte ka hria asin, Mi diriamzia pawh ka hria.

²⁸“Khawiah nge mi ropui in chu a awm tâk? Mi sualte chênna puan in pawh khawiah nge,” in ti a.

²⁹Zin vêl mite in zâwt ngai lo vem ni? An sawite chu in awih na nge?

³⁰Mi sual chu vânduai ni atân khêk a ni a, Thinur ni-ah hruai chhuah a ni,’ tih hi.

³¹Tu nge a hmaichhanah a sualna chachhuah anga, A thil lo tih tu nge thungrûl ngam ang?

³²Thlânah phûm a ni a, Ngun takin an vêng a,

³³Ruama lei chuan ṭha takin a khuh a, A hmaah mi tam tak an kal tawh angin Mi tam takin a hnung an zui.

³⁴Engtin tehlulin nge nangnin dâwtin min thlamuan theih ang? In sawite chu engmahlo mai a ni si a.