Read Mizo Lushai Joba 24 Bible Online

Joba 24 - Mizo Lushai bible

Joba 24

¹Engkimtitheia chuan engati nge rorêl hun a ruat loh? Engah nge amah hretuten chu ni chu an hmuh loh?

²Mi ṭhenkhat chuan ramri lung an sawn a, Mi ran rual an chhuh chu anmahni ta angin an vulh a,

³Fahrahte sabengtung an lâksak a, Dahkham atân hmeithai bâwngpa an hrêng.

⁴Retheite awm ngaihna hre lovin an siam a, Ram chhûnga tlachhamte chu biru tûrin an tlânchhia,

⁵Thlalêr ram sabengtung angin Ṭhahnemngai takin chaw an zawng ṭâwk ṭâwk a, Thlalêrah chuan an fate tân chaw an hmu hrâm ṭhîn.

⁶Mi lova buh sengin an inhlawh a, Mi sualte pawhin an grep lo tûrin an chhawr.

⁷Puan sin lovin saruakin zankhuain an mu a, Khawvâwta intuam lumna eng mah an nei lo.

⁸Tlânga ruahpui sûrin a nan huh a, Phen tûr zawngin lungpui an bêl.

⁹Pa nei lo hnute hne laite chu an pawtthla a, Mi retheite chu an leiba aiah an fate an lâksak.

¹⁰Silhfên an tlachham a, saruakin an vâkvai a, Rilṭâm chungin an buhphalte an pu.

¹¹Oliv huanah hriak an her a, Uain khurah grep an rap sâwr a, Tuihâl dangchârin hna an thawk.

¹²Khawvêla mi tam tak thichhâwnga rûm te, Ṭanpui dîla hliam tuar au te, Pathian lahin a ngaihsak lo.

¹³Mi ṭhenkhat chuan êng an hua a, êngah an kal duh lo. Khaw êngah pawh an awm duh lo.

¹⁴Varṭianah tualthattu chu a tho va, Rethei leh chanhaite a that a, Zânah pawh rûkru angin a che vêl ṭhîn.

¹⁵Uire chuan khaw thim a thlîr a, “Tu man min hmu tawh lo vang,” tiin. A hmai a khuh a.

¹⁶Chûng mite chu zânah in rek pawpin an lût ru a, Chhûnah an inkalhkhung a, Êngah an awm duh lo.

¹⁷Thim chhah mup chu an tân zîng a ni a, Thim hnuaia hlauhawmte nên an innêl êm a ni.

¹⁸Tui lian chuan chak takin a lên bo va, A ram chan chu ânchhe dawng a ni a, A grep huana thawk tûrin tu mah an kal lo.

¹⁹Khawkhêng ni saah vûr a tuiral angin Mi sualte pawh thlânah an ṭawih ral ang.

²⁰A nu chuan a theihnghilh tawh ang a, A lung tân chaw tui tak a ni ang. Mi sualte chu hriat reng an ni tawh lo vang a, Thing anga tihtliah an ni ang.

²¹Ching, fa hring thei lote chu rethei takin a chhawr a, Hmeithaite a khawngaih ngai lo.

²²Pathianin a thiltihtheihnain mi chakte a hnawt kiang a, An tho chhuak nain dam rêng an beisei lo.

²³Him tak leh thlamuang âwm takin a chawlhtîr a, Mahse, an kawng chu a mitin a en reng si.

²⁴Rei lo tê atân chawisân an ni a, An ral leh ṭhîn, tihhniamin an awm a, Mi dangte angin mual an liam a, Buhvui anga ah chhum an ni.

²⁵Chu chu a dik lo a nih pawhin Tu nge, “I daw’” min ti thei ang? “I thute hi eng mah a ni lo,” tu nge ti thei ang?