Read Mizo Lushai Joba 22 Bible Online

Joba 22 - Mizo Lushai bible

Joba 22

¹Tichuan, Elifaza, Teman mi chuan heti hian a chhâng a:

²Mihring hian Pathian tân ṭangkaina a nei em? Mi fing ber pawh a hlâwkpui dâwn em ni?

³A dikna chu Engkimtitheian a ṭangkaipui em? Sawisêlbova i nun avângin hlâwkna eng nge a neih?

⁴Pathian i ṭih avânga hrem i ni lo va, Rorêlnaa hruai i ni hek lo.

⁵I sualna a nasat êm avâng a ni, I sualnain tâwpintai a nei si lo.

⁶Eng mah tham lovah i unaute lakah dahkham i phût a, An silhfên hlihsakin saruakin i awmtîr a.

⁷Chaute chu in tûr tui i pe lo va, Rilṭâmte tân chaw i ui a.

⁸I thiltihtheihnain mi ram i lâksak a, I duhsakzâwngte i pe a.

⁹Hmeithaite chu kutruakin i kal botîr a, Fahrahte pawh i rapbet a.

¹⁰Chuvâng alâwm i vêlin thangin a hual che a, Chhiatna nasa tak leh hlauhawmin a hual che ni.

¹¹Khua a thim a, i hmu thei lo va, Tui lian chuan a khuh ta che a nih hi.

¹²“Pathian chu vânsângahte hian a awm lo vem ni? Arsite khi sâng hle mah se, a rawn chhuk en a,

¹³Eng nge Pathianin a rawn hriat ang le? Chhûmin a hliah tlat a, engtin nge min rêlsak theih?

¹⁴“Min hmuh theih loh nân chhûm chhah takin a khuh a, Vânlaizâwlah a lêng vêl a,” i ti a.

¹⁵Mi sualten an zawh ṭhin kawng hlun chu I zawh ve dâwn em ni?

¹⁶A hun lovah sawn bo an ni a, An innghahna pawh tui lianin a lên bo ta.

¹⁷Pathian hnênah, “Min kalsan rawh, Engkimtitheia chuan eng nge min tih theih?” an ti a.

¹⁸Chuti chungin an inte thil ṭhain a tihkhahsak a, Chuvângin, mi sualte remruat chu ka hrethiam thei lo.

¹⁹Mi dikte chuan an hmuhin an lâwm a, Pawi khawih lote pawhin an nuihsan a;

²⁰“Kan hmêlmate chu tihchhiat an ni ta, Mei chuan an hausakna a kâng ral ta,” tiin.

²¹Pathian hnênah inhlân la, amah nên inrem rawh, Tichuan, i hmuingîl ang.

²²A kamchhuak zirtîrna chu pawm la, I thinlungah vawng tlat ang che.

²³Engkimtitheia hmaa inngaitlâwma i kîra, I in ata thil sual i dah bo daih chuan A tungding ngei ang che.

²⁴I rangkachak chu vaivut ang leka i ngaiha, I rangkachak ṭha chi pawh, Luikawr lungte ang maia i ngaih chuan,

²⁵Engkimtitheia chu i rangkachak leh tangkaraw tlang, I tâna hlu tak chu a ni ang.

²⁶A ni, Engkimtitheia chu i ring tlat ang a, Amah chu i lâwmna ber a ni ang.

²⁷A hnênah i ṭawngṭai ang a, anin a ngaithla ang che, Tichuan, i thutiamte lâwm takin i hlen ang.

²⁸I thil ruahman chu a hlawhtling ang a, I kawngte pawh a tiêng ang.

²⁹Pathianin mi chapote a hnûkhniam a, Inngaitlâwmte a chhanhim ṭhîn.

³⁰Mi pawi khawih lo chu a chhan chhuak ang a, I kut a thianghlim chuan Nang pawh a chhan chhuak bawk ang che.