Read Mizo Lushai Joba 27 Bible Online

Joba 27 - Mizo Lushai bible

Joba 27

¹Joba chuan heti hian a chhâng a:

²Ka dikna ngainêpa, ka nun tilungngaitu, Engkimtitheia, Pathian nung chhâlin ka sawi e,

³Ka damchhûnga Pathian thaw Ka hnâra a awm chhûng chu,

⁴Ka hmuiin thu lawilo a sawi lo vang a, Ka leiin dâwt a sawi hek lo vang.

⁵Ka thiam dâwn teuh lo mai che u, Ka thih thlengin ka dik tih ka ṭan tlat dâwn.

⁶Ka dikzia ka ṭan tlat ang a, Ka thu ka zûk lo vang. Ka dam chhûng zawng inthiam lohna ka nei lo vang.

⁷Ka hmêlma chu mi sual angin, Mi dotu chu mi dik lo angin hrem ni teh se.

⁸Pathian ngaihsak lo tân beisei tûr eng nge awm? Pathianin a hnâwla, a nun a lâksak bawk si chuan.

⁹Buainain a chîm laiin Pathianin an au thâwm a ngaithla dâwn em ni?

¹⁰Engkimtitheia chungah a lâwm ang em? Pathian chu eng lai pawhin a ko vang em?

¹¹Pathian thianghlimzia chu ka zirtîr ang che u, Engkimtitheia remruat chu ka zêp lo vang.

¹²Nangmahni ngeiin hêng hi in hmu vek si a, Engtizia nge mumal nei lo taka in ṭawng mai le?

¹³Pathianin mi sualte chan tûra a ruat leh, Engkimtitheian hnehchhiahte chan tûra a ruat chu hei hi a ni:

¹⁴Fa tam tak nei mah se, khandaih tuar tûr mai an ni, A rîla rahten chaw kham khawp an nei lo vang.

¹⁵A thlah la dam chhunte pawh hriin an thi ang. An nupuite pawhin sûnna hun an nei lo vang.

¹⁶Vaivut anga tam tangkarua khâwlin, Silhfên pawh hlum angin tiang khâwm mah se,

¹⁷A tian khâwm chu mi dikten an la inbel ang a, A tangka pawh pawi khawih loten an la insem ang.

¹⁸A in sak chu maimawm rîl zam ang lek a ni, Vêngtuin chhâwlbûk a sak ang lek hi.

¹⁹Hausa takin a mu a, a mut hlânin a sum a ral zo va, A han harh chuan eng mah a nei tawh lo.

²⁰Tui lian angin hlauhawmin a nangchîng ang a, Zâna thlipui lo tlehin a la bo vang.

²¹Khawchhak thliin a lên bo vang a, a awm tawh lo vang, A hmun ata a nuai bo dâwn si a.

²²Zahngai lovin a nuai chiam ang a, A thiltihtheihna hmaah chuan a tlânchhe rawk rawk ang.

²³Miten an kut an ben khum ang a, Chek khumin a hmun aṭangin an ûm chhuak ang.