Read Mizo Lushai Joba 23 Bible Online

Joba 23 - Mizo Lushai bible

Joba 23

¹Tichuan, Joba chuan a chhâng a:

²Ka manganna vawiin thlengin ni tin a zual zêl a, Ka rûm hian ka natzia pawh a hril zo lo.

³Aw, amah ka hmuh theihna tûr lam chu hria ila, A thut hmunah chuan ka kal tûr a.

⁴Ka chungthu a hnênah chuan ka thlen ang a, Ka tanfung zawng zawng hi ka sawi chhuak vek ang.

⁵Mi chhân dân ka hre duh a, A sawi tûr chu hriat ka châk a ni.

⁶A thiltihtheihna nasa tak nên min bei dâwn em ni? Dâwn lo, ka lamah beng a chhi zâwk ang.

⁷Kei mi nun ngîl hian a hmaah thu ka thlen ang a, Thiam changin ka chhuak hlen tawh ang.

⁸Khawchhak lamah ka kal a, ani chu a awm si lo, Khawthlang lam ka zawn leh ka hmu si lo.

⁹Hmâr lama a chêt laiin ka hmu lo va, Chhim lam a pan pawhin ka hmu thei chuang lo.

¹⁰Ka kawng zawh chu a hria. Mi fiah hnuah rangkachak angin ka chhuak dâwn si a.

¹¹Ka kete hian a hniakhnung a zui zêl a, Pêngbo lovin a kawng ka zawh zêl a.

¹²A kam chhuak thupêk chu ka pênsan lo va, A thu chhuakte chu chaw aiin ka ngaihlu zâwk.

¹³Mi rilru nghet a ni, tu nge khawih her thei ang? A duhzâwng chu a ti mai a ni.

¹⁴Ka chan tâwka a rêl chu a hlen ang a, Chutiang chu a la nei teuh a ni.

¹⁵Chuvângin, a hmaah hlauvin ka khûr a, Ka ngaihtuah chângin ka hlau zual thîn.

¹⁶Pathianin ka thinlung a tichau va, Thim chhah angin min khuh mah sela, Ka hlau chuang lo, Engkimtitheia chu a ni mi tizâmtu chu.