Read Mizo Lushai Joba 28 Bible Online

Joba 28 - Mizo Lushai bible

Joba 28

¹Tangkaraw laihchhuahna hmun a awm a, Rangkachak tihthianghlimna hmun pawh a awm.

²Thîr chu lei aṭanga lâk chhuah a ni a, Dâr sen chu lung aṭanga rawhtui a ni.

³Miten thimah êng an chhi zêl a, Khur thûk tak takah an lût a, Thim chhah mupa lung awmte chu lai chhuak tûrin.

⁴Mite chên lohnaah khur an lai a, A chunga kalte pawhin an hre lo. Mi hriatpui lohvah an inkhai a, an inthên vêl ṭhîn.

⁵Lei pâwnlâng hi buh tân a ni a, A chhûngril erawh chu mei kan ang a ni.

⁶Lei chhûnga lungah te chuan safir lunghlu a awm a, A dipahte rangkachak a tel bawk.

⁷Chumi kalna chu mulukawlh pawhin a hre lo, Mu pawhin a hmu ngai hek lo.

⁸Ramsa kawlhte pawhin an tlawh lo va, Sakeibakneite pawh an kal ngai lo.

⁹Mite chuan lung changte chu an la a, Tlângte chu a bulṭhutah an hai let a.

¹⁰Lungpuite pawh an verh tlang a, Thil hlu tak tak an hmu chhuak a.

¹¹Luite chu pût hauh lovin an khuap a, Thil lang lote chu an tilang a.

¹²Mahse, finna chu khawiah nge an hmuh ang a, Hriatna chu khawiah nge a awm ang?

¹³Mihringin a hlutzia an hre lo va, Mi nung ramah hian an hmu hek lo.

¹⁴Tuithûkpui chuan, “Ka hnênah a awm lo,” a ti a. Tuifinriat chuan, “Ka hnênah a awm lo,” a ti bawk a.

¹⁵Rangkachaka lei theih a ni lo va, A man atân tangkarua bûk chhuah chi a ni hek lo.

¹⁶Ofir rangkachakin a tluk thei lo va, Onix leh safir lunghlute pawhin an tluk thei lo.

¹⁷Rangkachak leh lung fîmin a hen lo va, Rangkachak nomawia thleng theih a ni hek lo.

¹⁸Berul leh Krustal lunghlute nên tehkhin rual a ni lo. A ni, finna man chu lunghlu man aiin a tam zâwk.

¹⁹Ethiopia ram lunghlu topaz pawhin a khan lo va, Rangkachak thianghlim ai pawhin a hlu zâwk.

²⁰A nih, finna chu khawi aṭanga lo kal nge? Hriatna chu khawiah nge a awm?

²¹Thil nung pakhat mahin an hmuh theih loh tûra thup a ni a, Chunglêng savate lakah thuhrûk tlat a ni.

²²Boralna leh thihna chuan “A thâwm zawng kan bengin kan hria,” an ti a.

²³Pathian chauhvin a kawng chu a hria a. Amah chauh a ni a awmna hmun pawh hria.

²⁴Lei tâwp thlengin a thlîr a, Vân hnuaia thil tinrêng hi a hmu.

²⁵Thli chak dân a teh lai leh Tuite a teh lai khân

²⁶Ruahtui tlâk dân tûr a ruahman lai leh, Khawpui ri leh kawlphe kawng a siam lai khân.

²⁷Tichuan, finna chu a hmu a, a puangzâr a, A tinghet a, a chhui chhuak a.

²⁸Mihring hnênah chuan, “Ngai rawh, LALPA ṭih hi finna a ni, Thil ṭha lo kalsan hi hriatthiamna chu a ni,” a ti a.